ინფორმაციული მიკერძოება თავს იჩენს მაშინ, როდესაც ინდივიდის მიერ მოპოვებული ინფორმაცია ან მონაცემები არასწორად არის გაზომილი ან ჩაწერილი ისე, რომ ის ზუსტად აღარ ასახავს მასში არსებულ ფუნდამენტურ ჭეშმარიტებას. ეს მიკერძოება შეიძლება გამოწვეული იყოს მონაცემთა შეგროვებისას ან ინფორმაციის დამუშავებისას დაშვებული უბრალო შეცდომით, მიზანმიმართული დამახინჯებით ან ინფორმაციის გაფილტვრის ქვეცნობიერი ტენდენციით. ამ უკანასკნელის მიზანი არის საკუთარი საჭიროებების დაკმაყოფილება ან ადრე არსებულ შეხედულებებთან შესაბამისობა.
ინფორმაციულმა მიკერძოებულობამ შეიძლება მნიშვნელოვნად იმოქმედოს ინვესტორის გადაწყვეტილებაზე, რაც ინდივიდს საბოლოოდ უბრალოდ არასასურველ ან ძალიან სახიფათო შედეგამდე მიიყვანს. ეს იმიტომ ხდება, რომ ადამიანები ბუნებრივად მიდრეკილნი არიან დადასტურების მიკერძოების (როდესაც ვეძებთ და პრიორიტეტს ვანიჭებთ ინფორმაციას, რომელიც ჩვენს წინასწარ ჩამოყალიბებულ ცნებებს შეესაბამება) და უახლესი ინფორმაციის მიკერძოების (როდესაც ახალ, უფრო თვალსაჩინო ინფორმაციას საჭიროზე მეტი მნიშვნელობა ენიჭება) მიმართ.
სოციალური მედიის ეპოქაში განსაკუთრებით მნიშვნელოვანია ვიცოდეთ, რა სახის ინფორმაციას ვიღებთ და როგორ შეუძლიათ მათ საინვესტიციო გადაწყვეტილებების მიღებაში დახმარება ან ხელის შეშლა.
ინფორმაციული მიკერძოება და ინვესტირება
ინფორმაციულმა მიკერძოებამ შეიძლება ინვესტორები მიიყვანოს არასწორ გადაწყვეტილებებამდე, რომლებიც გაუმართავ მონაცემებს ეფუძნება. სოციალური მედიის ხელმისაწვდომობამ დიდი მოცულობის ინფორმაციაზე წვდომა ძალიან გააადვილა და ამ მოცემულობაში საინფორმაციო მიკერძოება განსაკუთრებით კრიტიკული საკითხია.
ინფორმაციულმა მიკერძოებამ შეიძლება ინვესტორის მიერ გადაწყვეტილების მიღების პროცესზე ნეგატიურად იმოქმედოს; მაგალითად, ინდივიდმა შეიძლება განსაკუთრებული მნიშვნელობა მიანიჭოს ერთ კონკრეტულ სიახლეს და კომპანიის მუშაობის უფრო ფართო კონტექსტს ან მთლიანად ბაზრის წარმადობას ნაკლები ყურადღება მიაქციოს. ასევე ინვესტორს შეუძლია მოიძიოს ინფორმაცია, რომელიც ადასტურებს მის წინასწარ შექმნილ შეხედულებებს კომპანიის ან ბაზრის შესახებ და გამორიცხავს საწინააღმდეგო მოსაზრებებს.
როგორ ავიცილოთ თავიდან ინფორმაციული მიკერძოება ინვესტირებაში?
შეზღუდეთ ფინანსური სიახლეებისა და სოციალური მედიის ზემოქმედება: მიუხედავად იმისა, რომ ინფორმირებულობა აუცილებელია, ფინანსურ სიახლეებსა და სოციალური მედიის პოსტებზე ზედმეტმა კონცენტრირებამ შეიძლება ინფორმაციული მიკერძოების რისკი გაზარდოს. სწორად და ობიექტურად შეარჩიეთ წყაროები, რომლებისგანაც ინფორმაციას იღებთ, ამასთან გამოყავით კონკრეტული დრო სიახლეების მონიტორინგისთვის.
საინფორმაციო წყაროების დივერსიფიკაცია: ინფორმაციის სხვადასხვა წყაროდან მიღება დაგეხმარებათ, შეამსუბუქოთ ნებისმიერი ინფორმაციის გავლენა თქვენს საერთო საინვესტიციო სტრატეგიაზე და შეინარჩუნოთ ბალანსი.
გადაწყვეტილებები ობიექტურ ანალიზზე დააფუძნეთ: ფოკუსირდით კომპანიის ძირითად ფინანსურ სიჯანსაღეზე, ბიზნეს პერსპექტივებზე და არა ბაზრის მოკლევადიან რყევებზე ან სიახლეებზე. გადაწყვეტილებების მიღებისას გაითვალისწინეთ თქვენი გრძელვადიანი საინვესტიციო მიზნები და მოერიდეთ ემოციებს, როგორებიც არის შიში ან სიხარბე.
მოიძიეთ რჩევები პროფესიონალებისგან: გაიარეთ კონსულტაცია ფინანსურ მრჩეველთან ან საინვესტიციო პროფესიონალთან, რომელიც დაგეხმარებათ, კარგად ინფორმირებული საინვესტიციო გადაწყვეტილებები მიიღოთ.
