დღევანდელ რეალობაში პოტენციური ინვესტორებისთვის სულ უფრო მეტი საინვესტიციო შესაძლებლობა იხსნება, თუმცა ყველა მათგანი ხელსაყრელი არ არის. ამიტომ, სანამ ინვესტიციას ჩადებთ, მნიშვნელოვანია, ყველაფერი კარგად გათვალოთ, რათა არ დაზარალდეთ. დღეს სწორედ ამ საკითხის შესახებ ვისაუბრებთ და კარგი საინვესტიციო შესაძლებლობის 5 თვისებას განვიხილავთ. თუ კომპანიას ყველა ეს თვისება ან მათი უმეტესობა ახასიათებს, დიდი ალბათობით, ის თქვენთვის მნიშვნელოვანი სარგებლის მოტანას შეძლებს.
გრძელვადიანი პერსპექტივა
როგორც ლეგენდარული ინვესტორი — უორენ ბაფეტი ამბობს: „თუ აქციის ათი წლის განმავლობაში ფლობა არ გსურთ, მის ათი წუთით ფლობაზეც არ იფიქროთ“. ინვესტირება საუკეთესო შედეგს სწორედ გრძელვადიან პერსპექტივაში იძლევა, ამიტომ უნდა შეარჩიოთ ისეთი კომპანიები, რომელთა აქციების წლობით ფლობა თქვენთვის კომფორტული იქნება და, ამასთან, მნიშვნელოვან სარგებელს მოგიტანთ. ქვემოთ მოცემულ ფოტოზე შეგიძლიათ ნათლად იხილოთ, თუ რამდენად მნიშვნელოვანია ინვესტირებისას გრძელვადიანი მიდგომის შენარჩუნება.
საბაზრო კაპიტალიზაცია
შეადარეთ თქვენ მიერ შერჩეული კომპანიის საბაზრო კაპიტალიზაცია სხვა იმავე ღირებულების ბიზნესებს, რათა განსაზღვროთ ღირს თუ არა აქცია ის თანხა, რის გადახდასაც მისთვის აპირებთ. მაგალითად, თუ კომპანია სხვა მსგავს (ზომისა და პროდუქტის მიხედვით) ბიზნესთან შედარებით უფრო დაბალ მოგებას გამოიმუშავებს, თუმცა მისი აქციების ფასი უფრო მაღალია, მაშინ, როგორც წესი, მასში ინვესტირება არ ღირს.
კარგი ბიზნეს სტატისტიკა
შეგიძლიათ კომპანიაში ინვესტიცია მისი ხედვის ან ბრენდინგის საფუძველზე ჩადოთ, მაგრამ თუ ის მოგებას ვერ გამოიმუშავებს, არ გააჩნია კარგი მენეჯმენტი და, ამასთან, ძვირად არის შეფასებული, დიდი ალბათობით, ფულს დაკარგავთ. კარგად უნდა შეისწავლოთ კომპანიის სტატისტიკური მონაცემები, გაიგოთ იზრდება თუ არა მისი შემოსავალი და მოგება კვარტლიდან კვარტლამდე, წლიდან წლამდე, ვითარდება თუ არა ის და ა. შ. რათა გააზრებული გადაწყვეტილების მიღება შეძლოთ.
კომპანია ორიენტირებულია აქციების გამოსყიდვაზე
ერთი შეხედვით შესაძლოა იფიქროთ, რომ ეს ბიზნესის არასახარბიელო წარმადობის ნიშანია, თუმცა კომპანია, რომელიც აქციების გამოსყიდვით არის დაკავებული თავის ამჟამინდელ და დიდი ხნის აქციონერებს სიმდიდრის კიდევ უფრო გაზრდის საშუალებას აძლევს. აქციების გამოსყიდვის შედეგად კომპანიის მიერ გამოშვებული აქციების რაოდენობა მცირდება, შესაბამისად, მოქმედი აქციონერების წილი იზრდება. უფრო დიდი წილი კომპანიაში კი ნიშნავს მოგების მეტ ნაწილზე წვდომას დამატებითი ინვესტიციის გარეშე.
ადვილად გასაგები ბიზნეს მოდელი
როდესაც ბიზნესი მარტივად იმართება ის უფრო სტაბილურია და კარგი ზრდით ხასიათდება. ეს იმიტომ ხდება, რომ მარტივი ბიზნეს მოდელის მქონე კომპანიის გაფართოება უფრო სწრაფად შეიძლება, ახალი ლოკაციების გახსნა უფრო ადვილია, რაც, თავის მხრივ, მეტ მომხმარებელს, ბაზრის წილის გაზრდას და მეტ მოგებას ნიშნავს.
