საინვესტიციო კარიერის განმავლობაში თქვენ აუცილებლად დაუშვებთ შეცდომებს, ამას გვერდს ვერ აუვლით. ცნობილმა ინვესტორმა – პიტერ ლინჩმა ერთხელ თქვა, რომ თუ 10-დან 6 აქციის სწორად შერჩევა შეგიძლიათ, მაშინ საქმეს თავს კარგად ართმევთ.
ინვესტირების გზაზე მრავალ დაბრკოლებას შეხვდებით და ეს სავსებით ნორმალურია. მაშინ რატომ უნდა ჩავდოთ ინვესტიცია ინდივიდუალურ აქციებში თუ შანსები ჩვენს წინააღმდეგ დიდია?
გამარჯვებული ინვესტიციები უფრო მნიშვნელოვანია ვიდრე დამარცხებულები
10-დან 6 სწორი არჩევანი – როგორ შეიძლება წარმატებას მიაღწიოთ თითქმის თანაბარი სწორი და არასწორი არჩევანის გაკეთებით? ადამიანებს მცდარი წარმოდგენა აქვთ, რომ გამარჯვებულ და დამარცხებულ აქციებს ინვესტიციებზე მსგავსი გავლენა აქვთ.
დავუშვათ შეიძინეთ კონკრეტული კომპანიის აქციები, რომელიც მოგვიანებით გაკოტრდა. ყველაზე მეტი რისი დაკარგვაც შეგიძლიათ არის ის ფული, რომელიც თავდაპირველად ჩადეთ, ეს არის თქვენი 100%-იანი ზარალი. თუმცა აქციის ფასი შეიძლება 100%-ზე მეტით გაიზარდოს, რაც იმას ნიშნავს, რომ ერთ გამარჯვებულს მრავალი დამარცხებულისგან მოტანილი ზარალის ანაზღაურება შეუძლია.
წარმოიდგინეთ, რომ 10 განსხვავებულ აქციას ყიდულობთ და ფლობთ ათწლეულის განმავლობაში. აქედან 9 აქციის ფასი ნულამდე ეცემა, თუმცა თქვენი მეათე აქციის ფასი 1000%-ით იზრდება. თქვენი აქციების 90%-ის ნულამდე დაცემა დამღუპველი იქნება, მაგრამ ათწლეულის ბოლოს მაინც გამოიმუშავებთ ფულს, რადგან ერთმა გამარჯვებულმა ყველა დამარცხებულის ზარალი აანაზღაურა.
გამარჯვებული აქციის არჩევის შანსები
ამ ყველაფრის გათვალისწინებით, ინვესტორის მიზანი გამარჯვებული აქციების პოვნაა, თუმცა რამდენად გავრცელებულია ეს განსაკუთრებული აქციები? Vanguard-მა შეისწავლა ყველა აქცია, რომელიც იყო Russell 3000 Index-ის ნაწილი 1987 დან 2017 წლამდე. ყველა აქციის დაახლოებით 47% დამარცხებულთა რიგებში იყო, რომლებიც არსებობის განმავლობაში უარყოფით მთლიან შემოსავალს აწარმოებდა. ფაქტობრივად, მედიანური აქციების მთლიანი შემოსავალი მხოლოდ 7%-ს შეადგენდა.
იმავდროულად, აქციების მხოლოდ 7%-მა გამოიმუშავა 1,000% ან მეტი მთლიანი შემოსავალი. სხვა სიტყვებით რომ ვთქვათ, ინდექსი ცუდი აქციების ნაკრები იყო, საფონდო ბირჟის ინდექსისთვის მოგების უმეტეს ნაწილს განსაკუთრებული აქციების მცირე ჯგუფი გამოიმუშავებდა.
რა არის წარმატებისთვის საჭირო?
ბევრი ინვესტორი საუბრობს ინვესტიციების დივერსიფიკაციის, როგორც თავდაცვითი სტრატეგიის შესახებ. რაც არ უნდა ჭკვიანი იყოთ ან რამდენ კვლევასაც არ უნდა ატარებდეთ, ინვესტიციისთვის ყოველთვის საჭიროა მცირე იღბალი. ძალიან ბევრი რამ შეიძლება არასწორად წარიმართოს – მატყუარა მენეჯმენტი, თაღლითობა, კონკურენცია, რეცესია და ა. შ. ბევრი მათგანის პროგნოზირება პრაქტიკულად შეუძლებელია.
მაგრამ დივერსიფიცირებული საინვესტიციო პორტფელი ნამდვილად ზრდის თქვენი წარმატების შანსებს. დაიმახსოვრეთ, რომ დიდი სიმდიდრის დასაგროვებლად საჭიროა მხოლოდ რამდენიმე გამარჯვებული ინვესტიცია.
ეს არ არის ფინანსური რჩევა. ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა, გამოიწვიოს არსებითი დანაკარგები, ისევე როგორც – მოგება. ამიტომ, დეტალურად უნდა გააანალიზოთ, რამდენად მისაღებია ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა, აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
