ინვესტიცია არის ის აქტივი (ქონება), რომელსაც ფიზიკური პირი თუ ორგანიზაცია იმ მოლოდინით ყიდულობს, რომ მომავალში, შემოსავალს ან მოგებას მოუტანს. თუმცა, ამ დეფინიციის მიღმა ბევრი ისეთი დეტალია, რომლის ცოდნაც, ყველასთვის სასარგებლოა. ამიტომ, გადავწყვიტეთ, მარტივად, მაგალითებით გიამბოთ ამ თემაზე.

აქცია კომპანიაში საკუთრების ერთეულს წარმოადგენს. აქციების ფლობის შემთხვევაში, თქვენ აქციონერი ხართ. ეს კი იმას ნიშნავს, რომ, შესაძლოა, დივიდენდების მიღების უფლება გქონდეთ – იმ შემთხვევაში, თუ კომპანია წარმატებას მიაღწევს. ასევე, შეიძლება, კომპანიის ზოგიერთ გადაწყვეტილებაში მიიღოთ მონაწილეობა.

საფონდო ბირჟა არის ადგილი, სადაც მყიდველი (buyer) და გამყიდველი (seller) საჯაროდ ვაჭრობს აქციებით, თუ სხვა ფასიანი ქაღალდებით – ალბათ, უკვე მიხვდით, რომ ფინანსების სამყაროში მოგზაურობას, საფონდო ბირჟაზე და მასთან დაკავშირებულ საკითხებზე საუბრით ვაგრძელებთ.