მაიკლ ჯეიმს ბერი არის ამერიკელი ინვესტორი, რომელმაც 2000 წელს, მცირე მემკვიდრეობის საშუალებით, ჰეჯ-ფონდი — Scion Capital დააარსა. ამავდროულად იგი ექიმია, რომელიც სპეციალიზებულია ნევროლოგიაში. საინვესტიციო სამყაროში იგი ცნობილია იმით, რომ იწინასწარმეტყველა იპოთეკური კრიზისი, რომელიც აშშ-ში 2007-2010 წლების მანძილზე გრძელდებოდა. 2007 წელს მან მოკლე პოზიცია1 დაიკავა იპოთეკური ობლიგაციების ბაზარზე, რითაც გამოიმუშავა პირადი მოგება — $100 მილიონი, ხოლო Scion Capital-ის ინვესტორებს $700 მილიონი მოუტანა. 2008 წელს მან ჰეჯ-ფონდი დახურა, რათა თავის პირად ინვესტიციებზე ფოკუსირებულიყო. შემდეგ კი, 2011 წელს, დააარსა Scion Asset Management, კერძო საინვესტიციო ფირმა, რომელსაც ინვესტორი დღესაც მართავს.
2015 წელს იპოთეკური ბაზრის კრიზის შესახებ გადაღებულ ფილმში — The Big Short მაიკლი ცნობილმა მსახიობმა — კრისტიან ბეილმა განასახიერა. რეჟისორმა ადამ მაკკეიმ ჩარლზ რენდოლფთან ერთად დაწერა სცენარი (რომელმაც შემდეგ ოსკარი დაიმსახურა), რომელიც ადაპტირებულია მაიკლ ლუისის არამხატვრული წიგნის — The Big Short: Inside the Doomsday Machine-ის საფუძველზე.
პირადი ცხოვრება და განათლება
მაიკლ ჯეიმს ბერი 1971 წელს სახ ხოსეში, კალიფორნიაში დაიბადა და აქვე გაიზარდა. ორი წლის ასაკში მან მარცხენა თვალი დაკარგა კიბოს იშვიათი ფორმის გამო, რომელსაც რეტინობლასტომა ჰქვია. მას შემდეგ იგი თვალის პროთეზს ატარებს.
მაიკლმა ეკონომიკის ბაკალავრის ხარისხი მოიპოვა კალიფორნიის უნივერსიტეტში, ლოს-ანჯელესში, სადაც მან წინასამედიცინო კურსიც გაიარა. შემდეგ მან მიიღო დოქტორის ხარისხი ვანდერბილტის უნივერსიტეტის მედიცინის სკოლაში და მოგვიანებით დაიწყო რეზიდენტურა სტენფორდის უნივერსიტეტში, ნევროლოგიისა და პათოლოგიის მიმართულებით. სწავლის პერიოდში მაიკლი თავისუფალ დროს ინვესტიციებზე ფოკუსირებისთვის იყენებდა. მართალია, მაიკლი სამედიცინო სკოლაში სწავლობდა და ლიცენზირებული ექიმი გახდა, მაგრამ მას რეზიდენტურა არასოდეს დაუმთავრებია. რეზიდენტურის მეორე ნაწილის შუა პერიოდში მან გადაწყვიტა, ფინანსების სფეროში შეექმნა კარიერა. მიუხედავად იმისა, რომ მაიკლს სამედიცინო რეზიდენტურა არ დაუსრულებია და ექიმად არასოდეს უმუშავია, იგი ლიცენზიას მაინც ინარჩუნებს. მისთვის ეს წარმოადგენს შრომისმოყვარეობისა და თავდადების წლების ერთგვარ გამოხატულებას, რომლის დათმობაც არ სურს.
ბერის ჰყავს ცოლი და ორი ზრდასრული ვაჟი, რომელთაგან ერთ-ერთს ბავშვობაში ასპერგერის სინდრომის (აუტისტური სპექტრის აშლილობის ფორმა) დიაგნოზი დაუსვეს, რის შემდეგად მაიკლმა ამოაჩინა, რომ ეს სინდრომი მასაც აქვს. როგორც ასახულია ფილმში — The Big Short, ბერი ასევე ცნობილია იმით, რომ იგი მძიმე მეტალის მოყვარულია.
რა ტიპის ინვესტორია მაიკლ ბერი?
მაიკლ ბერი იყენებს სტრატეგიებს, რომლებიც ბრბოს მენტალიტეტისგან განსხვავდება და ამის თვალსაჩინო მაგალითი სწორედ იპოთეკური კრიზისის პერიოდში მის მიერ გაკეთებული საინვესტიციო სვლები იყო. თავად კი მაიკლი საკუთარ თავს ღირებულებაზე ორიენტირებულ ინვესტორად მოიაზრებს.
გარდა ამისა, იგი ცნობილია მთავრობის, განსაკუთრებით კი ფედერალური სარეზერვო სისტემის (Fed), ფინანსური პოლიტიკის კრიტიკით. 2010 წელს New York Times-თან ინტერვიუში მან განაცხადა: „მე შევამჩნიე, რომ კრიზისი ახლოს იყო. რატომ ვერ მოახერხა ეს Fed-მა?“.
[1] ეს არის საინვესტიციო აქტივობა, რომლის დროსაც ინვესტორი სესხულობს და ყიდის ფასიან ქაღალდებს იმ იმედით, რომ შემდგომში მათ უფრო იაფად შეიძენს.
