როგორ გავზარდოთ დივიდენდური შემოსავალი ძალისხმევის გარეშე?

დივიდენდური აქციები არის ერთ-ერთი ყველაზე მოსახერხებელი საშუალება იმისთვის, რომ ფული ძილშიც კი გამოიმუშაოთ. ამისთვის უბრალოდ დივიდენდური აქციების შერჩევა და მათი თქვენს საინვესტიციო პორტფელში დამატებაა საჭირო. საუკეთესო ნაწილი კი ის არის, რომ, შესაძლოა, ეს შემოსავალი, თქვენ მიერ გაწეული ყოველგვარი დამატებითი ძალისხმევის გარეშე, გაიზარდოს.

ამ სტატიაში განვიხილავთ აპრობირებულ და ჭეშმარიტ სტრატეგიას, რომელიც მომდევნო წლების განმავლობაში თქვენი დივიდენდური შემოსავლის გაზრდაში დაგეხმარებათ.

დაიწყეთ დივიდენდური შემოსავლის გამომუშავება

პირველ რიგში თქვენ გარკვეული კვლევის ჩატარება და ისეთი კომპანიების მოძიება მოგიწევთ, რომლებიც დივიდენდებს გასცემენ, რადგან ყველა კომპანია აქციონერებს დივიდენდებით არ აჯილდოებს.

როდესაც კომპანია ფულს გამოიმუშავებს, მას ორი რამის გაკეთება შეუძლია:

• ფულის ბიზნესში რეინვესტირება
• აქციონერების დამატებითი შემოსავლით დაჯილდოება

ზოგიერთი კომპანია ფულად სახსრებს ორივე მიმართულებით ანაწილებს. მაგალითად, Microsoft – ეს ტრილიონ დოლარიანი ტექნოლოგიური კომპანია ქლაუდ მიმართულებაში ინვესტირებას აგრძელებს და, იმავდროულად, აქციონერებს წლიურ დივიდენდებს უხდის $2.48-ის ოდენობით (2022 წლის ივნისის მდგომარეობით). თუ Microsoft-ისგან დივიდენდების სახით $1,000-ის მიღება გსურთ, დაახლოებით 404 აქციის შეძენა დაგჭირდებათ.

სწორედ ამიტომ, საჭიროა, რომ თქვენი მიზანი და რისკისადმი ტოლერანტობის დონე განსაზღვროთ, შემდეგ კი ამ კრიტერიუმებთან შესაბამისი კომპანიები მოიძიოთ.

დივიდენდების ზრდის შესაძლებლობები

ზოგიერთი კომპანია ყოველწლიურად დივიდენდური სარგებლის ერთსა და იმავე დონეს ინარჩუნებს, მაგრამ თუ თქვენი მიზანი ისეთ კომპანიებში ინვესტირებაა, რომლებიც დივიდენდურ ანაზღაურებას ყოველწლიურად ზრდიან, მაშინ დივიდენდ არისტოკრატებსა და დივიდენდ მეფეებზე უნდა კონცენტრირდეთ.

დივიდენდ არისტოკრატები არიან კომპანიები, რომლებიც დივიდენდებს ყოველწლიურად სულ მცირე ზედიზედ 25 წლის განმავლობაში ზრდის. მაგალითისთვის, ასეთი კომპანიები არის:

• Chevron
• Cardinal Health
• Caterpillar

დივიდენდ მეფეები კი დივიდენდებს ყოველწლიურად სულ მცირე ზედიზედ 50 წლის განმავლობაში ზრდის. ასეთი კომპანიებია:

• Procter & Gamble
• Colgate-Palmolive
• Johnson & Johnson

გაზარდეთ თქვენი შემოსავალი მაშინაც კი, როდესაც გძინავთ

ვთქვათ, თქვენ ჩადეთ ინვესტიცია დივიდენდ არისტოკრატში, რომლის დივიდენდური ანაზღაურება ახლა ერთ აქციაზე $3.48-ს შეადგენს და კომპანია მიმდინარე წელს ამ მაჩვენებლის $3.65-მდე გაზრდა გეგმავს. შესაძლოა, ეს ძალიან დიდი რიცხვი არ იყოს, მაგრამ ბევრი აქციის დიდი ხნის განმავლობაში ფლობის შემთხვევაში, საქმე საკმაოდ დიდ შემოსავალთან გვაქვს.

თუ ამ კომპანიის 1,000 აქციას ფლობთ, შარშან $3,480-ს გამოიმუშავებდით. ამ წელს დივიდენდების ზრდა $3,650-ს მოგიტანთ. ეს იმას ნიშნავს, რომ ყოველგვარი ძალისხმევის გარეშე დამატებით $170-ის გამომუშავებას შეძლებთ.

წარმოიდგინეთ, რომ ამ დივიდენდურ ანაზღაურებას ყოველწლიურად მომდევნო 20 ან 30 წლის განმავლობაში იღებთ. თუ კომპანია დივიდენდური ანაზღაურებას გააგრძელებს, ამ პერიოდის განმავლობაში თქვენი შემოსავალიც ავტომატურად გაიზრდება.

მიუხედავად იმისა, რომ წარსული მაჩვენებლები მომავლის გარანტიას არასოდეს გვაძლევს, მაინც უფრო გონივრულია ისეთი კომპანიების არჩევა, რომლებსაც დივიდენდური ანაზღაურების გაზრდის დიდი გამოცდილება აქვს.

კომპანიები, რომლებიც დივიდენდებს ზრდის პორტფელის დივერსიფიკაციისთვის გამოიყენეთ

მზარდი დივიდენდების გადამხდელ კომპანიებზე ორიენტირება იმას არ ნიშნავს, რომ სხვა ტიპის აქციები და ინვესტიციები უნდა დაივიწყოთ. დივიდენდური აქციები, შესაძლოა, კარგად მოერგოს დივერსიფიცირებულ საინვესტიციო პორტფელს, რომელიც თქვენს მიზნებსა და რისკისადმი ტოლერანტობის დონეს შეესაბამება.

ჩაატარეთ კვლევა და დააკვირდით კომპანიებს, რომლებსაც დივიდენდების გაზრდის გამოცდილებას აქვს. ამ მცირე ზრდამ, შესაძლოა, გრძელვადიან პერსპექტივაში ყოველწლიურად ათასობით დამატებითი დოლარი მოგიტანოთ. საუკეთესო ნაწილი კი ისაა, რომ ამ ჯილდოს მოსაპოვებლად დამატებითი ძალისხმევის გაწევა არ გჭირდებათ.