ინვესტირების სამყაროში შებიჯება, შესაძლოა, ბევრი ადამიანისთვის რთული გადასაწყვეტი იყოს. სწორედ ამიტომ დღეს მოგიმზადეთ სტატია, რომელშიც დამწყები ინვესტორებისთვის განკუთვნილ რჩევებს შემოგთავაზებთ.
- შეადგინეთ გეგმა
მას შემდეგ რაც გადაწყვეტთ, რომ თქვენი ფულის ინვესტირება გსურთ, მნიშვნელოვანია, ჩამოაყალიბოთ გეგმა, რამდენიმე კითხვის გათვალისწინებით: რა მოცულობის თანხის ინვესტირება შემიძლია? რამდენის დაკარგვის ფუფუნება მაქვს? რა არის ჩემთვის ინვესტირების მიზანი? რამდენ ხანს ვაპირებ ინვესტირებას ამ მიზნის მისაღწევად? ვერკვევი თუ არა ყველა შესაფერისი საინვესტიციო ვარიანტის განმარტებასა და ტერმინოლოგიაში?
- გაიაზრეთ რისკი
გაიაზრეთ რისკისადმი თქვენი ტოლერანტობის დონე და დაფიქრდით, როგორ იგრძნობდით თავს მთელი ინვესტირებული თანხა ან მისი ნაწილი რომ დაგეკარგათ. ახალბედა ინვესტორებს შორის გავრცელებული შეცდომა სწორედ ამ ფაქტორის არასწორად შეფასებაა. რეალურად, როდესაც მათი შედარებით სარისკო ინვესტიციების ღირებულება ეცემა, ისინი პანიკის საფუძველზე გაყიდვას იწყებენ. რისკისა და ანაზღაურებისადმი გააზრებული მიდგომა საშუალებას მოგცემთ, რომ ინვესტიციები რისკისადმი თქვენი ტოლერანტობის დონის შესაბამისად შეარჩიოთ. გახსოვდეთ, რომ ყველაფერი, რასაც აკეთებთ რისკს შეიცავს — ეს ნაღდი ფულის შენახვასაც ეხება, რადგან, შესაძლოა, მისი მსყიდველობითი უნარი ინფლაციის გამო შემცირდეს.
- თავიდანვე გაითვალისწინეთ საგადასახადო ეფექტიანობა
თუ ინვესტირებას მცირე თანხებით დაიწყებთ, შეიძლება იფიქროთ, რომ საგადასახადო ეფექტურობა მთავარი საზრუნავი არაა. გახსოვდეთ, ინვესტირება გრძელვადიანი სტრატეგიაა და უნდა გაითვალისწინოთ თქვენი ინვესტიციების პოტენციური ღირებულება მომავალში. ჩათვალეთ, რომ ახლა ინვესტიციას დებთ პენსიაზე გასვლისთვის და საპენსიო ასაკის მიღწევისთვის თქვენ მიერ გადახდილი გადასახადების მოცულობა შეიძლება ძალიან დიდი იყოს. ამიტომ ეს ფაქტორი წინასწარ, ანგარიშის გახსნამდე უნდა გაითვალისწინოთ.
- მიმართეთ დივერსიფიკაციას
როდესაც ბაზრები იზრდება და ეცემა, სხვადასხვა ტიპის ინვესტიციებით დაკომპლექტებული დივერსიფიცირებული პორტფელი რისკის დაბალანსებაში დაგეხმარებათ. მხოლოდ კონკრეტულ ბაზრებზე, სექტორებში ან კომპანიებში ინვესტირება ერთ სფეროზე ზედმეტად დამოკიდებულს გაგხდით და თქვენი წარმატება პირდაპირ მის წარმადობაზე იქნება მიბმული, რაც ჭკვიანური ნაბიჯი ნამდვილად არ არის. ამის საპირისპიროდ, აქტივთა სხვადასხვა კლასებში, რეგიონებში და სექტორებში ინვესტირება პოტენციური ზარალის შემცირებისა და გრძელვადიანი შემოსავლის მაქსიმიზაციის საშუალებას მოგცემთ.
- საინვესტიციო გადაწყვეტილებებს სხვების რჩევებზე დაყრდნობით ნუ მიიღებთ
ინტერნეტსა და მედიაში ინვესტირების შესახებ მრავალ რჩევას შეხვდებით. რა თქმა უნდა, მათ შორის ძალიან ღირებულ ინფორმაციასაც ნახავთ, თუმცა საინვესტიციო გადაწყვეტილებები არა მხოლოდ სხვის რჩევებზე დაყრდნობით, არამედ საკუთარი საფუძვლიანი კვლევის ჩატარების შემდეგ უნდა მიიღოთ.
