Dow Jones Industrial Average (DJIA) არის საფონდო ბირჟის ინდექსი, რომელიც მოიცავს 30 ლურჯი ჩიპის კომპანიას, რომლებიც NYSE-სა და Nasdaq-ზე მიმოიქცევა. ის ხშირად გამოიყენება, როგორც აშშ-ის საფონდო ბირჟისა და უფრო ფართო ეკონომიკის სიჯანსაღის ინდიკატორი.
DJIA, რომელსაც ხშირად უბრალოდ „Dow”-ს უწოდებენ, არის სიდიდით მეორე აშშ-ის საფონდო ბირჟის ინდექსი. ეს ინდექსი 1896 წლის 26 მაისს ჩარლზ დოუმ და ედუარდ ჯონსმა დააპროექტეს, როგორც აშშ-ის ეკონომიკის ინდიკატორი. იმ დროს ინდექსი მოიცავდა 12 აქციას, ძირითადად ინდუსტრიული სექტორიდან, რომელიც ეკონომიკის ზრდის ტემპთან იყო დაკავშირებული.
დაარსების დღიდან Dow ადაპტირდა და გაიზარდა ცვალებადი ეკონომიკის კომპენსაციისთვის. DJIA-ის თანამედროვე ვარიანტი მოიცავს 30 ლურჯი ჩიპის აქციას ყველა ინდუსტრიიდან, გარდა კომუნალური და სატრანსპორტო მომსახურებისა (ისინი იზომება სხვა ინდექსებით, როგორიც არის Dow Jones Transportation Average).
როგორ გამოითვლება DJIA?
Dow მარტივი (არითმეტიკული) საშუალოდან შეწონილ მეთოდზე გადავიდა. ამჟამად ინდექსი გამოითვლება 30 აქციის ფასების ჯამის Dow-ის გამყოფთან (Dow divisor) შეფარდებით. Dow-ის გამყოფი არის მაჩვენებელი, რომელიც გამოიყენება Dow Jones Industrial Average-ის ნორმალიზებისთვის. ის რეგულარულ განახლებას ექვემდებარება იმის უზრუნველსაყოფად, რომ ბაზრის სტრუქტურულმა ცვლილებებმა DJIA-ის, როგორც საორიენტაციო ინდექსის ვალიდობაზე გავლენა არ იქონიოს. მაგალითად, Dow-ის გამყოფი შეიძლება შეიცვალოს აქციების დაყოფის, დივიდენდების შეცვლის ან გადახდის და სხვა მოვლენების საპასუხოდ.
ისევე, როგორც S&P 500, Dow არ არის სტაგნაციური ინდექსი. კომპონენტები (კომპანიები) შეიძლება შეიცვალოს, როდესაც ისინი:
- განიცდის მნიშვნელოვან ფინანსურ ინციდენტებს, როგორიც არის საბაზრო კაპიტალიზაციის დაკარგვა
- მიმდინარე ეკონომიკური ტენდენციების მიმართ ნაკლებად რელევანტური ხდება
- თავის სექტორში ნაკლებად გავლენიანი ხდება
უახლესი ცვლილება მოხდა 2020 წელს, როდესაც ინდექსს გამოეთიშა ExxonMobil, Pfizer და Raytheon Technologies. ეს საკულტო სახელები კი Salesforce-მა, Amgen-მა და Honeywell-მა ჩაანაცვლა.
რას ნიშნავს ეს თქვენთვის?
DJIA-ის მრავალი ცვლილების და ადაპტირების შედეგად, ამ ინდექსმა შეძლო აშშ-ის ეკონომიკის მრავალფეროვნად ასახვა. ბევრი მიიჩნევს, რომ Dow, აშშ-ის საფონდო ბირჟისთვის და, შესაბამისად, ეკონომიკისთვის, გადამწყვეტი მაჩვენებელია. ინვესტორები ხშირად ეყრდნობიან Dow-ს, როგორც:
- საკუთარი პორტფელის წარმადობის საზომს
- ბაზრის მდგომარეობის მონიტორინგისა და ტენდენციების იდენტიფიცირების მეთოდს
- საინვესტიციო ტენდენციებისა და კორელაციების შესახებ ისტორიულ ჩანაწერს
- ლურჯი ჩიპის კომპანიების გამოყენებით, ავტომატური დივერსიფიკაციის მოპოვების გზას
Dow-ის შეზღუდვები
თუმცა, Dow-ს რამდენიმე შეზღუდვა აქვს. მაგალითად, ზოგიერთი ინვესტორი თვლის, რომ 30 აქცია ძალიან ცოტაა საფონდო ბირჟის ზუსტად წარმოსაჩენად (ცნობისთვის, მხოლოდ აშშ-ში 4000-ზე მეტი საჯარო კომპანიაა). სხვები აღნიშნავენ, რომ ფასების მიხედვით შეწონილი ინდექსები უპირატესობას ანიჭებს კომპანიებს, რომლებიც აქციების მაღალი ფასით ხასიათდება და არა დიდი საბაზრო კაპიტალიზაციით.
თქვენ არ შეგიძლიათ DJIA-ში პირდაპირ ინვესტირება. თუმცა შეგიძლიათ ინდექსის კომპონენტებზე მარტივად მიიღოთ წვდომა, თუ:
- იმ კომპანიების აქციებს, რომელსაც Dow მოიცავს, ინდივიდუალურად შეიძენთ
- ინვესტიციას ჩადებთ Dow-ზე ორიენტირებულ ურთიერთდახმარების ფონდში ან გაცვლით სავაჭრო ფონდში (ETF)
- დაიწყებთ Dow-ის ოფციონებით ან ფიუჩერსული კონტრაქტებით ვაჭრობას (გაითვალისწინეთ, რომ ისინი, როგორც წესი, განიხილება უფრო სარისკო მოწინავე ინსტრუმენტებად, რომლებიც გამოცდილ ინვესტორებს შეეფერება)
საბოლოო ჯამში, დამწყები ინვესტორებისთვის, რომლებსაც სურთ თავიანთ პორტფელებში დიდი კაპიტალიზაციის მქონე აქციები დაამატონ, DJIA დასაწყებად შესანიშნავი ადგილია.
