ამჟამად აშშ-ის ეკონომიკური მდგომარეობა ძლიერი არ არის. ინფლაცია დაახლოებით 8.5%-ს შეადგენს, ხოლო მთლიანი ეკონომიკა პირველ კვარტალში წლიური 1.4%-ით შემცირდა. რეცესიის ოფიციალურად გამოცხადებას კლებადი ეკონომიკის ორი მეოთხედი ჭირდება, მაგრამ გამაფრთხილებელი ნიშნები საშინელია.
მაღალი ინფლაციისა და დაბალი ეკონომიკური ზრდის კომბინაციას შემზარავი სახელი აქვს: სტაგფლაცია. სტაგფლაციას ხშირად მრავალი სახის პრობლემები მოაქვს, რადგან კომპანიები ხარჯების შემცირებას ცდილობენ, ხოლო მომხმარებლები მუდმივად მზარდი ფასების პრობლემის წინაშე დგანან. სამწუხაროდ, მაღალი ინფლაცია, შეიძლება, ხშირად სტაგფლაციაში გადაიზარდოს და სავარაუდოა, რომ ეს ტენდენცია უკვე დაწყებულია.
თანამშრომლების დათხოვნა: ხარჯების შემცირების მთავარი ნიშანი
უკვე შეინიშნება ადრეული ნიშნები იმისა, რომ კომპანიები პერსონალის ხარჯების შემცირებას ცდილობენ. Robinhood Markets-ის მიერ ბოლოდროინდელი თანამშრომლების დათხოვნა, Meta Platfroms-ში ახალი პერსონალის დაქირავების შეჩერება და Ford Motors Company-ში მიმდინარე საინჟინრო შემცირებები შეიძლება მხოლოდ აისბერგის წვერი იყოს.
ძირითადად, კომპანიები შემცირებას მიმართავენ მაშინ, როდესაც მომუშავე პერსონალის შენარჩუნების ხარჯები მათგან მიღებულ სარგებელს აჭარბებს. ინფლაციის ზრდასთან ერთად, მომუშავეები ხელფასების გაზრდას მოითხოვენ იმისთვის, რომ თავიანთი გაზრდილი ხარჯების გამკლავება შეძლონ, ბიზნესს კი, თავის მხრივ, საკუთარი ხარჯების შემცირებაზე უწევს ფიქრი.
ინფლაციური პერიოდის განმავლობაში, დარჩენილ თანამშრომლებს შეუძლიათ ხელფასის გაზრდას მიაღწიონ გათავისუფლებული პერსონალის სამუშაოს შესრულებით. მიუხედავად იმისა, რომ თანამშრომლების გათავისუფლების შედეგად კომპანია ხარჯების შემცირებას შეძლებს, მას სწრაფი ზრდის ტემპის შენარჩუნება გაუჭირდება.
როდესაც ერთი კომპანია ასეთ არჩევანს აკეთებს, ეს შეიძლება მის მოკლევადიან მოგებას წაადგეს, თუმცა როდესაც კომპანიების უმეტესობა ასე იქცევა, მთლიანი ეკონომიკის ზრდა მცირდება. ეს არის სტაგნაცია.
ინფლაცია, როგორც მკაცრი სამომხმარებლო არჩევანის იძულება
ინფლაციის დროს ადამიანები ხარჯების შემცირებას ცდილობენ, ამიტომ ისინი პრიორიტეტებს უფრო ფრთხილად საზღვრავენ და მეტის დაზოგვაზე ორიენტირდებიან. თუ კონკრეტული ადამიანის ხელფასი ამაღლებულ ფასებს არ შეესაბამება, მან უნდა აირჩიოს, თუ რა მიმართულებით დახარჯავს თავის შეზღუდულ რესურსებს. ასეთი არჩევანის გაკეთების აუცილებლობისას, ადამიანები, როგორც წესი ფოკუსირდებიან მხოლოდ იმაზე, რაც მათთვის ყველაზე მნიშვნელოვანია. მომხმარებლის მოთხოვნის შემცირება შენელებული ეკონომიკის ნიშანია.
რისი გაკეთება შეგვიძლია?
ამ წინაღობის წარმატებულად გადასალახად, პირველ რიგში, უნდა დარწმუნდეთ, რომ თქვენი ფინანსები წესრიგშია. თუ მაღალპროცენტიანი ვალების გადახდის საშუალება გაქვთ, გააკეთეთ ეს. თუ ამის ფუფუნება არ გაქვთ, გაარკვიეთ, როგორ შეიძლება მისი უფრო დაბალ და საუკეთესო შემთხვევაში ფიქსირებულ პროცენტებში რეფინანსირება. ასევე, ამ ვალების რაც შეიძლება სწრაფად გადასახდელად „ზვავის“ მეთოდი გამოიყენეთ.
„ზვავის“ მეთოდის გამოსაყენებლად დაახარისხეთ თქვენი ვალები საპროცენტო განაკვეთების მიხედვით (მაღლიდან დაბლა). თითოეული ვალისთვის (ყველაზე მაღალპროცენტიანის გამოკლებით) გადაიხადეთ მინიმუმი. ყველაზე მაღალპროცენტიანი ვალისთვის კი გადაიხადეთ იმდენი, რამდენსაც გასწვდებით. შემდეგ იგივე გააკეთეთ მომდევნო მაღალპროცენტიანი ვალისთვის და გაიმეორეთ ეს პროცესი იქამდე, სანამ ყველა ვალს არ გადაიხდით.
შესაძლოა ვალის გარკვეული ნაწილი ჯერჯერობით დაუფარავი გქონდეთ და ისე მიმართოთ ინვესტირებას, მაგრამ არ დაგავიწყდეთ, რომ ვალი ვალდებულებაა. ასევე გაიაზრეთ, რომ აქციების ფასები ყოველთვის არ იზრდება და, შესაძლოა, ვალის დასაფარად აქციების ფულად ქცევის ხელსაყრელი საშუალება ყოველთვის არ მოგეცეთ.
ვალების კონტროლქვეშ მოქცევის შემდეგ, შექმენით საგანგებო ფონდი, რომელიც 3-დან 6 თვემდე საცხოვრებელ ხარჯებს გასწვდება. თუმცა გაითვალისწინეთ, რომ ინფლაციურ გარემოში ფული, დროთა განმავლობაში, ღირებულებას კარგავს, ამიტომ დაზოგვისას ზომიერება დაიცავით.
ვალების გაკონტროლებისა და საგანგებო ფონდის შექმნის შემდეგ, თავისუფლად შეგიძლიათ დაიწყოთ ინვესტირება იმისთვის, რომ ინფლაციის დამარცხება შეძლოთ. უბრალოდ დაიმახსოვრეთ, რომ ინვესტირება გრძელვადიანი პროცესია და იმ ბიზნესის რეალური ღირებულების შესაფასებლად, რომელშიც თქვენ ინვესტიციას დებთ, ბაზარს შესაძლოა გარკვეული დრო დასჭირდეს.
დაიწყეთ ახლავე
მაღალი ინფლაცია და დაბალი ეკონომიკური ზრდა ხშირად კომბინირებულია და ორივე ერთად უარყოფითად ზემოქმედებს როგორც საფონდო ბირჟაზე, ასევე სამუშაო ბაზარზე. ნებისმიერი სცენარისთვის უნდა იყოთ მზად, რადგან დადგება თუ არა ყველაზე ცუდი რეალობა, თქვენ მყარი საფუძველი გექნებათ შემუშავებული, რაც ნებისმიერ შემთხვევაში დადებითი ფაქტორია.
