ბოლო დროს საფონდო ბირჟამ ვარდნა განიცადა. S&P 500 ოფიციალურად შევიდა bear market-ის ტერიტორიაზე, როდესაც პიკიდან 20%-ზე მეტით დაეცა.
მიუხედავად იმისა, რომ ვარდნა და bear market, შესაძლოა, საუკეთესო ინვესტორებისთვისაც კი დამაშინებელი იყოს, ეს მოვლენები, ასევე, შესყიდვის შესანიშნავი შესაძლებლობაა. აქციების ფასები ახლა საგრძნობლად დაბალია, ვიდრე თვეების წინ და ასეთ დროს ინვესტიციების ჩადება მომავალში დიდი სარგებლის მიღებაში დაგეხმარებათ.
თუმცა, სწორი სტრატეგიის შერჩევა საკვანძო საკითხია. აი, როგორ უნდა გამოიყენოთ თქვენი ფული ბაზრის ვარდნის დროს.
- მოერიდეთ ადვილად პროგნოზირებად რეაქციებს
როდესაც აქციების ფასები მცირდება, შეიძლება, მაცდური იყოს პირველ რიგში მათი ყიდვა და შეკითხვების შემდეგ დასმა. ბაზრის ვარდნა ხანდახან ჰგავს შავ პარასკევს, როდესაც ფასები შეზღუდული დროით იკლებს და საჭიროა, რომ ყიდვა მოასწროთ.
თუმცა, იმაში დასარწმუნებლად, რომ საუკეთესო შეთავაზებას იღებთ, გამონახეთ დრო თქვენს გადაწყვეტილებაზე კარგად დასაფიქრებლად. შეგიძლიათ ახლა ინვესტირებას გასწვდეთ? გაგაჩნიათ ჯანსაღი საგანგებო ფონდი? საფუძვლიანად გამოიკვლიეთ ეს აქცია?
ბაზრის ვარდნა, შესაძლოა, ყიდვის ფანტასტიკური შესაძლებლობა იყოს, მაგრამ, იმავდროულად, ეს პერიოდი ინვესტიციების გაყიდვისთვის ერთ-ერთი ყველაზე ცუდია. თუ აქციებს დაუფიქრებლად შეიძენთ, სავარაუდოდ, მათი გაყიდვა მალევე მოგიწევთ, რაც ფულს დაგაკარგვინებთ.
- იქონიეთ გრძელვადიანი მიდგომა
არავინ იცის, თუ ზუსტად რამდენ ხანს გაგრძელდება ეს bear ბაზარი. ზოგიერთი ვარდნა, როგორიც იყო, მაგალითად, კოვიდ-19-ით გამოწვეული კრახი, მალევე გამოსწორდება და აქციების ფასები თითქმის მაშინვე აღდგება. თუმცა, სხვა შემთხვევებში, მდგომარეობის აღდგენას, შესაძლოა, თვეები ან წლებიც კი დასჭირდეს.
ჭკვიანურია, რომ, ყოველი შემთხვევისთვის, ყველაზე უარესი სცენარისთვისაც მზად იყოთ. თუ აქციების ფასები თვეები ან წლების განმავლობაშიც არ აღდგა, ფასების კლების პირობებშიც კი მზად უნდა იყოთ თქვენი ინვესტიციების შესანარჩუნებლად.
შესაძლოა, თქვენი საინვესტიციო პორტფელის ღირებულების მნიშვნელოვნად შემცირების მომსწრე გახდეთ, მაგრამ ფოკუსირდით გრძელვადიან პერსპექტივაზე და ბაზრის ყოველდღიურ მოძრაობებს ყურადღებას ნუ მიაქცევთ.
- ყიდვამდე კვლევა ჩაატარეთ
გაითვალისწინეთ, რომ ასეთ პერიოდებში გადარჩენის უნარი ყველა კომპანიას არ გააჩნია. აქედან გამომდინარე, მნიშვნელოვანია, რომ ინვესტიცია ძლიერ, გრძელვადიანი პოტენციალის მქონე კომპანიაში ჩადოთ.
ყველაზე ძლიერი აქციები გააჩნია კომპანიებს, რომლებსაც ჯანსაღი ბიზნესის საფუძვლები აქვს. ეს იმას ნიშნავს, რომ კომპანიის ფინანსები მყარია, მას მართავს კომპეტენტური გუნდი, რომელსაც არასტაბილურობის პერიოდში სწორად მოქმედება შეუძლია და კომპანიას კონკურენტული უპირატესობა გააჩნია. რაც უფრო ჯანსაღი იქნება ბიზნესი, მით უფრო სავარაუდოა, რომ იგი ვარნას გადალახავს.
ბაზრის ვარდნის მაქსიმალური გამოყენება
Bear market-ის გაძლება ყოველთვის ადვილი არ არის, მაგრამ მას სიმდიდრის შექმნის წარმოუდგენელი შესაძლებლობის მოტანა შეუძლია. გააზრებული მიდგომით, სწორი აქციების შერჩევით და მათი გრძელვადიან პერსპექტივაში შენარჩუნებით, შეგიძლიათ საბოლოოდ დიდი სარგებელი მიიღოთ.
