საჯარო კომპანიები ხშირად აქციების ფასების კონტექსტში განიხილება. მიუხედავად იმისა, რომ საბაზრო კაპიტალიზაცია უფრო სასარგებლო საზომია აქციების ნამდვილი ღირებულების დასადგენად, როდესაც საქმე ყიდვასა და გაყიდვას ეხება, საბოლოოდ აქციის ფასი უნდა იყოს გათვალისწინებული.
ონლაინ ბროკერების მეშვეობით ფრაქციული აქციების ხელმისაწვდომობის გამო, დღეს აქციების ფასი კიდევ უფრო ნაკლებად მნიშვნელოვანია, ვიდრე ადრე. მაგრამ მათთვის, ვისაც ჯერ ფრაქციულ აქციებზე წვდომა არ აქვს, არსებობს ძლიერი ბიზნესები დაბალფასიანი აქციებით. ამ სტატიაში გაეცნობით ორ კომპანიას, ნათელი მომავლით, რომელთა აქციების შეძენაც ამჟამად $50-ზე ნაკლებ ფასად არის შესაძლებელი.
- Outset Medical
იმ პაციენტებისთვის, რომლებსაც თირკმლების დაავადება აწუხებთ, დიალიზით მკურნალობის პროცესი შრომატევადი და ძვირია. დადგენილია, რომ ფართოდ გავრცელებული თირკმლის დაავადების მკურნალობაზე დახარჯული თანხა ყოველწლიურად დაახლოებით $73 მილიარდს შეადგენს. Outset Medical ცდილობს შეცვალოს მეთოდი თუ როგორ მკურნალობენ პაციენტს თავისი დიალიზის აპარატით – Tablo. ეს მოწყობილობა უკვე დაამტკიცა FDA-მ (აშშ-ის სურსათისა და მედიკამენტების ადმინისტრაცია), ის კომერციულად ხელმისაწვდომია და უკვე 80%-ით შეამცირა ინტენსიური თერაპიის განყოფილების (ICU) ხარჯები. Tablo ასევე შეიძლება პაციენტებმა სახლში, პროფესიონალი სამედიცინო პერსონალის გარეშე გამოიყენონ.
ფისკალური 2021 წლისთვის, Outset-მა $103 მილიონის ტოლი შემოსავალი გამოიმუშავა, რაც 2020 წელთან შედარებით 105%-იანი ზრდაა. ამ შემოსავლებიდან $84 მილიონი მოდის მოწყობილობების და მათთან დაკავშირებული ნივთების გაყიდვაზე, ხოლო $18 მილიონი მომსახურების ხელშეკრულებებზე და იმ ქლაუდ ინფრასტრუქტურის გამოწერებზე, რომლებიც ექიმს საშუალებას აძლევს პაციენტის მიერ სახლში მოწყობილობის გამოყენებას თვალყური ადევნოს.
2021 წელს მთლიანი მოგება 158%-ით გაიზარდა, ხოლო მთლიანი მარჟა 33.5 პროცენტული პუნქტით გაუმჯობესდა. Outset-მა $132 მილიონის ოდენობით წმინდა ზარალი დააფიქსირა, მაგრამ ეს მეტრიკა უმჯობესდება. შემოსავლის პროცენტული მაჩვენებლით თუ განვსაზღვრავთ, ის 2021 წელს 128%-ს შეადგენდა, 2020 წელს კი – 243%-ს.
Outset ჯერ კიდევ მცირე კომპანიაა, რომლის საბაზრო კაპიტალიზაცია დაახლოებით $2.2 მილიარდს შეადგენს. 2022 წლისთვის კომპანია ვარაუდობს შემოსავლის 38%-46%-ით ზრდას. კომპანიის P/S (ფასი/გაყიდვები) კოეფიციენტი 20-ს შეადგენს. ეს არ არის იაფი, მაგრამ 1 წლის წინანდელ მაჩვენებელთან შედარებით 34%-ით ნაკლებია. Outset Medical-ის თითო აქციის ფასი ახლა $47.43-ს შეადგენს.
ამჟამინდელი შეფასების პირობებშიც კი, იმ შემთხვევაში, თუ Tablo-ს სისტემა გაამართლებს, Outset შესანიშნავ ინვესტიციას ჰგავს.
- Progyny
Progyny ისწრაფვის სამყაროსკენ, სადაც ყველას, ვისაც შვილის ყოლა სურს, ამის მიღწევა შეუძლია. ეს არის კომპანია, რომელიც სპეციალიზებულია ნაყოფიერებასა და ოჯახის შექმნაში. Progyny აშშ-ის კომპანიების თანამშრომლებს კლინიკურ და ემოციურ დახმარებას სთავაზობს.
კომპანიამ 2021 წელი 191 კლიენტით დაასრულა, რაც 2020 წლის ბოლოს მაჩვენებელზე 42%-ით მეტია. გარდა ამისა, სულ უფრო მეტი წევრი სარგებლობს Progyny-ის სერვისებით. 2021 წლისთვის შემოსავალი 45%-ით – $501 მილიონამდე გაიზარდა, მთლიანი მოგება კი 60%-ით – $112 მილიონამდე, ხოლო წმინდა მოგება იყო $66 მილიონი, რაც 2020 წლის ამავე მაჩვენებელთან შედარებით 42%-ით მეტია. კომპანიის მენეჯმენტი ვარაუდობს, რომ პირველ კვარტალში შემოსავალი 35%-დან 39%-მდე გაიზრდება, ხოლო წლის განმავლობაში – 46%-დან 55%-მდე.
Progyny-ის აქციებმა, მას შემდეგ, რაც კომპანია 2019 წლის ბოლოს საჯარო გახდა, S&P 500-ს 166%-ით აჯობა. Progyny-ის P/S კოეფიციენტი ამჟამად 10-ს შეადგენს, ხოლო თითო აქციის ფასი – $48.07-ს.
Progyny-ის 2021 წლის შემოსავალი, რომელიც $501 მილიონს შეადგენდა, აჩვენებს, თუ რამდენად დიდი პოტენციალი აქვს ბიზნესს. ძლიერი შედეგები, ჯანსაღი მისწრაფებები 2022 წლისთვის და პოტენციური საბაზრო შესაძლებლობები ამ კომპანიის აქციებს შესანიშნავ საინვესტიციო შესაძლებლობად აქცევს.
