ხშირად სიამოვნებით ვაკეთებთ იმას, რაც სამსახურის აღწერილობაში წერია და იმასაც, რასაც მენეჯერები ჩვენგან მოელიან. მეორე მხრივ, ხელფასსაც ვიღებთ და ვცხოვრობთ ცხოვრებით, რომელიც მოცემულ ეტაპზე სწორად მიგვაჩნია. თითქოს, სრულ კომფორტში ვართ, მაგრამ ერთ დღესაც კომპანიაში მოდის ახალი თანამშრომელი, რომელსაც მენეჯერი მეტ პასუხისმგებლობას აკისრებს. მიზეზი მარტივია: ის უფრო მნიშვნელოვანი შესაძლებლობებისა და მეტი ცოდნის მქონედ მიაჩნია.
ამ დროს ჩვენი კმაყოფილება და უსაფრთხოების გრძნობა სრულად იმსხვრევა. ვღელავთ, რომ აღარ დაგვაწინაურებენ. „კონკურენტი“ კი ისე წაგვართმევს ნებისმიერ შანსს, შეიძლება წასვლაც კი მოგვიწიოს. მოკლედ, ყველა სახის ნეგატიური აზრი გვატყდება თავს.
მსგავსი მოცემულობის თავიდან ასაცილებლად, საკუთარ თავთან ვიწყებთ საუბარს. ასე ვცდილობთ იმის აღმოჩენას, რა უნარ-ჩვევები და შესაძლებლობები აქვთ სხვებს, რაც ჩვენ გვაკლია. შესაბამისად, სათანადო კურსების გავლას ვიწყებთ, ვიღებთ სერტიფიკატებს და ვცდილობთ, კვალიფიკაცია საგრძნობლად გავზარდოთ. უბრალოდ, იმისა ნაცვლად, რომ ამან დაგვამშვიდოს, პირიქით, შფოთვა თუ ნეგატიური ფიქრები იმატებს.
სამწუხაროდ, ათი თანამშრომლიდან ცხრა აწყდება მსგავს გამოცდილებას. საქმე ისაა, რომ სანამ ყოველდღიური საქმიანობით ხართ დაკავებული და შესაბამის კომპენსაციასაც იღებთ, რაიმე ახლის სწავლა თუ უნარების განვითარება გავიწყდებათ. ამის თავიდან ასაცილებლად კი, აუცილებლად უნდა დაიწყოთ საკუთარ თავში ინვესტირება — ანუ მეტი დრო დაუთმოთ პროფესიულ განვითარებას, სწორად მიმართოთ ძალისხმევა და რესურსები პროგრესისკენ.
სტატიაში დამატებით რამდენიმე დამაჯერებელ მიზეზსაც გაგიზიარებთ, თუ რატომ უნდა დაიწყოთ საკუთარ თავში ინვესტირება დღესვე:
- პიროვნული ზრდა: საკუთარ თავში ინვესტირება ხელს უწყობს პიროვნულ ზრდას და საკუთარი თავის აღმოჩენას. ეს საშუალებას გაძლევთ, გახდეთ უფრო თვითშეგნებული, ამოიცნოთ თქვენი ძლიერი და სუსტი მხარეები და იმუშაოთ საკუთარი თავის გაუმჯობესებაზე.
- გაზრდილი ნდობა: ახალი უნარების, ცოდნისა და გამოცდილების შეძენისას, თქვენი თავდაჯერებულობაც იზრდება. შესაბამისად, უკეთეს გადაწყვეტილებებსაც იღებთ და ახალ გამოწვევებსაც თამამად ხვდებით.
- კარიერული წინსვლა: უწყვეტი სწავლა და უნარების განვითარება კარიერულ პერსპექტივებსაც ზრდის. ამან შეიძლება დამსაქმებლებისთვის უფრო ღირებულიც გაგხადოთ და ახალი შესაძლებლობები გაგიჩნდეთ.
- ადაპტაცია: დღევანდელ სწრაფ სამყაროში ადაპტაციისა და ახლის სწავლის უნარი გადამწყვეტია. საკუთარ თავში ინვესტიცია გეხმარებათ, იყოთ რელევანტური სწრაფად ცვალებად სამუშაო ბაზარზე.
- პიროვნული გამძლეობა: თქვენი პიროვნული უნარებისა და აზროვნების განვითარებამ შეიძლება უფრო გამძლე გახადოთ გამოწვევების წინაშე. ასე ვთქვათ, მეტი მზაობა გექნებათ გამოწვევებისა და წარუმატებლობისთვის.
- გაუმჯობესებული ურთიერთობები: თვითგანვითარება ხშირად გულისხმობს მუშაობას კომუნიკაციაზე, ემოციურ ინტელექტსა და ინტერპერსონალურ უნარებზე, რამაც შეიძლება გააძლიეროს თქვენი ურთიერთობა სხვებთან.
- ბედნიერება: საბოლოო ჯამში, საკუთარ თავში ინვესტირებამ შეიძლება უფრო ბედნიერი და სრულფასოვანი ცხოვრება მოგცეთ. როდესაც მუდმივად იზრდებით და მიჰყვებით ინტერესებს, უფრო მეტ სიამოვნებასა და სიხარულს განიცდით.
