დღევანდელი ამბავი არის ალეგორია ინვესტიციების შესახებ. მნიშვნელოვანია გავიაზროთ, რომ ინვესტირება ბევრად ფართო მცნებაა, ვიდრე მხოლოდ უძრავი ქონების ყიდვა-გაყიდვა ან თუნდაც საფონდო ბირჟაზე აქციების შეძენა. ინვესტირება ჩვენი ცხოვრების მრავალ ასპექტს მოიცავს, მიუხედავად იმისა, ვაცნობიერებთ, თუ არა ამას. ახლა კი მოდით, დავიწყოთ.
ერთ ფერმერს მდიდარმა ადამიანმა ხბო აჩუქა. იმ იმედით, რომ ეს ხბო უკეთესი ცხოვრების შექმნაში დაეხმარებოდა, ფერმერი მას უვლიდა. თუმცა ცხოველის ზრდასთან ერთად ფერმერის ხარჯებიც გაიზარდა.
ერთ დღეს მან თქვა: „ვერ დაველოდები, სანამ ეს ხბო ხარი გახდება. გავყიდი მას და ვიყიდი რამდენიმე ცხვარს, რომელთა მოვლაც უფრო ადვილი და იაფია.“ ასეც მოიქცა.
რამდენიმე თვის შემდეგ ფერმერი მიხვდა, რომ ცხვრის მოშენება არც ისე ადვილი ყოფილა, როგორც ფიქრობდა.
ასე რომ, მან თქვა: „ცხვრების მოსაშენებლად დიდი დროა საჭირო, სჯობს ისინი გავყიდო და ვიყიდო ქათმები, რომლებიც ყოველ დღე კვერცხებს დადებენ“. ასეც მოიქცა.
გეგმამ ძალიან კარგად იმუშავა, კვერცხების გაყიდვით ფერმერი ფულს გამოიმუშავებდა. გლეხის ცხოვრება გაუმჯობესდა.
მაგრამ რამდენიმე თვის შემდეგ, დადებული კვერცხების რაოდენობამ შემცირება დაიწყო, საბოლოოდ კი, საერთოდ შეწყდა.
ფერმერი ძალიან იმედგაცრუებული დარჩა. გაბრაზებულმა, ყველა ქათამი დაკლა და თავისთვის პატარა ნადიმი მოაწყო.
ცოტა ხანში მას გაახსენდა ხბო, რომლითაც ეს ყველაფერი დაიწყო და მიხვდა, რომ მთელი მისი მძიმე შრომის შემდეგ, მის ცხოვრებაში არაფერი შეცვლილა.
მორალი
ჰგავხართ ფერმერს, რომელიც ხშირად მოუთმენელია, როდესაც ინვესტიციების ზრდას დიდი დრო სჭირდება და ნებდება როდესაც საქმე რთულდება?
დრო თქვენს მოკავშირედ აქციეთ, იყავით მომთმენი, თანმიმდევრული და თქვენს ინვესტიციებს გაზრდის საშუალება მიეცით. იმისათვის, რომ გამდიდრდეთ, კმაყოფილების გადადება და ფულის კიდევ უფრო მეტი შემოსავლის მისაღებად გამოყენება უნდა ისწავლოთ.
