დივერსიფიკაცია საზრიანი ინვესტირების ერთ-ერთი ქვაკუთხედია. ფულის გადანაწილება ამცირებს მისი დაკარგვის რისკს და ეს გადამწყვეტია, როდესაც საქმე თქვენი ცხოვრებისთვის მნიშვნელოვან დანაზოგებს ეხება.
თუმცა დივერსიფიკაცია, შეიძლება, იმაზე ბევრად რთული იყოს, ვიდრე ადამიანების უმეტესობას წარმოუდგენია. თუ ინვესტირების საქმეში ახალი ხართ, თქვენთვის ამ სტატიაში მოცემულია სამ რამ, რაც უნდა გახსოვდეთ მაშინ, როდესაც ფულის დაბანდებას გადაწყვეტთ.
- სხვადასხვა კომპანიებში ინვესტირება არ არის საკმარისი
შესაძლოა, რამდენიმე ტექნოლოგიურ გიგანტში ინვესტირება მაცდურ შესაძლებლობად ჩანდეს, მაგრამ რეალურად ეს საშიში საინვესტიციო სტრატეგიაა. ტექნოლოგიური ინდუსტრიისთვის აღმავალ პერიოდში მშვენიერ მოგებას მიიღებთ, მაგრამ თუ მარეგულირებელი ცვლილება ან რომელიმე სხვა გარემოება ამ კომპანიებზე ნეგატიურად იმოქმედებს, თქვენმა საინვესტიციო პორტფელმა, შეიძლება, ძალიან იზარალოს მაშინაც კი, თუ ერთზე მეტი კომპანიის აქციების მფლობელი იქნებით.
ფული რამდენიმე სექტორზე უნდა გადაანაწილოთ, თუ ზარალის რისკის შემცირება გსურთ. შესაძლებელია ბაზრის კრახის დროს თქვენი რომელიმე ინვესტიცია შემცირდეს, მაგრამ ამ მდგომარეობის გასაძლებად უკეთეს პოზიციაში იქნებით, რადგან მთელი იმედები ერთი სექტორის ეფექტურობაზე არ გექნებათ დამყარებული.
- საინდექსო ფონდებმა, შესაძლოა, დივერსიფიკაციის საკმარისი დონით ვერ უზრუნველგყოთ
საინდექსო ფონდი, დივერსიფიკაციის მიზნით დამწყებთათვის შესანიშნავი საშუალებაა, მაგრამ ეს, შეიძლება, საკმარისი არ იყოს. ასეთი ფონდები ათობით აქციისგან შემდგარი პაკეტებია და საბაზრო ინდექსის მუშაობის იმიტაციისთვის არის შექმნილი. ისინი არა მხოლოდ მარტივი, არამედ ერთ-ერთი ყველაზე ხელმისაწვდომი საინვესტიციო საშუალებაა.
თუმცა, მაგალითად, თუ ინვესტიციას S&P 500-ის საინდექსო ფონდში დებთ, თქვენი ფული მთლიანად აშშ-ში დაფუძნებული უმსხვილესი კომპანიების აქციებში ბანდდება. თუ აშშ-ის ეკონომიკა დაზარალდება, თქვენ მიერ განცდილი ზარალი, სავარაუდოდ, დიდი იქნება.
ამ რისკის თავიდან ასარიდებლად, მნიშვნელოვანია თქვენი პორტფელი გეოგრაფიული თვალსაზრისითაც დივერსიფიცირებული იყოს.
- საინვესტიციო პორტფელის ზედმეტად დივერსიფიცირებაც შესაძლებელია
დივერსიფიკაცია პორტფელის არასტაბილურობას ამცირებს, მაგრამ ამას თქვენი შემოსავლების შემცირებაც შეუძლია. მიუხედავად იმისა, რომ არ არსებობს რაიმე მკაფიო კრიტიკული წერტილი, რომელიც ზედმეტ დივერსიფიკაციაზე მიგანიშნებთ, რაღაც მომენტში, კიდევ ერთ აქციაში ინვესტირება, რომლის შედეგადაც რისკის უმნიშვნელოდ შემცირებას იღებთ, არ ღირს.
საჭირო არ არის 1,000 აქციაში ინვესტირება იმისთვის, რომ თქვენი პორტფელი სათანადოდ დივერსიფიცირებული იყოს. ადამიანების უმეტესობა არ აქვს იმდენი დრო, რომ ამ რაოდენობის კომპანიები საფუძვლიანად გამოიკვლიოს. იდეალურ შემთხვევაში, თქვენი ფული მინიმუმ 25 სხვადასხვა კომპანიაზე უნდა გადაანაწილოთ, მაგრამ გადაჭარბება საჭირო არ არის.
როდესაც საინდექსო ფონდში დებთ ინვესტიციას, შეეცადეთ ისეთი ფონდები აირჩიოთ, რომლებიც განსხვავებული აქციებისგან შედგება. დარწმუნდით, რომ ხელთ სექტორების კარგი ნაზავი გაქვთ.
ყველა ინვესტორის საინვესტიციო პორტფელი განსხვავებულია, მაგრამ ეს პრინციპები ყველასთვის მოქმედებს. გამოყავით დრო, რომ თქვენს პორტფელს გადახედოთ, საჭიროებისამებრ გაყიდოთ და იყიდოთ პოზიციები იქამდე, სანამ დივერსიფიკაციას არ მიაღწევთ. არ დაგავიწყდეთ პორტფელის პერიოდულად გადაბალანსებაც, რათა დარწმუნდეთ, რომ, დროთა განმავლობაში, დივერსიფიკაციის სათანადო დონეს ინარჩუნებთ.
ეს არ არის ფინანსური რჩევა. ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა, გამოიწვიოს არსებითი დანაკარგები, ისევე როგორც – მოგება. ამიტომ, დეტალურად უნდა გააანალიზოთ, რამდენად მისაღებია ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა, აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