- ორიენტირდით ინვესტირებაზე და არა სპეკულირებაზე
მიუხედავად იმისა, რომ პენი (იაფი) აქციები მაღალი შემოსავლის პოტენციალით შეიძლება ძალიან მიმზიდველი ჩანდეს, აუცილებლად უნდა გაითვალისწინოთ კომპანიის გრძელვადიანი მომავალი ღირებულება. ძალიან მცირე კომპანიები, ნაკლები რეგულირების გამო, შეიძლება უფრო სარისკო იყოს ვიდრე უფრო დიდი, საერთაშორისო კორპორაციები. მცდარია მოსაზრება, თითქოს დიდი რისკის გაწევა უფრო მეტი ფულის გარანტია — დიდი ალბათობით, ცხენების დოღში პონიზე ფსონს არ გააკეთებდით.
- ჩადეთ ინვესტიცია რეგულარულად
ზოგჯერ მცირე თანხების ხშირად ინვესტირება უკეთესია, ვიდრე დიდი მოცულობის ერთჯერადი ინვესტიციების განხორციელება. რეგულარული ინვესტირება ასევე საშუალებას გაძლევთ, არასტაბილურ გარემოში აქციების იაფად შეძენის შედეგად, ინვესტიციების საშუალო ღირებულება შეამციროთ. ინვესტირების ადრე დაწყება და პროცესის უწყვეტობა რთული პროცენტის ეფექტით მაქსიმალურად სარგებლობის შესაძლებლობითაც უზრუნველგყოფთ.
- მიმართეთ რეინვესტირებას
თუ თქვენი ინვესტიციიდან კონკრეტული პერიოდული შემოსავლის მიღებისკენ არ ისწრაფვით, მაშინ შეიძლება მიღებული შემოსავლის რეინვესტირებაზე ორიენტირდეთ. ისტორია გვიჩვენებს, რომ დივიდენდების რეინვესტირება გრძელვადიან პერსპექტივაში თქვენს შემოსავალს მნიშვნელოვნად ზრდის.
- პერიოდულად გადააფასეთ თქვენი ინვესტიციები
გახსოვდეთ, რომ ინვესტირება უწყვეტი პროცესია, ამიტომ თქვენს ინვესტიციებს, პირად გარემოებებს, ვადებს და რისკისადმი თქვენი ტოლერანტობის დონეს პერიოდულად უნდა გადახედოთ, რადგან ეს ყველაფერი დროთა განმავლობაში შეიცვლება. მაგალითად, რაც უფრო უახლოვდებით თქვენს მიზანს, შეიძლება რისკის დონის შემცირება და შედარებით სარისკო ინვესტიციებზე უარის თქმა დაგჭირდეთ, რათა საკუთარი კაპიტალი დაიცვათ. რისკისადმი ტოლერანტობის დონის გადაფასების გარდა, თქვენი საინვესტიციო პორტფელის რისკის პროფილიც შეამოწმეთ. სხვადასხვა ტოპ საინვესტიციო ფონდების ღირებულების შეცვლის შედეგად, თქვენს პორტფელში მათი წილიც იცვლება, ამიტომ ეს ფაქტორიც უნდა გააკონტროლოთ. საინვესტიციო პორტფელის პერიოდული გადაბალანსება კვლავ სასურველ დონეზე დაბრუნების საშუალებას მოგცემთ.
- მიჰყევით გეგმას
როგორც კი დაიწყებთ ინვესტირებას, მიხვდებით, რომ ძალიან ძნელია უგულებელყოთ დაუსრულებელი ცნობები ბაზრის მოძრაობებზე, ფართო მოხმარების საგნების ფასებზე, აქციებზე, ინფლაციაზე, საპროცენტო განაკვეთებზე, დივიდენდებზე, ოქროს ფასზე, ნავთობის ფასზე და ა. შ. გახსოვდეთ, რომ ინვესტირება გრძელვადიანი სტრატეგიაა, სწორედ ამიტომ ბაზრის მოკლევადიან მოძრაობებზე ფოკუსირების ნაცვლად გრძელვადიანი მიდგომა უნდა შეინარჩუნოთ და თქვენ მიერ შედგენილ გეგმას მიჰყვეთ.
