ბოლო დროს საფონდო ბირჟა საკმაოდ ცვალებადი იყო. რამდენიმე თვის განმავლობაში როგორც აღმასვლის ისე ვარდნის ტენდენციები ფიქსირდებოდა. ცოტა ხნის წინ, S&P 500 ოფიციალურად შევიდა კორექციის ტერიტორიაზე მას შემდეგ, რაც ინდექსის ფასი წლის დასაწყისიდან 10%-ზე მეტად დაეცა.
საფონდო ბირჟის კორექციები ყოველთვის კრახს არ იწვევს, მაგრამ ეს სრულიად შესაძლებელია. ნიშნავს თუ არა ეს, რომ უახლოეს პერიოდში მორიგ კრახს უნდა ველოდეთ?
რამდენად სავარაუდოა საფონდო ბირჟის კრახი?
შესაძლოა, გაურკვევლობამ ზოგჯერ ბაზრის უფრო დიდი ცვალებადობა გამოიწვიოს. დღესდღეობით კი მსოფლიოში მრავალი სახის გაურკვევლობაა: რუსეთ-უკრაინის ომი, ინფლაციის ზრდა და კოვიდ-19-ის მზარდი შემთხვევები.
ასეთ პერიოდებში საფონდო ბირჟა განსაკუთრებით არაპროგნოზირებადია და ექსპერტებიც კი ვერ განსაზღვრავენ ზუსტად, თუ როგორ იმუშავებს ის მომდევნო კვირების ან თვეების განმავლობაში.
დიდი შანსია, რომ საფონდო ბირჟა დაეცემა, თუმცა როდის მოხდება ეს ან რამდენად მძიმე იქნება არავინ იცის. მიუხედავად ამისა, თქვენ მაინც შეგიძლიათ მოსალოდნელი ავბედითი მოვლენისთვის მოემზადოთ. ამჟამად სწორი ნაბიჯების გადადგმით თქვენი ინვესტიციების დაცვის შესაძლებლობა გაქვთ.
- გააძლიერეთ თქვენი საგანგებო ფონდი
ყოველთვის გონივრულია, რომ საგანგებო ფონდში მინიმუმ 6 თვის ოდენობის დანაზოგი იყოს, მაგრამ ეს კიდევ უფრო მნიშვნელოვანია მაშინ, როდესაც ბაზარი არასტაბილურია.
როდესაც ბაზარი ეცემა, თავისთავად, აქციების ფასი უფრო დაბალია. ეს აქცევს ვარდნას განსაკუთრებით ცუდ დროდ თქვენი ინვესტიციების გასაყიდად, რადგან, შეიძლება, საბოლოოდ პოზიციები იმაზე ნაკლებ ფასად გაყიდოთ, ვიდრე ისინი შეიძინეთ. თუმცა, როდესაც საგანგებო ფონდი გაგაჩნიათ, დაუგეგმავი ხარჯების გაწევისთვის თქვენი ინვესტიციების გაყიდვა არ მოგიწევთ.
- მიმართეთ საინვესტიციო პორტფელის დივერსიფიკაციას
ბაზრის კრახის გადალახვას ყველა აქცია ვერ შეძლებს. დივერსიფიცირებული პორტფელი კი რისკების გადანაწილების საშუალებას მოგცემთ.
ის, თუ ზუსტად რამდენი აქცია უნდა გქონდეთ საინვესტიციო პორტფელში, თქვენს პირად პრიორიტეტებზე იქნება დამოკიდებული, მაგრამ ექსპერტების უმეტესობის რჩევის მიხედვით, გონივრულია სხვადასხვა ინდუსტრიის მინიმუმ 25-30 აქციას ფლობდეთ. შესაბამისად, თუ თქვენს მფლობელობაში არსებული ერთი ან ორი აქცია ბაზრის კრახს ვერ გაუძლებს, ეს მოვლენა თქვენს მთლიან პორტფელს ვერ გაანადგურებს.
- დარჩით გრძელვადიან პერსპექტივაზე ორიენტირებული
საფონდო ბირჟის ვარდნა შემაძრწუნებელია, მაგრამ უნდა გვახსოვდეს, რომ ეს დროებითი მოვლენაა. სერიოზულმა კრახმა, შეიძლება, თვეების ან წლების განმავლობაში გაგრძელებული bear ბაზრები (ბაზარი, რომელშიც (აქციების) კურსის დაცემის ტენდენცია შეინიშნება) გამოიწვიოს, მაგრამ, საბოლოოდ, აქციების ფასები აღდგება.
გრძელვადიანი პერსპექტივის შენარჩუნებით და წლების განმავლობაში ბაზრის ეფექტურობაზე ფოკუსირებით, მოკლევადიან ცვალებადობაზე დამოკიდებულების თავიდან აცილება უფრო ადვილი გახდება.
ხშირად, ამის თქმა უფრო ადვილია, ვიდრე – გაკეთება, მაგრამ გახსოვდეთ, რომ საფონდო ბირჟას კრახების გადალახვის 100%-იანი მაჩვენებელი აქვს. მიუხედავად იმისა, რომ ინვესტირების დროს გარანტიები არ არსებობს, ძალიან სავარაუდოა, რომ ბაზარი ნებისმიერი მომავალი ვარდნისგან აღდგენას მოახერხებს.
დანამდვილებით ვერავინ იტყვის, თუ როდის მოხდება საფონდო ბირჟის მომდევნო კრახი, მაგრამ ამ სტატიაში მოცემული ნაბიჯების გადადგმით, თქვენ ამ ნეგატიურ მოვლენას მაქსიმალურად დაცული შეხვდებით.
