28 ივლისს მეორე კვარტლის ანგარიშის წარდგენისას Amazon-მა მოსალოდნელზე უკეთესი შედეგები დააფიქსირა და უოლ სტრიტის მრავალ პროგნოზს აჯობა. 26 ივლისიდან 18 აგვისტომდე კომპანიის აქციების ფასი 24%-ით გაიზარდა.
თუმცა, ამაზონის აქციებს ზრდისთვის სივრცე ჯერ კიდევ აქვს. კომპანიის ბოლო ორი შესყიდვა განსაკუთრებით პერსპექტიულია.
პირველი მიზეზი
Amazon-მა ივლისი-აგვისტოს პერიოდში შესყიდვები განახორციელა. მისი პირველი შესყიდვა იყო გამომწერებზე დაფუძნებული ჯანდაცვის კომპანია – 1Life Healthcare ($3.9 მილიარდად), რომელიც ცნობილია, როგორც One Medical. შესყიდვის შემდეგ Amazon ჩაერთვება ჯანდაცვაში – ინდუსტრიაში, რომელსაც კომპანია მანამდე აკვირდებოდა. One Medical-ის მისიისა და Amazon-ის უნიკალური რესურსების გათვალისწინებით, ეს შესყიდვა, სავარაუდოდ, ძალიან ხელსაყრელი იქნება.
ტელემედიცინის სერვისების პოპულარობა პანდემიის პერიოდში გაიზარდა – ვირტუალური ჯანდაცვის კომპანიის – Teladoc Health-ის აქციებმა მნიშვნელოვანი ზრდა განიცადა.
თუ შესყიდვა წარმატებული იქნება, ქვეყნის მასშტაბით ამაზონი One Medical-ის თითქმის 200 ლოკაციასა და დაახლოებით 770,000 პაციენტზე მოიპოვებს კონტროლს, რაც Teladoc-ს მნიშვნელოვნად აღემატება. გარდა ამისა, ამაზონს აქვს შანსი, რომ საქმეში ჩართოს საკუთარი ტექნოლოგიები, როგორიც არის უბადლო მიწოდების ინფრასტრუქტურა და ჩამოყალიბებული სააბონენტო სერვისი მთელ მსოფლიოში 200 მილიონზე მეტი წევრით. ჯანდაცვის ინდუსტრიაში შესვლა, შეიძლება, არც თუ ისე ადვილი იყოს, მაგრამ, როგორც ჩანს, ამაზონს ამ მიმართულებით წარმატების მიღწევის დიდი პოტენციალი აქვს.
მეორე მიზეზი
5 აგვისტოს Amazon-ის მენეჯმენტმა სამომხმარებლო რობოტექნიკის კომპანიის – iRobot-ის შეძენის გეგმების შესახებ გამოაცხადა – გარიგება $1.7 მილიარდს აღწევს. One Medical-თან შედარებით, შესყიდვა, სავარაუდოდ, ნაკლებად სარისკოა და კომპანიის ამჟამინდელ პროდუქციის ხაზში კარგად ჯდება.
ამაზონი წლების განმავლობაში ჭკვიანი სახლის ინდუსტრიაში თანდათან შემოიჭრა Alexa-ს მხარდაჭერილი პროდუქტების ხაზით, როგორიც არის ჭკვიანი დინამიკები, მაღვიძარა, თერმოსტატები და უსაფრთხოების კამერები. გარდა iRobot-ის წარმოუდგენლად პოპულარული რობოტი მტვერსასრუტებისა, ამაზონის მიერ კომპანიის შესყიდვას თან მოაქვს სამომხმარებლო რობოტექნიკის ექსპერტთა გუნდის უპირატესობები, რომლებსაც აქვთ პოტენციალი გააძლიერონ კომპანიის ჭკვიანი პროდუქტების ასორტიმენტი და მზარდ ინდუსტრიაში მისი პოზიციები გაამყარონ.
შესაძლებლობა ინვესტორებისთვის
მიუხედავად იმისა, რომ ივლისის შემდეგ Amazon-ის აქციების ფასი გაიზარდა, 2021 წლის ნოემბერში მიღწეული ნიშნულიდან ის მაინც დაახლოებით 24%-ით არის შემცირებული. გარდა ბოლო შესყიდვებისა, კომპანიას რამდენიმე პერსპექტიული შესაძლებლობა აქვს, რამაც ინვესტორები უნდა აღაფრთოვანოს. Amazon-ის სარეკლამო მცდელობები კომპანიისთვის განსაკუთრებით ნაყოფიერი აღმოჩნდა, რადგან სეგმენტმა ბოლო ოთხი კვარტლის განმავლობაში $33.9 მილიარდის მოცულობის შემოსავალი გამოიმუშავა.
სექტემბერში ამაზონის სტრიმინგ სერვისს – Prime Video-ს რამდენიმე საინტერესო განვითარება აქვს, მათ შორის NFL-ის ხუთშაბათის ღამის ფეხბურთის ექსკლუზიური მაუწყებლობა და ბეჭდების მბრძანებლის შესახებ გადაღებული სერიალის – The Rings of Power-ის პრემიერა. ორივე კონტენტის დამატებას მილიონობით მაყურებლის მოზიდვის პოტენციალი გააჩნია, ხოლო ხუთშაბათის ღამის ფეხბურთს შეუძლია კომპანიის უკვე წარმატებული სარეკლამო მიმართულებაც გააძლიეროს.
Amazon-ს წინ ნათელი მომავალი აქვს და მისი პერსპექტივები კომპანიას შესანიშნავ საინვესტიციო შესაძლებლობად აქცევს.
