ფინანსურ თავისუფლებას სხვადასხვა ადამიანი განსხვავებულად აღიქვამს. ბევრი ჩვენგანისთვის, ფინანსური თავისუფლება ნიშნავს ფულის ქონას იმისთვის, რომ საბანკო ანგარიშზე ფიქრის გარეშე ვაკეთოთ ის, რაც გვსურს, გვქონდეს ფინანსური სტაბილურობა და სიმშვიდე, როდესაც საქმე ფულს ეხება.
იმის მიუხედავად, თუ როგორ აღიქვამთ ფინანსურ თავისუფლებას, ამ ნაბიჯების შესრულება თქვენი ფინანსური მიზნების მიღწევაში დაგეხმარებათ.
- გაიაზრეთ, სად მიდის თქვენი ფული
ბიუჯეტის ან ფულადი ნაკადების დაგეგმვა აუცილებელია თქვენი ხარჯებისა და დანაზოგების გასაკონტროლებლად. საბოლოო მიზანი, თითოეული ლარის, ხარჯებისა ან დანაზოგებისთვის კატეგორიის მინიჭებაა. უმჯობესია, თავიდანვე განსაზღვროთ, საით წავა თქვენი ფული, ნაცვლად იმისა, რომ შემდეგ დაიწყოთ ამის გარკვევა. საბედნიეროდ, ბიუჯეტის მართვის გასამარტივებლად მრავალი აპლიკაცია არსებობს. მათი საშუალებით თქვენ შეძლებთ ხარჯებს თვალყური ადვენოთ.
- მოერიდეთ ცხოვრების წესის ინფლაციას
როგორც წესი, როდესაც ადამიანები მეტ ფულს გამოიმუშავებენ, შესაბამისად უფრო მეტს ხარჯავენ. იმისთვის, რომ დარწმუნდეთ – დანაზოგები შემოსავლებს არ ჩამორჩება, ფული ლარებიდან პროცენტებში გადაიყვანეთ. მაგალითად, თუ თქვენ მიზნად დაისახავთ შემოსავლების 8% დაზოგოთ, დანაზოგები შემოსავლების მატებასთან ერთად გაიზრდება. ყოველ ჯერზე, როდესაც თქვენი შემოსავალი იმატებს, ავტომატურად გაზარდეთ თქვენს შემნახველ და საინვესტიციო ანგარიშებზე გადარიცხული თანხის მოცულობა. ყოველივე ამის შემდეგ, თუ თქვენს მიმდინარე ანგარიშზე დამატებით ფულს ვერ ხედავთ, შესაბამისად ვერაფერს დახარჯავთ.
- უმრავლესობას ნუ გაჰყვებით
კვლევები ცხადჰყოფს, რომ ინვესტორები მიდრეკილნი არიან იყიდონ ძვირად და გაყიდონ იაფად. საშუალო ინვესტორმა 2001 წლიდან 2020 წლამდე მხოლოდ 2.9%-იანი შემოსავალი მიიღო, მაშინ, როდესაც ამავე პერიოდში S&P 500-ის საშუალო 7.5% იყო. ემოციური ინვესტიციის დასაძლევად გამოიყენეთ ტექნიკა სახელწოდებით – „დოლარის საშუალო ღირებულება.“ ეს არის საინვესტიციო სტრატეგია, რომლის მიხედვითაც თქვენ ყოველკვირეულად, ყოველთვიურად ან ყოველ კვარტალში, გარკვეული თანხის ინვესტირებას ახორციელებთ. ეს ამცირებს იმის ალბათობას, რომ „ცხელი“ ტენდენციები, ბაზრის მოულოდნელი მოვლენები ან ცუდი ამბები თქვენს საინვესტიციო გადაწყვეტილებებს განაპირობებს.
- იყავით პროაქტიური პენსიაზე გასვლასთან დაკავშირებით
თქვენი საპენსიო გეგმის სრული სურათის განსაზღვრა შეიძლება დიდი გამოწვევა იყოს. თუ შესაძლებელია, თქვენი საპენსიო ანგარიშის შენატანები გაზარდეთ. გამოიკვლიეთ საინვესტიციო პროდუქტები, რათა დარწმუნდეთ, რომ ისინი თქვენთვის შესაფერისია. რეგულარულად გადახედეთ თქვენს ფინანსურ გეგმას, იმაში დასარწმუნებლად, რომ სწორ გზაზე დგახართ.
- ელოდეთ მოულოდნელს
საგანგებო სიტუაციის ან სამუშაოს შეწყვეტის შემთხვევისთვის იქონიეთ სარეზერვო ფონდი სამიდან ექვს თვემდე ცხოვრების ხარჯებით. წინააღმდეგ შემთხვევაში, შეიძლება საკრედიტო ბარათების გამოყენება მოგიწიოთ. ის, თუ რამდენი თვისთვის საკმარის თანხას გადაინახავთ, უნდა ეფუძნებოდეს თქვენი სამუშაოს ხანგრძლივობას, სამუშაო უსაფრთხოებასა და შემოსავლის სხვა წყაროებს.
- ნუ მისცემთ წარსულის შეცდომებს თქვენი პარალიზების უფლებას
თუ თქვენს წარსულში ცრუ წამოწყებები და დაბრკოლებები იყო, თქვენი ფინანსების ფორმირებაში კიდევ ერთი დარტყმა შეიძლება რთული იყოს. არ იდარდოთ წარსულის შეცდომებზე და ნუ ინერვიულებთ იმაზე, თუ რა უნდა გაგეკეთებინათ. ამის ნაცვლად, ისწავლეთ თქვენი წარსული შეცდომების მაგალითზე, დაგეგმეთ თქვენი მომავალი იმის მიხედვით, თუ სად ხართ ახლა და სად გსურთ წასვლა. ჭკვიანური ფინანსური გადაწყვეტილებების მისაღებად საუკეთესო დრო შეიძლება წარსულშიც იყო, მაგრამ მეორე საუკეთესო დრო სწორედ ახლაა. შეიმუშავეთ თქვენთვის კომფორტული გეგმა და მუდმივად გაზომეთ თქვენი პროგრესი.
