მიუხედავად იმისა, რომ საფონდო ბირჟაზე ინვესტირებისას წარმატების გარანტირებული ფორმულა არ არსებობს, ზოგიერთი ინვესტორი საინვესტიციო სამყაროში უმრავლესობაზე უკეთესი შედეგებით გამოირჩევა. ამ გამორჩეულ ინვესტორებს გამომუშავებული აქვთ საჭირო უნარები, რომლებიც მათ წარმატების მიღწევაში ეხმარება. დღეს კი სწორედ ამ უნარების შესახებ ვისაუბრებთ.
- კვლევის ჩატარება
საუკეთესო ინვესტორებს კარგად ესმით, თუ რამდენად ძვირფასია ინფორმაცია. აქედან გამომდინარე ისინი ატარებენ საფუძვლიან კვლევებს კომპანიების, ინდუსტრიებისა და ბაზრის ტენდენციების შესახებ, რათა ინფორმირებული, კარგად გააზრებული გადაწყვეტილებები მიიღონ.
- მოთმინება და დისციპლინა
წარმატებული ინვესტორები მომთმენები და დისციპლინირებულნი არიან. ისინი არჩეულ სტრატეგიას ერთგულად მიჰყვებიან და ბაზრის მოკლევადიანი რყევების ან ემოციების საფუძველზე სიტუაციაზე კონტროლს არ კარგავენ.
- რისკის მართვა
საზრიან ინვესტორებს კარგად აქვთ გააზრებული საინვესტიციო პორტფელის დივერსიფიკაციის მნიშვნელობა. მათი ინვესტიციები დივერსიფიცირებულია ინდუსტრიების, აქტივთა კლასების, გეოგრაფიული მდებარეობის მიხედვით, რათა საინვესტიციო პორტფელი კონკრეტულ ინვესტიციაზე ზედმეტად დამოკიდებული არ იყოს და რისკები დაბალანსდეს.
- ემოციების მართვა
ემოციების დაუფლება ინვესტორებისთვის ძალიან მნიშვნელოვანია. თქვენი წარმატებისთვის აუცილებელია, რომ მშვიდი და რაციონალური მიდგომა ბაზრის არასტაბილურობის ან მოულოდნელი მოვლენების დროსაც კი შეინარჩუნოთ. წარმატებული ინვესტორები თავს არიდებენ შიშით ან სიხარბით გამოწვეული იმპულსური გადაწყვეტილებების მიღებას და რჩებიან კონცენტრირებულნი თავიანთ გრძელვადიან მიზნებზე.
- უწყვეტი სწავლა
წარმატებული ინვესტორები ცოდნისადმი დაუოკებელი წყურვილით გამოირჩევიან და აქტიურად ეძებენ შესაძლებლობებს საინვესტიციო უნარების გასაუმჯობესებლად. ისინი ეცნობიან საინვესტიციო ლიტერატურას, ისმენენ სხვა წარმატებული ადამიანების მოსაზრებებს, თვალს ადევნებენ ფინანსურ სიახლეებს, აანალიზებენ ბაზარზე მიმდინარე მოვლენებს და ა. შ. შედეგად, ასეთი ადამიანები ყოველდღიურად პროგრესირებენ და ამასთან ერთად, საინვესტიციო სამყაროში მათი წარმატების შანსებიც იზრდება.
- გრძელვადიანი ხედვა
საუკეთესო ინვესტორებს ესმით, რომ წარმატებული ინვესტიცია არის მარათონი და არა მოკლე გარბენი. ისინი მუდამ ინარჩუნებენ გრძელვადიან ხედვას და მოკლევადიან რყევებს არჩეული კურსის ცვლილების უფლებას არ აძლევენ.
- ადაპტაცია
საფონდო ბირჟა დინამიკურია და საუკეთესო ინვესტორები ცვალებად პირობებთან სწრაფად ადაპტაციის უნარს ავლენენ. ეს კი მათ საშუალებას აძლევს, ახალი შესაძლებლობები გამოიყენონ და ბაზარზე ნავიგაცია შეძლონ.
- სიტუაციის ანალიზი
ძლიერი ანალიტიკური უნარები ინვესტორებისთვის გადამწყვეტი აქტივია. შესაძლოა, ყველა ინვესტორი აქტიურად არ იყოს ფინანსური ანგარიშგებების კითხვით დაკავებული, თუმცა ბაზარზე და მსოფლიოში მიმდინარე მოვლენების ანალიზის უნარი აუცილებელია, რათა ხელსაყრელი გადაწყვეტილებების მიღება შევძლოთ.
