უორენ ბაფეტი მსოფლიოს ერთ-ერთი საუკეთესო ინვესტორია. როგორც Berkshire Hathaway-ის თავმჯდომარე და აღმასრულებელი დირექტორი, ის ათწლეულების განმავლობაში ყიდულობს აქციებს. ბაფეტის პირადი ქონება $110 მილიარდს აჭარბებს.
საბედნიეროდ, ლეგენდარული ინვესტორი საინვესტიციო საზოგადოებისთვის საკუთარი გამოცდილების გაზიარებას არ ერიდება. მიუხედავად იმისა, რომ ზოგი ადამიანის აზრით, ბაფეტს ბიზნესის ღირებულების აღმოჩენის უნიკალური ნიჭი გააჩნია, ახალბედა ინვესტორებისთვის მისი სტრატეგიის ზოგიერთი ასპექტის კოპირება საკმაოდ მარტივია. ამ სტატიაში სწორედ 4 ასეთ საინვესტიციო სტრატეგიას განვიხილავთ.
- ჩადეთ ინვესტიცია S&P 500-ში
2017 წელს მოცემულ ინტერვიუში ბაფეტმა საპენსიო ანგარიშის მქონეებს დაბალი საკომისიო ხარჯების მქონე S&P 500-ის საინდექსო ფონდებში თანმიმდევრული ინვესტირება ურჩია. მისი სიტყვებით, „ვფიქრობ, ეს არის ის, რაც თითქმის ყოველთვის ყველაზე ლოგიკურია“.
ამ ფონდებში ინვესტირება ერთ ღამეში მილიონერად ვერ გაქცევთ, თუმცა მათ, დროთა განმავლობაში, მყარი ზრდა გამოავლინეს. ისტორიულად, S&P 500, ინფლაციის გამოკლებით, ყოველწლიურად დაახლოებით 7%-ით იზრდება.
გაითვალისწინეთ, რომ ბაფეტი ხაზს უსვამს დაბალი საკომისიო დანახარჯების მქონე ფონდებში ინვესტირებას. მაგალითად, 0.03%-ის ტოლი ხარჯების კოეფიციენტი ნიშნავს, რომ ყოველწლიურად, ყოველი ინვესტირებული $10,000-სთვის თქვენ $3-ის გადახდა მოგიწევთ.
- ფოკუსირდით გრძელვადიან პერსპექტივაზე
თქვენ შეგიძლიათ ინვესტირებას მოგების სწრაფად ან დროთა განმავლობაში მისაღებად მიმართოთ. ბაფეტი ამ უკანასკნელ სტრატეგიას მიჰყვება. ლეგენდარული ინვესტორის თქმით, იგი უპირატესობას ანიჭებს პოზიციები სამუდამოდ შეინარჩუნოს.
ზოგიერთი აქცია ხანგრძლივი შენახვის პერიოდს სხვებზე უკეთ შეეფერება. ბაფეტს მოსწონს ჩამოყალიბებული ბიზნესები, რომელსაც სხვადასხვა ეკონომიკური კლიმატის პირობებში ოპერირების ძლიერი გამოცდილება აქვს. ლურჯი ჩიპის კომპანიების და S&P 500-ის აქციები ამ კრიტერიუმებს შეესაბამება.
- გაიხედეთ ბაზრის ტურბულენტობის მიღმა
ბაფეტი თავისი გრძელვადიანი მიდგომისადმი ერთგულია და ტურბულენტურ ბაზრებს თავისი გადაწყვეტილების შერყევის უფლებას არ აძლევს. როდესაც ბაფეტს ბაზრის ცვალებადობის მართვის შესახებ ჰკითხეს, მან უპასუხა: „ბაზარს ძალიან ახლოდან ნუ შეხედავთ“.
გახსოვდეთ, რომ თქვენ ინვესტიცია დიდი ძალაუფლების მქონე კომპანიებში ჩადეთ. სანამ ეს კომპანიები ძირეულად არ შეიცვლება, ლოდინი თქვენი საუკეთესო ნაბიჯია. საინვესტიციო პორტფელის უცვლელად შენარჩუნება მოგიტანთ სარგებელს, როგორც კი ვარდნა აღმასვლით შეიცვლება.
- ნუ მიჰყვებით მასებს
როგორც ცნობილია, უორენ ბაფეტმა თავისი საინვესტიციო მიზანი ამ სახით ჩამოაყალიბა: „იყავი ფრთხილად, როდესაც სხვები ხარბები არიან და იყავი ხარბი მაშინ, როდესაც სხვებს ეშინიათ“. სხვა სიტყვებით რომ ვთქვათ, ფრთხილად იყავით მაშინ, როდესაც ყველა აქციებს ყიდულობს და ეძებეთ შესაძლებლობები მაშინ, როცა აქციები მასიურად იყიდება.
ბაფეტისთვის შესაძლებლობა ხშირად კარგი აქციების დაბალ ფასებში შეძენას ნიშნავს. იგი სწორედ ასე მოიქცა 2022 წლის პირველ კვარტალში. მაშინ, როდესაც სხვა ინვესტორები ტექნოლოგიურ აქციებს ყიდდნენ, ბაფეტმა Apple-ის 3.7 მილიონი აქცია შეიძინა.
უორენ ბაფეტის მსგავსად ინვესტირება
ბაფეტი უპირატესობას მსხვილ კომპანიებს და ხანგრძლივ, უწყვეტ პერიოდებს ანიჭებს. ასევე, მას ბაზრის გაბატონებული განწყობის წინააღმდეგ მოქმედება უყვარს. მიუხედავად იმისა, რომ ეს მეთოდები გამძლეობას მოითხოვს, მათი შესრულება ნებისმიერი ინვესტორისთვის საკმარისად მარტივია.
ბაფეტის უმარტივესი ტაქტიკის დანერგვის შემდეგ, შეგიძლიათ დროთა განმავლობაში თქვენი მოგების გამოვლენას დაელოდოთ.
