ადამიანების უმეტესობას ესაჭიროება როგორც სტაბილური შემოსავალი, ასევე თანმიმდევრული ინვესტირება, რათა ცხოვრების განმავლობაში სიმდიდრის დაგროვება შეძლოს. თუმცა, თუ საინვესტიციო სამყაროში წარმატების მიღწევა გსურთ, აუცილებელია, დისციპლინა გაგაჩნდეთ.
დისციპლინირებული ინვესტირება კარგად ჟღერს, მაგრამ ამის განხორციელება რეალურ სამყაროში, სადაც იცვლება ბაზრის პირობები, შემოსავალი, პირადი საჭიროებები და სურვილები, არც ისე მარტივია. თუ ნამდვილად გსურთ, დისციპლინირებული ინვესტორი იყოთ, ამ სფეროს წარმატებულ წარმომადგენლებს უნდა დააკვირდეთ, ცოდნის გაღრმავებაზე კონცენტრირდეთ და შეიმუშაოთ გეგმა, რომელიც საშუალებას მოგცემთ, სტაბილურობა ათწლეულების განმავლობაში შეინარჩუნოთ. დღევანდელ სტატიაში კი შემოგთავაზებთ 5 რჩევას, რომელიც ამ მიზნის მიღწევაში დაგეხმარებათ.
- დაიწყეთ ადრე და ინვესტირება რეგულარულ პროცესად აქციეთ
დისციპლინირებული ინვესტორები ინვესტირებას ადრე იწყებენ და ამ პროცესს ჩვევად აქცევენ. მათი სტრატეგია არა დიდი ფულის ერთჯერადად დაბანდებაში, არამედ რეგულარულად ინვესტირებაში მდგომარეობს. თვიდან თვემდე, წლიდან წლამდე ისინი ინვესტიციებს დებენ და რთული პროცენტის წყალობით მნიშვნელოვან სარგებელს იღებენ.
- ემოციებს თქვენი ქცევის განსაზღვრის საშუალებას ნუ მისცემთ
ინვესტირებაში არაფერი უნდა იყოს ემოციური. მიუხედავად იმისა, რომ მოგებისა და ზარალის მიღება მღელვარების ან შიშის გარეშე რთულია, თქვენ მიერ მიღებული გადაწყვეტილებები მათ არ უნდა ეყრდნობოდეს. ამ პროცესიდან ემოციების გამორიცხვა საშუალებას მოგცემთ, შეინარჩუნოთ არჩეული კურსი მაშინ, როდესაც ბაზარზე მოკლევადიან დადებით ან უარყოფით მოვლენებს აქვს ადგილი.
- კარგად გაიაზრეთ ბაზრის ციკლურობა
თუ საფონდო ბირჟაზე დიდი მოცულობის ინვესტიციები გაქვთ ჩადებული, შესაძლოა, ბაზრის მერყეობის დროს ემოციების კონტროლი განსაკუთრებით რთული იყოს. თუმცა, დისციპლინირებულ ინვესტორებს კარგად ესმით, რომ ბაზარი ციკლურია და მისთვის როგორც ზრდის, ასევე კლების პერიოდები სრულიად ბუნებრივია.
თუ აშშ-ის საფონდო ბირჟის ისტორიას გადავხედავთ ვნახავთ, რომ გრძელვადიან პერსპექტივაში ფართო ბაზარი მზარდი ტენდენციით ხასიათდება, ამიტომ პანიკამ არ უნდა შეგიპყროთ, როდესაც ინვესტირებას გრძელვადიანი მიდგომით ახორციელებთ.
- დააბალანსეთ საინვესტიციო პორტფელი
დივერსიფიკაცია დისციპლინირებული ინვესტირების ერთ-ერთი მთავარი პირობაა. მიუხედავად იმისა, რომ ხანდახან მთელი ფულის „დაუჯერებლად კარგ“ კომპანიებში ინვესტირების ცდუნება არსებობს, ამ მაღალი რისკის შემცველმა გადაწყვეტილებამ შეიძლება საბოლოოდ ძალიან დიდ ზარალამდე მიგიყვანოთ. თქვენი ფულის აქტივთა სხვადასხვა კლასზე სტრატეგიულად განაწილება კი საშუალებას მოგცემთ, რისკი დააბალანსოთ.
- მოთმინება გამოიჩინეთ
როდესაც ხედავთ, რომ დროთა განმავლობაში თქვენი ინვესტიციების ღირებულება იზრდება, დროდადრო გაგიჩნდებათ სურვილი, რომ მოკლევადიანი მიზნების მისაღწევად მისი ნაწილი გაანაღდოთ, თუმცა ამ შემთხვევაში რთული პროცენტით მაქსიმალურად სარგებლობას ვერ შეძლებთ. ინვესტირებისადმი გრძელვადიანი მიდგომის შენარჩუნება ძალიან მნიშვნელოვანია. ამას კი ქვემოთ მოცემული ფოტო ნათლად გვიჩვენებს.
ნელი, სტაბილური და სტრატეგიული
მიუხედავად იმისა, რომ, შესაძლოა, პოპულარული აქციების დევნა, მათი ხშირი ყიდვა-გაყიდვა უფრო სახალისო იყოს, მსგავსი მიდგომა სარისკო და არასტაბილურია. შეიძლება მიიღოთ დიდი მოგება, ან, პირიქით, საბოლოოდ ყველაფერი დაკარგოთ. ეს სრულიად სხვა მიდგომაა და არა ის, რაზეც ჩვენ ვამახვილებთ ყურადღება. გრძელვადიან პერსპექტივაში, დისციპლინირებული ინვესტირება ბევრად უფრო უსაფრთხო და ეფექტურია. მის აღსაწერად სამი სიტყვა გამოდგება: ნელი, სტაბილური და სტრატეგიული. თუ ეს სიტყვები მოსაწყენად ჟღერს, ალბათ მართალი ხართ. მაგრამ იცით რა არ არის მოსაწყენი? უყუროთ იმას, თუ როგორ იზრდება თქვენი ფული და გროვდება სიმდიდრე, რომელიც საბოლოოდ კომფორტულად ცხოვრების საშუალებას მოგცემთ.
