საინვესტიციო საორიენტაციო რუკა ოდნავ განსხვავებულია, როდესაც საპროცენტო განაკვეთები იზრდება, ამიტომ იმის ცოდნა, თუ რა სტრატეგიებს უნდა მივმართოთ მზარდი საპროცენტო განაკვეთების გარემოს პირობებში, ძალიან მნიშვნელოვანია. ამ სტატიაში განვიხილავთ 5 სტრატეგიას, რომელიც ნავიგაციაში დაგეხმარებათ.
- გააკონტროლეთ თქვენი ბალანსი
საპროცენტო განაკვეთების ზრდა ნიშნავს, რომ თქვენი ვალის ღირებულება გაიზრდება. თუ გაქვთ ცვლადი განაკვეთის დავალიანება ან ისეთი სესხი, რომლის სიმწიფის დადგომისას, მის გადასახდელად სხვა კრედიტის აღება მოგიწევთ, ახლა შესანიშნავი დროა გადახდის გზის გასარკვევად ან სესხების ფიქსირებულ პროცენტში მოსაქცევად. რაც უფრო მაღალი იქნება საპროცენტო განაკვეთები, მით უფრო გაიზრდება თქვენი ცვლადი განაკვეთის მქონე ვალის ღირებულება და გაძვირდება ახალი ფიქსირებული პროცენტის მქონე სესხის აღებაც.
თქვენი ვალების დაფარვით ან რეფინანსირებით მანამ, სანამ საპროცენტო განაკვეთები ჯერ კიდევ დაბალია, შეგიძლიათ თქვენი შემოსავალი და ფულადი სახსრები გააკონტროლოთ. ეს არის მნიშვნელოვანი ნაწილი იმაში დასარწმუნებლად, რომ ინვესტირებისთვის საკმარისი ფულადი სახსრები გაგაჩნიათ.
- ორიენტირდით მოკლევადიან ობლიგაციებზე
თუ თქვენი ფინანსური განაწილების გეგმა მოითხოვს, რომ ობლიგაციებს ფლობდეთ, მაშინ, მზარდი საპროცენტო განაკვეთების პირობებში, უნდა დარწმუნდეთ, რომ თქვენს მფლობელობაში არსებული ობლიგაციები საკმაოდ მოკლე ხანგრძლივობისაა. ეს იმიტომ ხდება, რომ, რაც უფრო ხანგრძლივია ობლიგაციების ვადა, მით უფრო დაეცემა მათი ღირებულება საპროცენტო განაკვეთების ზრდისას.
თუ თქვენი მიზანი ობლიგაციები სიმწიფის ვადის დადგომამდე შენახვაა, ობლიგაციების ფულადი ნაკადები არ შეიცვლება მხოლოდ იმიტომ, რომ საპროცენტო განაკვეთები იზრდება. თუ ობლიგაციებს პორტფელის ბალასტად იყენებთ ან მათ გაყიდვას ვადის გასვლამდე გეგმავთ, გაიაზრეთ, რომ დაბალი კუპონებისა და ხანგრძლივი ვადის ობლიგაციები, საპროცენტო განაკვეთების ზრდისას, შეიძლება, საკმაოდ დაეცეს. ეს არის ობლიგაციების ის ტიპები, რომლებსაც, როგორც წესი, აქვთ უფრო გრძელი ვადა და, მათზე შესაბამისად, საპროცენტო განაკვეთების ზრდა უფრო მეტად მოქმედებს.
- დააკვირდით თქვენი აქციების ბალანსს
იგივე რისკები, რომლებიც გავლენას ახდენს თქვენს უნარზე – გადაიხადოთ დავალიანება, როდესაც საპროცენტო განაკვეთები იზრდება, ასევე ზემოქმედებს კომპანიებზე, რომლებშიც ინვესტიციას დებთ. განაკვეთების მატებასთან ერთად, მათი ცვლადი განაკვეთების დავალიანება დაუყოვნებლივ ძვირდება და მათი ფიქსირებული განაკვეთის ვალი უფრო ძვირდება, თუ ვადის მომწიფებისას რეფინანსირება ხდება საჭირო.
ეს მნიშვნელოვანია გაიაზროთ, რადგან კორპორაციული ვალის დიდი ნაწილი სტრუქტურირებულია, როგორც ობლიგაციები, რომლისთვისაც კომპანია პროცენტს იხდის მხოლოდ მანამ, სანამ დავალიანების სიმწიფის ვადის დადგომისას, ძირი თანხის სრულად გადახდა არ მოეთხოვება. ამრიგად, ყურადღება უნდა მიაქციოთ როგორც მათი ვალის დონეს, ასევე ვალის გადახდის გრაფიკს – ორივე ხშირად კომპანიის წლიურ ანგარიშებში აღინიშნება.
თქვენ უნდა დარწმუნდეთ, რომ კომპანიას შესწევს ძალა თავისი ფულადი სახსრების ნაკადებით მოემსახუროს დავალიანებას მაშინაც კი, როდესაც საპროცენტო განაკვეთები იზრდება. თუ სავალო ბაზარი მიიჩნევს, რომ კომპანიას უფრო მაღალი გადახდების განხორციელება არ შეუძლია, შესაძლებელია, კომპანია გაკოტრებამდე მივიდეს და მისი აქციების ფასი $0-ს გაუტოლდეს.
- მოძებნეთ ბიზნესები, რომლებსაც ფასის გაზრდა შეუძლია
განაკვეთების მატებასთან ერთად, ვალის მქონე ბიზნესების მარჟები შემცირდება. მათ, ვისაც შეუძლია, რომ ვალის მომსახურების გაზრდილი ხარჯები, უფრო მაღალი ფასების საშუალებით კლიენტებზე გადაიტანოს, ამ პრობლემასთან გამკლავების უფრო მეტი პოტენციალი გააჩნია. ამიტომ ასეთი უპირატესობის მქონე კომპანიებში ინვესტირებაზე ორიენტირდით.
- ფოკუსირდით თქვენს მფლობელობაში არსებული კომპანიების ღირებულებაზე
ყურადღება მიაქციეთ ისეთ კომპანიებს, რომელთა აქციები, მათ მიერ ფულადი ნაკადების გამომუშავების პოტენციალთან შედარებით, სამართლიანად ან იაფად შეფასებულად გამოიყურება, რადგან მათი ფასები, საპროცენტო განაკვეთების ზრდასთან ერთად, შეიძლება, ნაკლებად შემცირდეს. რაც უფრო იაფად არის კომპანია შეფასებული, მით უფრო მეტად არის მისი საბაზრო ღირებულება დამოკიდებული მის დადასტურებულ შესრულებაზე, ვიდრე მომავალში სწრაფი ზრდის პოტენციალზე.
