დღეს ვისაუბრებთ წიგნების შესახებ, რომლებიც დამწყებ ინვესტორებს საინვესტიციო სამყაროს სპეციფიკის გააზრებაში დაეხმარება. ბევრი ამ წიგნთაგანი საცალო ინვესტორების ინტერესების გათვალისწინებით არის დაწერილი და მათში აღწერილია ბევრი საინტერესო საკითხი, მაგალითად: როგორ უნდა ვაკონტროლოთ სახსრები, როგორ შევქმნათ საინვესტიციო პორტფელი, როგორ გავზარდოთ საგადასახადო ეფექტურობა და ა.შ. გარდა ამისა, ამ წიგნების უმეტესობა საინვესტიციო ინდუსტრიის გამოჩენილმა ფიგურებმა დაწერეს.
- ბარტონ გორდონ მალკიელის “A Random Walk Down Wall Street”
ინვესტორებმა, რომლებიც ჯერ კიდევ ფიქრობენ, უნდა სცადონ თუ არა ბედი აქციების შეძენაში, უნდა წაიკითხონ A Random Walk Down Wall Street, რათა ამ საქმიანობასთან დაკავშირებული გამოწვევები გაიაზრონ. პრინსტონის უნივერსიტეტის ეკონომისტი — ბარტონ გორდონ მალკიელი თავის წიგნში ასახავს ბაზრის დამარცხებისა და აქციების ფასების პროგნოზირების მცდელობის ამაოებას, მოჰყავს აკადემიური კვლევა, რომელიც ტექნიკურ და ფუნდამენტურ ანალიზში არსებულ ხარვეზებს წარმოაჩენს. ის ასკვნის, რომ მკითხველმა თავი აარიდოს აქციების შერჩევასა და აქტიურად მართული ურთიერთდახმარების ფონდებში ინვესტირებას, ამის ნაცვლად კი დაბალი დანახარჯების მქონე საინდექსო ფონდებზე ფოკუსირდნენ.
- ჯონ ბოგლის “The Little Book of Common Sense Investing: The Only Way to Guarantee Your Fair Share of Stock Market Returns”
ამ საინვესტიციო წიგნში ჯონ ბოგლი თავის იდეებს ლაკონიურად აცნობს იმ ადამიანებს, რომელთათვისაც ეს სფერო უცნობია. 2014 წელს აქციონერებისადმი მიწერილ წერილში უორენ ბაფეტმა ამ წიგნის წაკითხვა ყველას ურჩია.
თავად ავტორის თქმით, მასაც კი სჭირდებოდა დროდადრო საკუთარი რჩევების შეხსენება. ტონი რობინსთან საუბრისას ჯონმა აღნიშნა, რომ ბაზრის მკვეთრი ვარდნა მასზე მაინც ზემოქმედებდა და ამ დროს ხელახლა კითხულობდა თავის რამდენიმე წიგნს, რათა „კურსზე“ დაბრუნებულიყო.
- ჯონ ბოგლის “Common Sense on Mutual Funds: New Imperatives for the Intelligent Investor”
ამ კლასიკის პირველი გამოცემა 1999 წელს გამოქვეყნდა, მაგრამ ბოგლმა სრულიად განახლებული მეორე გამოცემა ათწლეულის შემდეგ გამოუშვა. ამ წიგნის მიზანია ინვესტორებს ურთიერთდახმარების ფონდების საქმიანობის გააზრებაში და ბოგლის მარტივი და დაბალ დანახარჯიანი საინვესტიციო სტრატეგიის უპირატესობის გაცნობიერებაში დაეხმაროს.
Morningstar-ში ფონდების კვლევის მმართველი დირექტორი და პრეზიდენტი — დონ ფილიფსი წიგნის შესახებ ამბობს: „ეს შეიძლება იყოს საუკეთესო წიგნი ურთიერთდახმარების ფონდების შესახებ“. მაიკლ ბატნიკმა — Ritholtz Wealth Management-ის კვლევის დირექტორმა, ჯონ ბოგლის ნამუშევარი საუკეთესო საინვესტიციო წიგნების სიაში შეიტანა.
- ჯოელ გრინბლატის “You Can Be a Stock Market Genius”
ეს წიგნი დაწერა ჯოელ გრინბლატმა, ცნობილმა ღირებულებაზე ორიენტირებულმა ინვესტორმა, რომელიც კოლუმბიის უნივერსიტეტის ღირებულებაზე ორიენტირებული ინვესტირების სკოლიდან მოდის, იმავე ინსტიტუტიდან, რომელმაც ბენჟამინ გრეჰემისა და უორენ ბაფეტის კარიერა შექმნა. წიგნში ჯოელი უფრო მარტივ და ადვილად შესასრულებელ ინსტრუქციებად ანაწევრებს ფორმულას, რომელსაც ცნობილი ღირებულებაზე ორიენტირებული ინვესტორები იყენებენ. ჯოელი ასევე განუმარტავს მკითხველებს სხვადასხვა ტიპის კორპორატიულ მოვლენებს, როგორიცაა შერწყმა, კომპანიების გამოყოფა და რესტრუქტურიზაცია.
- ნასიმ ნიკოლას ტალების “The Black Swan: The Impact of the Highly Improbable”
რისკ მენეჯმენტი საცალო და ინსტიტუციური ინვესტორებისთვის ძალიან მნიშვნელოვანი უნარია. ამ წიგნში ტალები იყენებს სხვადასხვა აზროვნების სავარჯიშოებს, რათა აჩვენოს, თუ რამდენად არასაკმარისად აფასებენ ადამიანები (ინვესტორების ჩათვლით) უკიდურესად არაპროგნოზირებადი მოვლენების — ეგრეთ წოდებული „შავი გედების“ მოვლენების უკიდურეს ზეგავლენას.
- ბენჟამინ გრეჰემის “The Intelligent Investor”
ეს არის ერთ-ერთი საუკეთესო საინვესტიციო წიგნი, რაც კი ოდესმე დაწერილა. თუ გსურთ, კარგი ინვესტორი გახდეთ, ბენჟამინ გრეჰემის ამ წიგნის წაკითხვა აუცილებელია.
წიგნში მრავალ საინტერესო ციტატას აღმოაჩენთ, რომლებიც დაფიქრებისა და არსებული მოსაზრებების გადაფასებისკენ გიბიძგებთ. The Intelligent Investor მარტივი წასაკითხი არ არის, ადამიანები მას თვეების ან თუნდაც წლების განმავლობაში სწავლობენ. თუმცა როდესაც საბოლოოდ გაიაზრებთ მას, თქვენს წინაშე სრულიად ახალი სამყარო გადაიშლება.
