მას შემდეგ, რაც 1916 წლის 3 ივლისს ჰეტი გრინი გარდაიცვალა, პრესამ მას „მსოფლიოში ყველაზე მდიდარი ქალი“ უწოდა — მისი ქონება $100 მილიონზე მეტად იყო შეფასებული. მას კიდევ ერთი საინტერესო ტიტული ჰქონდა — „უოლ სტრიტის ჯადოქარი“. ჰეტიმ მამისა და დეიდის მიერ 1865 წელს დატოვებული ქონება, რომელიც $5-$10 მილიონს შეადგენდა (ცნობები განსხვავებულია), 51 წლის განმავლობაში დღევანდელი ეკვივალენტით დაახლოებით $2.8 მილიარდამდე გაზარდა.
ადრეული ცხოვრება და განათლება
ჰენრიეტა ჰოლანდ რობინსონი 1834 წლის 21 ნოემბერს, ნიუ ბედფორდში, მასაჩუსეტსში დაიბადა. იგი ედვარდ მოტ რობინსონის — ნავთობის მწარმოებლისა და ვეშაპებზე ნადირობის წარმატებული აგენტის და ამ საქმეში კიდევ უფრო ცნობილი ისააკ ჰოლადის შვილიშვილის — ები ჰოლანდის ქალიშვილი იყო. ჰეტი მკაცრად აღზარდეს. 6 წლის ასაკში იგი სუსტი მხედველობის მქონე მამისა და ბაბუისთვის ფინანსურ გაზეთებს კითხულობდა. 8 წლისას კი მან თავისი პირველი საბანკო ანგარიში გახსნა. ჰეტიმ სკოლაში სიარული 10 წლის ასაკში დაიწყო, მასაჩუსეტსის შტატის ქალაქ სენდვიჩში მდებარე პანსიონში.
15 წლის ასაკში მან Friends Academy-ში საზაფხულო სესია გაიარა და შემდეგ სამი წელი ბოსტონის კეთილშობილ ქალთა პანსიონში სწავლობდა. ჰენრიეტა მამის ბუღალტრადაც მუშაობდა. ერთხელ მან ამერიკელ ჟურნალისტს — დოროთი დიქსს უთხრა: „მე იძულებული გავხდი, ბიზნესის სამყაროში ჩავრთულიყავი. ორი მდიდარი ოჯახის ერთადერთი შვილი ვიყავი და 6 წლის ასაკიდან მასწავლეს, რომ საკუთარი ქონებისთვის უნდა მიმეხედა“.
მნიშვნელოვანი მიღწევები
გარდა დაგროვებული სიმდიდრისა, ჰეტის ყველაზე მნიშვნელოვანი მიღწევა, ალბათ, საკუთარი სურვილების შესაბამისად ცხოვრებაა მამაკაცების მიერ დომინირებულ საზოგადოებაში და ინდუსტრიაში, იმ დროს, როდესაც კანონით ქალის ქონებას ქმარი აკონტროლებდა. ჰეტი ცნობილი იყო საუბრის მტკიცე მანერით, ასევე იმით, რომ იარაღს ატარებდა და დიდ დისტანციებზე მარტო მოგზაურობდა, რაც იმ დროის ქალისთვის სკანდალურ ქცევად ითვლებოდა.
