გასულ კვირას Dow Jones Industrial Average-ისა და S&P 500-ის ფასები 2%-ით შემცირდა. ამ ვარდნამ 2022 წლის ახალი დაბალი მაჩვენებლები დააფიქსირა ინდექსებისთვის, რომლებიც დღემდე, შესაბამისად, 11%-ითა და 16%-ით არის შემცირებული.
Walmart და Home Depot ამ კვირაში კვარტალურ ანგარიშებს წარადგენენ და Palo Alto Networks არის კიდევ ერთი კომპანია, რომელსაც მომდევნო რამდენიმე დღის განმავლობაში თვალყური უნდა ადევნოთ.
Walmart
ინვესტორებს Walmart-ის კვარტალურ ანგარიშთან დაკავშირებით რამდენიმე მნიშვნელოვანი კითხვა აქვთ. პირველი საკითხი, რომელიც ინვესტორებს აინტერესებთ არის ის, თუ რამდენად ხედავს Walmart-ის მენეჯმენტი სამომხმარებლო ხარჯების ძლიერ ტენდენციებს, მიუხედავად ეკონომიკური ზრდის შენელებისა. შესადარებელ მაღაზიებში გაყიდვები (საცალო ვაჭრობის ლოკაციის მიერ უახლოეს პერიოდში წარმოქმნილი შემოსავლის, წარსულის ანალოგიურ პერიოდში გამომუშავებულ შემოსავალთან შედარება) გასულ კვარტალში აშშ-ის ძირითად ბაზარზე 6%-ით გაიზარდა და ინვესტორების უმეტესობა ამჯერად მხოლოდ მოკრძალებულ შენელებას მოელის. ყურადღება მიაქციეთ მომხმარებელთა ტრაფიკს (გასულ კვარტალში 3%-ით გაიზარდა), როგორც ძირითადი გაყიდვების სიმტკიცის საზომს.
სხვა საკვანძო საკითხი კი არის ის, ახერხებს თუ არა Walmart თავისი მასშტაბის გამოყენებას დაბალი ფასებისა და საქონლის სრულყოფილი არჩევანის შეთავაზებისთვის. ეს აქტივები 2022 წლის დასაწყისისთვის კომპანიას ბაზრის წილის მოპოვებაში დაეხმარა და აქციონერებმა უნდა მიიღონ დადებითი ანაზღაურება, თუ Walmart ამ კონკურენტული უპირატესობის კაპიტალიზაციის გაგრძელებას შეძლებს.
Home Depot
Home Depot-მა პანდემიის ადრეულ ეტაპებზე ეპიკური ზრდა დააფიქსირა, მაგრამ ინვესტორები ღელავენ, რომ სახლის გაუმჯობესების საცალო მოვაჭრისთვის კარგი დრო დასრულდება. მათ ამის რეალური მიზეზები აქვთ, მათ შორის საპროცენტო განაკვეთების ზრდის გამო საბინაო ხარჯების პოტენციური შემცირება. გარდა ამისა, ინფლაციამ, შეიძლება, დიდი გავლენა იქონიოს მომხმარებელთა ხარჯვაზე.
დღესდღეობით, ინვესტორები, რომლებიც Home Depot-ს ადევნებენ თვალყურს, ემზადებიან, რომ კომპანია გაყიდვების ზრდას დააფიქსირებს და შემოსავალი $36 მილიარდი იქნება – წინა წლის ამავე პერიოდში შემოსავალმა $37.5 მილიარდი შეადგინა.
თებერვალში აღმასრულებლებმა იწინასწარმეტყველეს უცვლელი მომგებიანობა და „ოდნავ პოზიტიური“ შესადარებელი მაღაზიების გაყიდვები, მაგრამ, შესაძლოა, სახლის გაუმჯობესების ბაზარზე გაყიდვების შერბილების შედეგად, ეს პროგნოზები შემცირდეს.
Palo Alto
კიბერუსაფრთხოების სპეციალისტის აქციების ფასი ჯერ კიდევ 2022 წელს გაიზარდა. კომპანიის სერვისებზე მოთხოვნამ მოიმატა, რადგან ბოლო წლებში კომერციის კიდევ უფრო დიდი ნაწილი ინტერნეტ სივრცეში გადავიდა. თუმცა, შესაძლოა, წინ შენელება იყოს მოსალოდნელი. გარდა ამისა, კომპანიის აქციები, მისი შედარებით სუსტი მოგების გათვალისწინებით, ძვირი ჩანდა.
კომპანიას შეუძლია ადვილად მოიპოვოს ამაღლებული შეფასება, თუ ის კლიენტთა ბაზისა და სერვისების პორტფელის შექმნას გააგრძელებს. არსებული მომხმარებლების დარწმუნება, რომ Palo Alto-ის კიდევ უფრო მეტ შეთავაზებას დათანხმდნენ, ასევე, ახალი კლიენტების დამატება კომპანიის შემოსავლების ზრდის დაჩქარებისკენ ყველაზე საიმედო გზაა.
