დაბალანსებული საინვესტიციო სტრატეგია საინვესტიციო პორტფელში აქტივთა კლასებს რისკისა და მოგების დასაბალანსებლად აერთიანებს. როგორც წესი, დაბალანსებული პორტფელი აქციებსა და ობლიგაციებს მოიცავს, თანაბარი ან ოდნავ განსხვავებული განაწილებით, როგორიც არის, მაგალითად, 60% — აქციები და 40% —ობლიგაციები. დაბალანსებული პორტფელი ასევე შეიძლება მოიცავდეს მცირე მოცულობის ფულად სახსრებს ან ფულის ბაზრის ინსტრუმენტებს ლიკვიდურობის მიზნებისთვის.
დაბალანსებული საინვესტიციო სტრატეგიის გააზრება
საინვესტიციო პორტფელის დაკომპლექტების მრავალი განსხვავებული გზა არსებობს, რაც ინვესტორის პრეფერენციებსა და რისკისადმი ტოლერანტობაზეა დამოკიდებული.
სპექტრის ერთ ბოლოში არის სტრატეგიები, რომლებიც მიზნად ისახავს კაპიტალის შენარჩუნებას და მიმდინარე შემოსავლის მიღებას. ეს მიდგომა, როგორც წესი, მოიცავს უსაფრთხო, მაგრამ დაბალშემოსავლიან ინვესტიციებს, როგორებიც არის სადეპოზიტო სერტიფიკატები, მაღალ რეიტინგიანი ობლიგაციები, ფულის ბაზრის ინსტრუმენტები და ზოგიერთი ლურჯი ჩიპის აქცია, რომელიც დივიდენდებს იხდის. ასეთი სტრატეგიები მიზანშეწონილია ინვესტორებისთვის, რომლებიც ფოკუსირებულნი არიან მათ მფლობელობაში არსებული კაპიტალის შენარჩუნებაზე და მისი ზრდით ნაკლებად ინტერესდებიან.
მეორე მხარეს კი არის მიდგომები, რომლებიც ორიენტირებულია ზრდაზე. ეს უფრო „აგრესიული“ სტრატეგიები ზოგადად გულისხმობს აქციების უფრო მაღალ კონცენტრაციას, მათ შორის მცირე კაპიტალიზაციის მქონე კომპანიებში ინვესტირებას. თუ ამ სტრატეგიაში გათვალისწინებულია ფიქსირებული შემოსავლის მქონე ინსტრუმენტები, მათ შეიძლება ჰქონდეს დაბალი საკრედიტო რეიტინგი ან ნაკლები უსაფრთხოება, მაგრამ უფრო მაღალი სარგებელი. ზრდის სტრატეგიები შესაფერისია რისკისადმი მაღალი ტოლერანტობის მქონე ახალგაზრდა ინვესტორებისთვის, რომლებიც კომფორტულად იღებენ ხანმოკლე ცვალებადობას უკეთესი მოსალოდნელი გრძელვადიანი შემოსავლის სანაცვლოდ.
ინვესტორებს, რომლებიც ამ ორ ბანაკს შორის ხვდებიან, შეუძლიათ, დაბალანსებული საინვესტიციო სტრატეგია აირჩიონ. ეს მოიცავს კონსერვატიული და აგრესიული მიდგომების შერევას. მაგალითად, დაბალანსებული პორტფელი შეიძლება მოიცავდეს:
- დივიდენდის გადამხდელ ლურჯი ჩიპის აქციებს — 25%;
- მცირე კაპიტალიზაციის აქციებს — 25%;
- მაღალ რეიტინგიან სახელმწიფო ობლიგაციებს — 25%;
- მაღალ რეიტინგიან კორპორატიული ობლიგაციებს — 25%.
დაბალანსებული საინვესტიციო სტრატეგიის მიმდევარი ინვესტორები ფოკუსირებულნი არიან მოკრძალებულ ანაზღაურებაზე, კაპიტალის შენარჩუნების მაღალ ალბათობასთან ერთად.
დაბალანსებული ფონდები
დაბალანსებული ფონდი არის ერთობლივი საინვესტიციო ფონდი, რომელიც ერთ პორტფელში აერთიანებს როგორც აქციებს, ისე ობლიგაციებს და ფულის ბაზრის ინსტრუმენტებს. ზოგადად, ასეთი ფონდები ინარჩუნებს აქციებისა და ობლიგაციების შედარებით ფიქსირებულ ნაზავს, როგორიცაა, შესაბამისად 60/40. დაბალანსებული ერთობლივი საინვესტიციო ფონდების მფლობელობები ქმნის ბალანსს კაპიტალსა და ვალს შორის. მათი ამოცანა ზრდასა და შემოსავალს შორის ბალანსის დამყარებაში მდგომარეობს, რაც განაპირობებს სახელწოდებას — „დაბალანსებული ფონდი“.
დაბალანსებული ერთობლივი საინვესტიციო ფონდები შეეფერება ინვესტორებს, რომლებიც უსაფრთხოების, შემოსავლისა და კაპიტალის მოკრძალებული ზრდის ნაზავზე არიან ორიენტირებულნი.