მან ასევე შექმნა წინასაქორწინო შეთანხმების ადრეული მაგალითი ქორწინების საკუთრების შესახებ კანონის გვერდის ავლის მიზნით. 1867 წელს, როდესაც ჰენრიეტა ვერმონტის მდიდარ ბიზნესმენზე — ედვარდ გრინზე დაქორწინდა, მან იზრუნა, რომ კანონიერად თითოეულის ფინანსური ცხოვრება ერთმანეთთან კავშირში არ ყოფილიყო. ეს ალბათ იმით იყო განპირობებული, რომ ჰეტისგან განსხვავებით, ედვარდი იყო ძალიან უდარდელი ინვესტორი, რომელსაც სპეკულაციები და ექსტრავაგანტური ცხოვრება იზიდავდა. მიუხედავად ამისა, მან არაერთხელ იხსნა ქმარი ვალისგან, ყოველ შემთხვევაში 1885 წლამდე, სანამ არ გაიგო, რომ ედვარდი, ზარალის შესამსუბუქებლად, ჰეტის თანხიდან $550,000-ის გამოყენებას მისი თანხმობის გარეშე აპირებდა. სამართლებრივი შეთანხმების წყალობით, ჰეტის ბანკმა ფულის გადაცემაზე უარი თქვა. მიუხედავად იმისა, რომ ისინი არ განქორწინებულან, ჰეტი და ედვარდი განცალკევდნენ და მათი ქორწინება სრულყოფილად არასდროს აღმდგარა.
გარდა ამისა, იქიდან გამომდინარე, რომ ჰენრიეტას, სესხის გაცემის მიზნით, მუდმივად ჭირდებოდა დიდი მოცულობის ნაღდი ფული, მან 1907 წლის პანიკის დროს კატასტროფის თავიდან აცილება შეძლო. ჰეტიმ დახმარების ხელი გაუწოდა ნიუ-იორკს მაშინ, როდესაც ბანკებმა ამაზე უარი თქვეს და იმ დროისათვის ბევრ მსხვილ ინვესტორს ჰქონდა მისი ვალი. აღსანიშნავია, რომ ქმართან განშორების შემდეგ მან მოაწყო თავისი ოფისი Chemical Bank-ში და უოლ სტრიტზე დიდი ქონება დააგროვა. ამ სფეროში მოღვაწე ბევრი მამაკაცი რეგულარულად ინტერესდებოდა ჰეტის საინვესტიციო რჩევებით, რის გამოც მას პრესამ კიდევ ერთი მეტსახელი მოუფიქრა — „უოლ სტრიტის დედოფალი“.
სიმდიდრე და ქველმოქმედება
ჰენრიეტამ თავისი უზარმაზარი ქონება დისციპლინირებული და კონსერვატიული მეთოდებით დააგროვა. 1905 წელს მან მან New York Times-ს განუცხადა: „მე ვყიდულობ მაშინ, როცა ფასი დაბალია და ინვესტირება არავის სურს. ინვესტიციებს მანამდე ვფლობ, სანამ ფასი გაიზრდება და ხალხს მათი შეძენა მოუნდება“. ჰეტი უარს ამბობდა ვალით ინვესტირებაზე და ზოგადად ფულის უძრავ ქონებაში დაბანდებას ამჯობინებდა. თუმცა იგი არ მიჰყვებოდა “buy and hold” ფილოსოფიას: „მე არასოდეს ვყიდულობ რამეს მხოლოდ შესანარჩუნებლად“ — ამბობდა ჰეტი. „ყველაფერს აქვს ფასი. როცა ამ ფასს მთავაზობენ, ვყიდი“.
მისმა ვაჟმა ჰეტის საინვესტიციო ფილოსოფია ასე ახსნა: „დედაჩემს არასდროს გამოუმუშავებია ფული სპეკულაციებით. გრინები სპეკულაციებით არ არიან დაკავებულნი. იგი ერთგვარი „ადამიანი ბანკი“ იყო. როდესაც ბაზარზე ფულის ნაკლებობა ჩნდებოდა, მას ყოველთვის საკმარისი თანხა ჰქონდა გასასესხებლად“.
საკუთარი რწმენიდან გამომდინარე, ჰეტი ქველმოქმედებით საჯაროდ არ იყო დაკავებული. თუმცა, მისი ვაჟის თქმით, იგი ფარულად უჭერდა მხარს სხვადასხვა საქველმოქმედო ორგანიზაციას და ასევე მინიმუმ 30 ოჯახს რეგულარული შემოსავლით უზრუნველყოფდა.
