რას ნიშნავს პორტფელის ბრუნვა?

პორტფელის ბრუნვა არის საზომი იმისა, თუ რამდენად ხშირად ყიდულობენ და ყიდიან ფონდის აქტივებს მენეჯერები. ეს მაჩვენებელი გამოითვლება კონკრეტულ პერიოდში შეძენილი ან გაყიდული ფასიანი ქაღალდების მთლიანი ოდენობის (რომელიც უფრო ნაკლები იქნება) ფონდის მთლიან წმინდა აქტივების ღირებულებასთან (NAV) შეფარდებით. როგორც წესი, პორტფელის ბრუნვის გამოთვლა 12-თვიანი პერიოდისთვის ხდება.

პორტფელის ბრუნვის გააზრება

პორტფელის ბრუნვას ყურადღება უნდა მიაქციოს ინვესტორმა, სანამ კონკრეტულ ურთიერთდახმარების ფონდში ან მსგავს ფინანსურ ინსტრუმენტში ინვესტირებას გადაწყვეტს. ეს მაჩვენებელი მნიშვნელოვანია იქიდან გამომდინარე, რომ უფრო მაღალი ბრუნვის მქონე ფონდი მეტი ტრანზაქციის ხარჯებით ხასიათდება. გარდა იმ შემთხვევისა, როდესაც პორტფელის რეგულარულად კორექცია არ მოიტანს სარგებელს, რომელიც დამატებითი ტრანზაქციის ხარჯებს აანაზღაურებს, ნაკლებად აქტიურმა სავაჭრო მოქმედებებმა შეიძლება უფრო მაღალი შემოსავლები გამოიწვიოს.

გარდა ამისა, ფონდის ინვესტორებმა უნდა გაითვალისწინონ, რომ ტრანზაქციის საბროკერო საკომისიო ხარჯები არ არის გათვალისწინებული ფონდის საოპერაციო ხარჯების კოეფიციენტის გამოთვლაში. შესაბამისად, მაღალი ბრუნვის მქონე პორტფელებში ეს შეიძლება იყოს მნიშვნელოვანი დამატებითი ხარჯი, რომელიც ინვესტიციის ანაზღაურებას ამცირებს.

მართული ფონდები vs „არამართული“ ფონდები

დებატები გრძელდება იმის შესახებ, თუ რომელი საინვესტიციო ინსტრუმენტი იძლევა უკეთეს შედეგს არამართული ფონდები, როგორიც არის საინდექსო ფონდები, თუ — მართული ფონდები. S&P Dow Jones Indices, რომელიც აქვეყნებს რეგულარულ კვლევას იმის შესახებ, თუ როგორი წარმადობით ხასიათდება აქტიურად მართული ფონდები S&P 500 ინდექსთან შედარებით, ამტკიცებს, რომ მსხვილი კაპიტალიზაციის აქტიური ფონდების 75%-მა, ხუთწლიან პერიოდში 2020 წლის 31 დეკემბრამდე, S&P 500-ზე დაბალი შედეგები აჩვენა.

ამავდროულად, 2015 წელს Morningstar-ის ცალკეულმა კვლევამ დაასკვნა, რომ 10-წლიანი პერიოდის განმავლობაში, რომელიც 2014 წლის 31 დეკემბერს მთავრდება, შემთხვევების დაახლოებით 68%-ში საინდექსო ფონდების წარმადობა მსხვილი კომპანიების მზარდი ფონდების შედეგებს აჭარბებდა.

არამართულ ფონდებს ტრადიციულად პორტფელის ბრუნვის უფრო დაბალი მაჩვენებელი ახასიათებს. ფონდები, როგორიცაა Vanguard 500 Index Fund იმეორებს S&P 500 ინდექსის წარმადობას და მისი შემადგენელი კომპონენტები იშვიათად იცვლება. ფონდის პორტფელის ბრუნვის მაჩვენებელი 2018-2020 წლებში მხოლოდ 4%-ს შეადგენდა, მინიმალური სავაჭრო და ტრანზაქციის საკომისიოებით, რაც დაბალი ხარჯების კოეფიციენტების შენარჩუნებას უწყობს ხელს.

ზოგიერთი ინვესტორი ნებისმიერ ფასად გაურბის მაღალი საკომისიოების მქონე ფონდებში ინვესტირებას. არსებობს შესაძლებლობა, რომ ამით მათ საკმაოდ მნიშვნელოვანი შემოსავალი გაუშვან ხელიდან. ყველა აქტიური ფონდი ერთნაირი არ არის და არსებობს გამონაკლისი ფონდები, რომლებსაც ფართო ბაზრის შედეგების გადაჭარბების საკმაოდ დიდი ისტორია გააჩნია.

ხშირად, ყველაზე წარმატებული აქტიური ფონდის მენეჯერები არიან ისინი, ვინც ხარჯებს პორტფელში მინიმალური ცვლილებების შეტანით ამცირებენ და ინვესტიციების უმეტესობას გრძელვადიან პერსპექტივაში ინარჩუნებენ. თუმცა, ასევე არსებობს შემთხვევები, როდესაც აგრესიული მენეჯერები რეგულარულად აკორექტირებენ პორტფელს და გაზრდილ ხარჯებს მაღალი ანაზღაურებებით აბათილებენ.

პორტფელის ბრუნვის მაგალითი

თუ წლის დასაწყისში პორტფელის ღირებულება $10,000-ს შეადგენს, ხოლო წლის ბოლოს — $12,000-ს, მაშინ მისი NAV-ის მისაღებად ეს ორი მაჩვენებელი უნდა შევკრიბოთ და 2-ზე გავყოთ — ($10,000 + $12,000)/2 = $11,000. შემდეგ კი დავუშვათ, რომ სხვადასხვა შესყიდვები ჯამმა შეადგინა $1,000, ხოლო გაყიდვების ჯამურმა მაჩვენებელმა — $500. ბოლოს კი ამ ორიდან უფრო მცირე თანხა NAV-თან უნდა შევაფარდოთ.

მოცემულ შემთხვევაში უფრო მცირე არის გაყიდვების ჯამი. შესაბამისად, პორტფელის ბრუნვის გამოსათვლელად $500 უნდა გავყოთ $11,000-ზე. გამოვა, რომ მოცემულ მაგალითში პორტფელის ბრუნვა 4.54%-ს უდრის.