მრავალი ინვესტორი საფონდო ბირჟის მომავლის პერსპექტივებით შეშფოთებულია, რადგან S&P 500 2020 წლის შემდეგ პირველად bear market-ის ტერიტორიაზე აღმოჩნდა. რეალურად, MagnifyMoney-ის გამოკითხვის მიხედვით, ინვესტორების 40% ამბობს, რომ საფონდო ბირჟიდან ფული გაიტანა.
ახლა ნამდვილად რთული პერიოდია და თუ ვერ გაგირკვევიათ რამდენად ღირს ინვესტირების გაგრძელება, მარტო არ ხართ. ეს იმას ნიშნავს, რომ ბაზრის სტაბილიზაციამდე ინვესტირებისგან თავი უნდა შეიკავოთ? ან რამდენად უსაფრთხოა ახლა ინვესტირება? აი, რა უნდა იცოდეთ.
რამდენ ხანს გასტანს არასტაბილურობა?
საფონდო ბირჟის ვარდნა ხშირად ასეთი შემზარავი იმიტომ არის, რომ არავინ იცის, თუ რამდენ ხანს გასტანს ეს მდგომარეობა. ექსპერტებსაც კი არ შეუძლიათ იწინასწარმეტყველონ, თუ რამდენად დაეცემა ბაზარი და როდის დაიწყება აქციების ფასების აღდგენა.
როდესაც საქმე ყველაზე მძიმე კრახებიდან აღდგენას ეხება, ისტორიულად, საფონდო ბირჟას ამ მხრივ 100%-იანი მაჩვენებელი აქვს. ზოგჯერ, აქციების ფასების აღდგენას თვეები ან წლებიც კი სჭირდება, მაგრამ ძალიან სავარაუდოა, რომ ბაზარი, საბოლოოდ, აღდგება.
ამრიგად, უხეში შეფერხებების დროს ინვესტირების პროცესში, შესაძლოა, გრძელვადიანი პერსპექტივის შენარჩუნებამ გაამარტივოს. თქვენი ფულის ბაზარზე დატოვების და შესაძლებლობების შემთხვევაში ინვესტირების გაგრძელების შედეგად, ბაზრის აღდგენის შემდეგ დიდ ჯილდოს მიიღებთ.
სინამდვილეში, შესაძლოა, ვარდნა ძლიერი კომპანიების აქციების შემცირებულ ფასად შესაძენად ფანტასტიკური შესაძლებლობა იყოს.
როდის აქვს აზრი ინვესტირებისგან თავის შეკავებას?
არასტაბილურობის პერიოდში ინვესტირების გაგრძელება, შესაძლოა, სიმდიდრის დასაგროვებლად შესანიშნავი გზა იყოს. თუმცა, არის შემთხვევები, როდესაც ასეთ პერიოდებში პაუზის აღება უფრო გონივრულია.
მაგალითად, თუ საგანგებო ფონდი არ გაგაჩნიათ, უმჯობესია პირველ რიგში სოლიდური დანაზოგების შექმნაზე კონცენტრირდეთ.
ბაზრის ვარდმა თქვენი ფულის გასატანად ერთ-ერთი ყველაზე ცუდი დროა, რადგან ფასები შემცირებულია და, შესაბამისად, თქვენი პოზიციების იაფად გაყიდვა მოგიწევთ. იმ შემთხვევაში, თუ მოულოდნელი ხარჯების წინაშე აღმოჩნდით და საგანგებო ფონდი არ გაგაჩნიათ, იძულებული გახდებით, რომ ფული ბაზრიდან გამოიტანოთ და ზარალი განიცადოთ.
ანალოგიურად, თუ ხელფასიდან ხელფასამდე ცხოვრობთ, შესაძლოა, ინვესტირებისგან პაუზის აღება უფრო გონივრული არჩევანი იყოს. ინვესტირება გრძელვადიანი სტრატეგიაა და აქციების ფასების აღდგენამდე, შესაძლოა, ისინი კიდევ უფრო შემცირდეს. თუ საფონდო ბირჟაზე მთელ თქვენს ფულს ჩადებთ, მაგრამ ის რამდენიმე კვირაში ან თვეში დაგჭირდებათ, შესაძლოა სერიოზული ზარალი განიცადოთ.
საფონდო ბირჟაზე ინვესტირება – თუნდაც არასტაბილურობის პერიოდში – სიმდიდრის დაგროვების ერთ-ერთი ყველაზე ეფექტური გზაა. თუ ახლავე ინვესტიციის ჩადების საშუალება გაქვთ, შეგიძლიათ თქვენი დანაზოგები იმაზე ბევრად მეტად გაზარდოთ, ვიდრე თქვენ ფიქრობთ.
