არსებობს მიზეზი, რის გამოც ბევრ ინვესტორს დივიდენდური აქციები უყვარს – ისინი შეიძლება პასიური შემოსავლის სტაბილურ წყაროდ იქცეს. გარდა ამისა, თუ ხარჯების დასაფარად დივიდენდური შემოსავალი არ გჭირდებათ, შეგიძლიათ მათ რეინვესტირებას მიმართოთ, რათა თქვენი საინვესტიციო პორტფელი გაზარდოთ.
მიუხედავად იმისა, რომ არაფერია ცუდი საინვესტიციო სტრატეგიის შედგენაში, რომელიც დივიდენდურ აქციებზე არის ფოკუსირებული, ასევე ფრთხილად უნდა იყოთ მათი ყიდვისას. არსებობს ერთი კონკრეტული საკითხი, რომლის განხილვა ყოველთვის ღირს მაშინ, როდესაც თქვენს რადარზე დივიდენდური აქცია გამოჩნდება.
არის ეს ძლიერი ბიზნესი?
დივიდენდებზე ორიენტირებული ზოგიერთი ინვესტორი იმდენად არის მაღალი დივიდენდური შემოსავლით გატაცებული, რომ შეცდომას უშვებს და ერთ მნიშვნელოვან ფაქტორს უგულებელყოფს: რამდენად კარგად მუშაობს თავად კომპანია. მაღალი დივიდენდური სარგებელი კომპანიის ფინანსურ სიძლიერეზე სულაც არ მიუთითებს.
მოდით ერთი წამით დავფიქრდეთ, თუ რა არის დივიდენდები: ეს კომპანიის მოგების ნაწილია, რომელიც ბიზნესში რეინვესტირების ნაცვლად აქციონერებზე ნაწილდება. თუმცა, მხოლოდ იმიტომ, რომ კომპანიები თავიანთ ინვესტორებს სიმდიდრეს უნაწილებს, ეს სულაც არ ნიშნავს, რომ მათ დიდი ფინანსური რესურსი გააჩნია.
თქვენ შეიძლება თვის ბოლოს სახლის ქირას და საკრედიტო ბარათის ვალს ძლივს ფარავდეთ, მაგრამ მეგობრის დაბადების დღისთვის, მაინც გულუხვი საჩუქარი შეიძინოთ, რადგან მისი გახარება გსურთ. შესაძლოა, ასე მოიქცეს დივიდენდების გადამხდელი კომპანია და გასცეს დივიდენდები მიუხედავად იმისა, რომ თავისუფალი ფულადი ნაკადების თვალსაზრისით მისი მდგომარეობა სახარბიელო არ არის.
სწორედ ამიტომ არის ძალიან მნიშვნელოვანი კომპანიის ფინანსური მდგომარეობის საფუძვლიანად გამოკვლევა. თუ მენეჯმენტი ფულად რესურსებს კარგად მართავს, კომპანიას გონივრული ოდენობის დავალიანება და შემოსავლის მრავალი საიმედო წყარო გააჩნია, მაშინ რა თქმა უნდა მასში ინვესტირება უნდა განაგრძოთ. მაგრამ თქვენ არ უნდა შეიძინოთ აქციები მხოლოდ იმიტომ რომ კომპანიის დივიდენდური სარგებელი მაღალია.
ამასთან ერთად ისიც უნდა გააცნობიეროთ, რომ როდესაც კომპანიები აქციონერების მიმართ გულუხვობას იჩენს, მენეჯმენტი უარს აცხადებს ზრდისა და განვითარების მიზნით ფულის რეინვესტირებაზე. ასე რომ, საშუალოზე მაღალმა დივიდენდებმა, შესაძლოა, საბოლოოდ აქციების საშუალოზე დაბალი ფასი გამოიწვიოს.
სიფრთხილე შეინარჩუნეთ
პასიური შემოსავლის მისაღებად დივიდენდური აქციები შესანიშნავი საშუალებაა და ბევრ კომპანიას, რომელიც დივიდენდებს გასცემს, მყარი ბიზნესი და ძლიერი პერსპექტივები გააჩნია.
თუმცა, საქმე იმაშია, რომ აქციის ყიდვის გადაწყვეტილება მხოლოდ დივიდენდურ სარგებელზე არ უნდა დააფუძნოთ. ამის ნაცვლად, არჩევანის გაკეთებისას, ამ დივიდენდების უკან არსებულ ბიზნესზე იფიქრეთ.
გარდა ამისა, გახსოვდეთ, რომ კომპანიებს, რომლებიც ახლა დივიდენდებს იხდის, ამის ვალდებულება არ გააჩნია. ასე რომ, 3, 5 ან 10 წლის შემდეგ, შესაძლოა, მდგომარეობა შეიცვალოს. ეს კიდევ ერთი მიზეზია იმისა, თუ რატომ უნდა ფოკუსირდეთ დიდ სურათზე.
