უორენ ბაფეტს მრავალი ადამიანი ყველაზე დიდ ინვესტორად მიიჩნევს. ძნელია ამ აზრს შეეკამათო, როდესაც მისი კარიერის განმავლობაში უწყვეტ წარმატებას ხედავ.
ბაფეტის საინვესტიციო წარმატებაში ერთ-ერთი საუკეთესო ფაქტორი ის არის, რომ ის მიჰყვება მარტივ პრინციპებს, რომელთა გამოყენება დამწყებ ინვესტორებსაც კი შეუძლიათ. ამ სტატიაში მოცემულია სამი გზა, რომელიც დაგეხმარებათ, რომ bear market-ს გაუმკლავდეთ ისე, როგორც ამას ომაჰას ორაკული (ასე უწოდებენ ბაფეტს) აკეთებს.
- გამოიყენეთ ეს როგორც ქაოსში ღირებულების პოვნის შანსი
ირონიულია, მაგრამ, არასტაბილურობა საფონდო ბირჟაზე ერთ-ერთი ყველაზე სტაბილური რამ არის. იმის გამო, რომ bear market-ის დროს აქციების ფასები მცირდება, თქვენი საინვესტიციო პორტფელის ღირებულების შემცირებამ, შესაძლოა, შეგაშინოთ. თუმცა ერთი მნიშვნელოვანი რამ უნდა გახსოვდეთ: bear market გარდაუვალია. ისტორიულად, ეს მოვლენა ყოველ ოთხ წელიწადში ერთხელ ხდება და არ არსებობს საფუძველი ვიფიქროთ, რომ ეს რეალობა მომავალში შეიცვლება.
ბაფეტი მუდამ მიზნად ისახავს ჩადოს ინვესტიციები მაშინ, როდესაც აქციების ფასები მათ რეალურ ღირებულებაზე უფრო შემცირებულია. იმის ნაცვლად, რომ bear market-ის შეგეშინდეთ, შეგიძლიათ ეს მოვლენა განიხილოთ, როგორც ხარისხიანი აქციების დაბალ ფასად შეძენის შანსი.
როგორც ბაფეტმა ერთხელ თქვა: „შესაძლებლობა იშვიათად მოდის. როცა ოქრო წვიმს, გამოიყენე სათლი და არა სათითე.” სხვა სიტყვებით რომ ვთქვათ, bear market-ის შემთხვევაში თქვენი საყვარელი აქციები მკვეთრად გაიაფდება და ეს შანსი თქვენს სასარგებლოდ უნდა გამოიყენოთ.
- ნუ მიჰყვებით მასებს
ბაფეტი ამბობს, რომ ინვესტორები ფრთხილად უნდა იყვნენ მაშინ, როდესაც სხვები ხარბები არიან და უნდა გამოიჩინონ სიხარბე მაშინ, როდესაც სხვებს ეშინიათ. ზოგადად, bear market ინვესტორების შიშზე მიანიშნებს. როდესაც ინვესტორები პანიკაში არიან, აქციებს ყიდიან და ამით ფასები კიდევ უფრო მცირდება. თუ თქვენც ასე მოიქცევით, შესაძლოა, მომავალში თქვენ მიერ გაყიდული აქციების უფრო ძვირად ყიდვა მოგიწიოთ.
- ორიენტირდით გრძელვადიან პერსპექტივაზე
ინვესტირების დროს პრიორიტეტული ყოველთვის თქვენი გრძელვადიანი ინტერესები უნდა იყოს. სამწუხაროდ, ადვილია ემოციებს აჰყვეთ და მიიღოთ მოკლევადიანი გადაწყვეტილებები, რომლებმაც, შესაძლოა, მომავალში ძალიან დაგაზარალოთ. თუ ნამდვილად გჯერათ თქვენი ინვესტიციების, ფასების მოკლევადიან რყევას არ უნდა მისცეთ უფლება, რომ თქვენს გადაწყვეტილებაზე იმოქმედოს, თუ თქვენ მიერ არჩეული კომპანიის ბიზნესში არსებითად არაფერი შეცვლილა.
ბაფეტის აზრები გრძელვადიან პერსპექტივაში ინვესტირების შესახებ, შეიძლება, მისი ერთ-ერთი გამონათქვამით შეჯამდეს: „თუ მზად არ ხართ, რომ აქციას 10 წლის განმავლობაში ფლობდეთ, მაშინ მისი 10 წუთით ფლობაზეც არ იფიქროთ.“ ეს იმას ნიშნავს, რომ თუ ინვესტიციას ახორციელებთ, ეს გრძელვადიანი პერსპექტივის გათვალისწინებით უნდა გააკეთოთ.
მთლიან სურათს თუ შევხედავთ, ვნახავთ, რომ bear ბაზრები მოკლევადიანი მოვლენებია, ამიტომ ნუ მისცემთ მათ უფლებას, რომ თქვენი გრძელვადიანი გეგმიდან გადახვევისკენ გიბიძგოთ.
