ამ ეტაპზე მტკივნეულად ნათელია, რომ აქციები გაფართოებულ ვარდნაშია. გასულ კვირას S&P 500 ინდექსი bear market-ის ტერიტორიაზე აღმოჩნდა. სხვა ძირითადი ინდექსები წლის დასაწყისიდან დღემდე, ასევე მნიშვნელოვნად შემცირდა.
თქვენი საინვესტიციო პორტფელის გაუთავებლად შემოწმება ახლა ნამდვილად არ არის კარგი იდეა. ეს თქვენს ფსიქოლოგიურ მდგომარეობაზე ძალიან ცუდად იმოქმედებს და, შესაძლოა, პანიკური გაყიდვებისკენ გიბიძგოთ, რის შედეგადაც გაანაღდებთ ზარალს, რომლის თავიდან აცილებაც, სხვა შემთხვევაში, შესაძლებელი იქნებოდა.
საფონდო ბირჟის ამჟამინდელი მდგომარეობის გათვალისწინებით, არის გარკვეული ნაბიჯები, რომელთა გადადგმაც ახლა ღირს. ჩვენ სწორედ ამ საკითხს შევეხებით.
- შეაფასეთ თქვენი დანაზოგი
საფონდო ბირჟის ვარდნის დროს ფულს მხოლოდ იმ შემთხვევაში დაკარგავთ, თუ თქვენს პოზიციებს შემცირებულ ფასად გაყიდით. ადეკვატური ფულადი რეზერვების ქონამ, შესაძლოა, ეს ნაბიჯი თავიდან აგაცილოთ.
ამიტომ, შეამოწმეთ თქვენი საგანგებო ფონდი და დარწმუნდით, რომ ის საიმედოა. არ დაგავიწყდეთ, რომ ახლა, ინფლაციის გამო, ცხოვრების ხარჯები გაიზარდა და თუ ადრე კონკრეტული თანხა 6 თვის ხარჯების დასაფარად საკმარისი იყო ეს რეალობა შეიცვალა და ამ ვადისთვის საკმარისი რეზერვის შესაქმნელად მეტი ფული დაგჭირდებათ.
თუ თქვენი დაზოგვის დონით კმაყოფილი არ ხართ, შეეცადეთ, რომ უახლოეს მომავალში საგანგებო ფონდი გაზარდოთ. არავინ იცის, თუ რამდენ ხანს გაგრძელდება bear market, მაგრამ მნიშვნელოვანია, რომ უარესი სცენარისთვის მზად იყოთ.
- შეადგინეთ იმ აქციების სია, რომელთა შეძენაც გსურთ
შესაძლოა, bear market შემაშფოთებელი იყოს, მაგრამ მას ასევე შეუძლია შესყიდვის შესანიშნავი შესაძლებლობა შექმნას. სწორედ ამიტომ, ახლა კარგი დროა, რომ სასურველი აქციების სია შეადგინოთ, დაიწყოთ ფულის გამოყოფა და შეიძინოთ ისინი, სანამ ფასები შემცირებულია.
რა თქმა უნდა, აუცილებელი არ არის ინდივიდუალური აქციების შეძენა, თუ საინდექსო ფონდებში ინვესტირება თქვენთვის უფრო კომფორტულია, მაგრამ თუ ინდივიდუალური აქციების ყიდვით ხართ დაინტერესებული, თქვენი დრო და ენერგია ბიზნესის კვლევაზე დახარჯეთ, რათა შესაფერისი ინვესტიცია შეარჩიოთ.
- გაარკვიეთ, გჭირდებათ თუ არა რაიმე ცხოვრებისეული გეგმის შეცვლა
თუ თქვენი საინვესტიციო პორტფელის გამოყენებას უახლოესი მომავლის განმავლობაში არ აპირებთ, მაშინ არსებული მდგომარეობის გამო პანიკა უადგილოა. მაგრამ, შეიძლება, გარკვეული გადაფასება დაგჭირდეთ, თუ პენსიაზე გასვლა რამდენიმე წელიწადში აპირებდით და ეს მიზანი თქვენს პორტფელზე დიდად არის დამოკიდებული.
რა თქმა უნდა, ამჟამინდელი ბაზრის ვარდნა, შესაძლოა, ხანმოკლე აღმოჩნდეს, მაგრამ რადგან ვერ ვიწინასწარმეტყველებთ, თუ როგორ განვითარდება მოვლენები, ჭკვიანური იქნება, რომ ვარიანტების განხილვას გარკვეული დრო დაუთმოთ, თუ დიდი გეგმების კორექტირებაა საჭირო.
დრო ჭკვიანურად გამოიყენეთ
აქციების ფასების შემცირების პერიოდში საინვესტიციო პორტფელის გამუდმებით შემოწმება, რა თქმა უნდა, დროის ხარჯვის საუკეთესო გზა არ არის და ამას თქვენი სტრესის დონის მნიშვნელოვნად ამაღლება შეუძლია. ნაცვლად ამისა, ზემოთ ჩამოთვლილი ნაბიჯების შერსულებით დროის პროდუქტიულად გამოყენებას შეძლებთ.
