ბოლო რამდენიმე წლის განმავლობაში Fulgent Genetics მომხიბლავად გამოიყურება. 2019 წლის ბოლოდან მისი აქციების ფასი, S&P 500-ის 23%-იან მატებასთან შედარებით, 187%-ით გაიზარდა. მიუხედავად იმისა, რომ ეს შთამბეჭდავია, 2021 წლის დასაწყისში იყო მომენტი, როდესაც Fulgent-ის აქციების ფასი 1300%-ზე მეტით იყო მომატებული.
აქციების ამ უზარმაზარ ზრდას ხელი შემოსავლების წარმოუდგენელმა მატებამ შეუწყო, რაც იმან გამოიწვია, რომ 2020 წლის დასაწყისში Fulgent-მა COVID-19 ტესტების მიწოდებაზე ფოკუსირება შეძლო. ამან კომპანია პანდემიით გამოწვეული ზრდის ნათელ მაგალითად აქცია.
პანდემიის ეტაპობრივად ჩაცხრობასთან ერთად, Fulgent-მა ძლიერი შედეგების დაფიქსირება განაგრძო, მაგრამ ბოლო კვარტლის შედეგებმა ინვესტორების შეშფოთება გამოიწვია.
დადებითი ფაქტორი
Fulgent-ის ბიზნესის ბირთვი არის მისი შემდეგი თაობის მიმდევრობის (NGS) გენეტიკური ტესტები. წლების განმავლობაში ტესტების ეს კონფიგურირებადი მენიუ ბიზნესისთვის წარმატებულ საფუძველს წარმოადგენს. მას შემდეგ რაც კომპანიამ COVID ტესტებიდან უზარმაზარი შემოსავლების მიღება დაიწყო, Fulgent-ისთვის NGS-ის ძირითადი შემოსავლის ცალკე გამოეყოფა გახდა საჭირო.
მესამე კვარტლის ანგარიშში, რომელიც კომპანიამ ახლახან წარადგინა, ძირითადი შემოსავალი წლიდან წლამდე 110%-ით გაიზარდა და $56 მილიონს მიაღწია, რაც ბოლო რამდენიმე კვარტალში დაფიქსირებული ზრდის ტენდენციის გაგრძელებაა. ამ მაჩვენებელმა პირველ კვარტალში 59%-ით მოიმატა, ხოლო მეორე კვარტალში — 102%-ით.
ეს მეტრიკა ინვესტორებისთვის მთავარია, რადგან COVID ტესტებისგან მიღებული შემოსავალი დროებითია, ყოველ შემთხვევაში იმ მოცულობით, რომელიც ბოლო რამდენიმე წლის განმავლობაში დაფიქსირდა.
Fulgent-მა კვარტალი დაასრულა $918 მილიონის მოცულობის ნაღდი ფულით, ფულადი სახსრების ეკვივალენტებით და მოკლევადიანი ინვესტიციებით თავის ბალანსზე, ხოლო ოპერაციებიდან $21 მილიონის ოდენობით ნაღდი ფულით. ბალანსი ძლიერია და ბიზნესის ბირთვი ზრდას განაგრძობს.
უარყოფითი ფაქტორი
ბალანსის გამყარების გარდა, მენეჯმენტმა განახორციელა შესყიდვები და ხელი მოაწერა ხელშეკრულებებს, რის შედეგადაც გაზარდა კომპანიის ექსპოზიცია კიბოს ტესტირების სივრცეში და ჩინეთში საქმიანობა გააფართოვა.
2022 წლის მესამე კვარტლის ანგარიშის წარდგენის დღეს, Fulgent-ის წარმომადგენლებმა Fulgent Pharma-ს შეძენის შესახებ განაცხადეს. თუ გაინტერესებთ, რატომ აქვს ამ კომპანიებს ერთნაირი სახელწოდება, უნდა იცოდეთ, რომ ისინი ადრე ერთ კომპანიას წარმოადგენდა. პირველადი საჯარო შეთავაზების (IPO) პროცესისას Fulgent Genetics Fulgent Pharma-ს გამოეყო და ახლა მას უკან იბრუნებს.
მესამე კვარტალში SEC-ში (ფასიანი ქაღალდებისა და ბირჟების კომისია) შეტანილი განაცხადის თანახმად, Fulgent Genetics-ის აღმასრულებელი დირექტორი — მინგ შეე, ამ წლის აპრილამდე Fulgent Pharma-ს მენეჯერი და წევრი იყო. ამან შეიძლება გაგვიჩინოს შემდეგი კითხვა: რა უდევს ამ შესყიდვას საფუძვლად, მინგის კავშირი Fulgent Pharma-სთან თუ ამ კომპანიის ბიზნესის საფუძვლები?
გარდა ამისა, Fulgent Genetics-ის დირექტორთა საბჭოს მხოლოდ სამი წევრი ჰყავს და მათგან ერთი აღმასრულებელი დირექტორია. ეს ფაქტი უჩვეულოა და, როდესაც საქმე შენაძენებს ეხება, გადაწყვეტილების მიმღებთა რაოდენობას ამცირებს.
Fulgent-ის ბიზნესს ძლიერი მაჩვენებლები აქვს და მას, შესაძლოა, ნათელი მომავალი ჰქონდეს, მაგრამ, ინვესტორებმა, საინვესტიციო გადაწყვეტილების მიღებისას, ეს ფაქტორები უნდა გაითვალისწინონ.
