ყველა ისეთი აქციის ყიდვა, რომლის ფასიც ერთნიშნაა, სპეკულაციური ინვესტიცია არ არის. მართალია ბევრი მათგანი მართლაც სპეკულაციურია, მაგრამ ამ ფასების დიაპაზონში შეგიძლიათ იპოვოთ წარმატებული კომპანიები, რომლებიც მოცემულ მომენტში უბრალოდ ბაზრის ფავორიტები არ არიან.
განვიხილოთ, მაგალითად, Sirius XM Radio და Tencent Music Entertainment. ამ ორ კომპანიას ბევრი საერთო აქვს. თავიანთ საშინაო ბაზრებზე ისინი მომავალი თაობის მუსიკალურ პლატფორმებში ლიდერები არიან. ორივე ასევე თანმიმდევრულად მომგებიანია და ამჟამად მათი აქციები ბაზარზე $10-ზე ნაკლებ ფასად მიმოიქცევა. მოდით, განვიხილოთ თითოეული მათგანი.
Sirius XM Radio
სატელიტური რადიო უფრო დიდია ვიდრე ოდესმე. Sirius XM-მა ეს წელი რეკორდული 32 მილიონი ანგარიშით დაიწყო. შეიძლება იფიქროთ, რომ პრემიუმ სატელიტური რადიო არ იქნება მზარდი ბაზარი, იმის გათვალისწინებით, თუ რამდენად ადვილია სმარტფონის დაკავშირება თქვენი მანქანის აუდიო სისტემასთან და ამ გზით სტრიმინგ სერვისების მოსმენა. ბოლო 11 წლის განმავლობაში კომპანიამ ყოველწლიურად (გარდა ერთისა) თვითგადამხდელი გამომწერების რაოდენობა მინიმუმ 1 მილიონით გაზარდა. მენეჯმენტმა თებერვალში, ამ წლისთვის, ივარაუდა მხოლოდ ნახევარი მილიონით მატება, მაგრამ ეს ჯერ კიდევ მზარდი აუდიტორიაა.
აქციები ბაზარზე დაბალ ფასად ($6.58) მიმოიქცევა, რადგან კომპანიას ბრუნვაში ძალიან დიდი რაოდენობის აქციები აქვს, მაგრამ მენეჯმენტი ამაზე მუშაობს. Sirius XM-მა შარშან $1.83 მილიარდის მოცულობის ფულადი სახსრების თავისუფალი ნაკადი გამოიმუშავა და ის ამ ფულის უმეტეს ნაწილს უბრუნებს აქციონერებს დივიდენდების და რაც მთავარია აქციების გამოსყიდვის სახით. Sirius XM-ის აქციების რაოდენობამ 2012 წელს 6.9 მილიარდს მიაღწია, მაგრამ ახლა თითქმის 4 მილიარდამდე არის შემცირებული. Sirius XM-ის P/E (ფასი/მოგება) კოეფიციენტი ამჟამად 20-ს შეადგენს.
Tencent Music Entertainment
როგორც წესი, თქვენ ვერ ნახავთ ციფრულ მუსიკალურ პლატფორმებს დაბალ ფასად, მომგებიანი კომპანიების სიაში, მაგრამ Tencent Music Entertainment გამონაკლისია. ამჟამად კომპანიის თითო აქციის ფასი $5.06-ს შეადგენს. Tencent Music-ის ჯანსაღი წმინდა მოგების გასაღები არის მაღალი მარჟის მქონე სოციალური კარაოკე პლატფორმა და ვირტუალური საჩუქრების ძლიერი ციფრული სისტემა, რომელიც ადამიანებს საშუალებას აძლევს თავიანთ საყვარელ შემსრულებლებს საჩუქრები გაუგზავნონ.
Tencent Music -ს ყოველთვიურად, მობილური მოწყობილობების საშუალებით, 615 მილიონი აქტიური მომხმარებელი ჰყავს. მათი უმეტესობა უფასო სერვისებს იყენებს, მაგრამ Tencent Music -ის აპლიკაციას 76.2 მილიონი ფასიანი ანგარიშის მომხმარებელი და სოციალური გართობის კუთხით 9 მილიონი გადამხდელი მომხმარებელი გააჩნია.
კომპანია საჯარო 2018 წელს გახდა, როდესაც ჩინურ ტექნოლოგიურ გიგანტს – Tencent-ს გამოეყო, მაგრამ მისი ზრდა უკვე ნელდებოდა და ამის შემდეგ კიდევ უფრო მკვეთრად შენელდა:
- 2017 – 152%
- 2018 – 73%
- 2019 – 34%
- 2020 – 15%
- 2021 – 7%
გარდა ამისა, მეოთხე კვარტალში შემოსავალი 9%-ით შემცირდა. სოციალური გართობის ბაზარი ახლა უფრო კონკურენტუნარიანია, მაგრამ ანალიტიკოსები მომავალ წელს კომპანიის შემოსავლის ზრდას ვარაუდობენ. კომპანია, ორიგინალური შინაარსის შეთავაზების გასაძლიერებლად, ბაზრის ლიდერობას იყენებს და ცდილობს ახალი შემსრულებლების ჩამოყალიბებაში უფრო დიდი როლი ითამაშოს. ჩინურ კომპანიაში ინვესტირებას თან ახლავს დამატებითი რისკები. ასევე სამართლიანია იმის თქმა, რომ მუსიკალური პლატფორმების აქციები შეიძლება მერყევია. თუმცა, კომპანია, რომელსაც განვითარების პოტენციალი გააჩნია და მისი აქციები ასეთ დაბალ ფასად იყიდება, შეიძლება, მომხიბვლელი საინვესტიციო შესაძლებლობა იყოს.
