„ჩვენ ვართ ის, რასაც ხშირად ვაკეთებთ“ — თქვა არისტოტელემ. „სრულყოფილება მოდის არა ჩვენი ქმედებებიდან, არამედ ჩვენი ჩვევებიდან.“
სასარგებლო ჩვევების გამომუშავება დაგეხმარებათ, გახდეთ უკეთესი ინვესტორი და დღეს სწორედ ამ საკითხის შესახებ ვისაუბრებთ.
- დაიწყეთ ადრე
საქმის გადადების ჩვევის ნაცვლად დროულად მოქმედების უნარი ინვესტირების სამყაროში დიდ სარგებელს მოგიტანთ. ინვესტირების ადრე დაწყებით დრო თქვენი მოკავშირე გახდება და მოგეცემათ საშუალება, რთული პროცენტის ძალა მაქსიმალურად გამოიყენოთ. ქვემოთ მოცემულ ფოტოზე ნათლად ჩანს, თუ რამდენად მნიშვნელოვანია ინვესტირების ადრე დაწყება და რაოდენ დიდია სხვაობა საბოლოო შედეგებში.
- ჩადეთ ინვესტიცია რეგულარულად
ძალიან მნიშვნელოვანია, რომ რეგულარულად დაზოგვისა და ინვესტირების ჩვევა გამოიმუშაოთ, რათა მიღებული სარგებელი მაქსიმალურად გაზარდოთ. დაიწყეთ თქვენი ფინანსების მართვა და წინასწარ განსაზღვრეთ, თუ ყოველთვიური შემოსავლის რა ნაწილს დააბანდებთ, ნაცვლად იმისა, რომ ეს პროცესი უმართავი და არათანმიმდევრული იყოს.
- ჩამოაყალიბეთ აქტივთა სასურველი განაწილება და პორტფელი რეგულარულად გადააბალანსეთ
თქვენს საინვესტიციო პორტფელში აქტივთა განაწილება განსაზღვრავს ურთიერთობას მოსალოდნელ რისკსა და სარგებელს შორის. ინვესტიციების ნაზავში ზუსტი პროცენტული მაჩვენებლები დამოკიდებული იქნება რამდენიმე ფაქტორზე, მათ შორის რისკისადმი თქვენი ტოლერანტობის დონეზე და დროის ჰორიზონტზე.
აქციებს, ქვემოთ ჩამოთვლილ სხვა აქტივებთან შედარებით, ისტორიულად უფრო მაღალი მოკლევადიანი რისკი, მაგრამ ყველაზე მაღალი გრძელვადიანი ანაზღაურება ახასიათებს. თუ თქვენი დროის ჰორიზონტი გრძელია, ორიენტირებული ხართ ზრდაზე და მზად ხართ, გარკვეულ ცვალებადობას გაუძლოთ, მაშინ შეგიძლიათ პორტფელში ამ აქტივის წარმომადგენლობის პროცენტული მაჩვენებელი გაზარდოთ.
ობლიგაციები ზოგადად ნაკლებად ცვალებადია, ვიდრე აქციები, მაგრამ გვთავაზობს უფრო მოკრძალებულ ანაზღაურებას. თუ თქვენ უფრო მოკლე დროის ჰორიზონტი ან რისკის მიმართ დაბალი ტოლერანტობა გაქვთ, მაშინ, შესაძლოა, პორტფელში ობლიგაციების წილი გაზარდოთ.
ნაღდი ფული და ფულადი ეკვივალენტები ყველაზე უსაფრთხო ინვესტიციებია, მაგრამ ისინი ყველაზე დაბალ შემოსავალს გვთავაზობს. ნაღდ ფულზე დაფუძნებულ ინვესტიციებში ფულის დაკარგვის შანსი დაბალია, ამიტომ მათზე ორიენტირება მაშინ ღირს, თუ პენსიაზე გასვლასთან ახლოს ხართ. მაგრამ გრძელვადიან პერსპექტივაზე ფოკუსირებული ინვესტორისთვის ასეთი ვარიანტი არ არის მომგებიანი — დროთა განმავლობაში ფულადი სახსრების მსყიდველუნარიანობაზე ინფლაცია ნეგატიურად იმოქმედებს.
- მიმართეთ დივერსიფიკაციას
არსებობს მრავალი განსხვავებული ბაზარი და ბევრი სხვადასხვა სახის ინვესტიცია, მათი ფასები კი განსხვავებულად მოძრაობს. კარგად დივერსიფიცირებული საინვესტიციო პორტფელი დაგეხმარებათ, შეამციროთ ცვალებადობის ეფექტი და რისკი დააბალანსოთ.
- აკონტროლეთ ემოციები
ემოციები გვაქცევს ადამიანებად, მაგრამ არა — უკეთეს ინვესტორებად. ბაზრის აღმავლობამ და ვარდნამ, რაც სავსებით ბუნებრივი მოვლენაა, შეიძლება ჩვენში სიხარბე ან შიში გამოიწვიოს, რაც გვარღვევინებს მთავარ ფორმულას — იყიდე იაფად, გაყიდე ძვირად. ემოციების გაკონტროლება დაგეხმარებათ, უგულებელყოთ მოკლევადიანი რყევები და გრძელვადიანი მიდგომა შეინარჩუნოთ.
