ფილიპ ფიშერი იყო ცნობილი საინვესტიციო სტრატეგი და წიგნის — Common Stocks and Uncommon Profits — ავტორი. ფიშერის პრინციპები, რომელიც ცნობილია ინვესტიციებისადმი “buy-and-hold” მიდგომით (გრძელვადიანი საინვესტიციო სტრატეგია, რომელიც აქციების ყიდვას და მათი დიდი ხნის განმავლობაში ფლობას გულისხმობს), აქციების მზარდი პოტენციალის აღმოსაჩენად ფუნდამენტურ ანალიზს იყენებდა.
ინვესტორმა 1931 წელს დააარსა თავისი საინვესტიციო ფირმა — Fisher & Co. იგი 2004 წლის 11 მარტს, 96 წლის ასაკში გარდაიცვალა.
ადრეული ცხოვრება და განათლება
ფილიპ ფიშერი 1907 წლის 8 სექტემბერს სან-ფრანცისკოში, კალიფორნიაში დაიბადა და სტენფორდის უნივერსიტეტი ეკონომიკის ბაკალავრის ხარისხით დაამთავრა. მან კარიერა Anglo-London Bank-ში სან-ფრანცისკოში, ფასიანი ქაღალდების ანალიტიკოსობიდან დაიწყო.
Fisher & Co.
ფილიპ ფიშერი ზრდაზე ორიენტირებული ინვესტირების პიონერად ითვლება. 1931 წელს მან დააარსა Fisher & Co., თავის კლიენტებს ძლიერი შემოსავალი მოუტანა და ინსპირაციად იქცა უდიდესი ინვესტორებისთვის, რომელთა შორის უორენ ბაფეტიც არის.
ფიშერმა ინვესტორებს გრძელვადიანი, ზრდაზე ორიენტირებული ინვესტირების მეთოდი — “buy-and-hold” გააცნო. ის იყო პირველი, ვინც აქციების ღირებულება განიხილა პოტენციური ზრდის კუთხით, ნაცვლად მათი მიმდინარე ფასების ტენდენციებისა და აბსოლუტური ღირებულებისა. იგი ამბობდა: „მხოლოდ ხანდახან არსებობს საერთოდ რაიმე მიზეზი გაყიდვისთვის“. საკუთარ მეთოდზე დაყრდნობით, ფიშერმა Motorola-ს აქციები 1955 წელს შეიძინა და მათ 2004 წელს გარდაცვალებამდე ფლობდა.
1958 წელს ფილიპ ფიშერმა დაწერა Common Stocks and Uncommon Profits. მსოფლიო ომის შემდგომი bull market-ის დროს გამოქვეყნებული წიგნი გრძელვადიანი ზრდის პერსპექტივას შეეხება. ამ ნაშრომში ინვესტორი მკითხველებს ურჩევს, ფოკუსირდნენ ბიზნესებზე, რომლებიც თავიანთ სფეროში ლიდერები არიან, ორიენტირებულნი არიან კვლევასა და განვითარებაზე, ამასთან იმართებიან კვალიფიციური ხელმძღვანელების მიერ.
ფილიპ ფიშერი Fisher & Co-ს 1999 წელს პენსიაზე გასვლამდე ხელმძღვანელობდა.
Fisher Investments
1979 წელს ფილიპის ვაჟმა — კენ ფიშერმა დააარსა Fisher Investments, რომელიც აქტივებს კაპიტალიზმისა და თავისუფალი კაპიტალის ბაზრების რწმენით მართავდა. მიუხედავად იმისა, რომ მამამისი ყურადღებას ზრდაზე ორიენტირებულ ინვესტირებაზე ამახვილებდა და თავის საინვესტიციო მომსახურებას ინვესტორთა შერჩეულ ჯგუფს სთავაზობდა, კენმა საკუთარი კომპანია მასობრივი მარკეტინგის რწმენით დააარსა.
კენ ფიშერის თეორიულმა ნაშრომმა პოპულარიზაცია გაუწია P/S (ფასი/გაყიდვები) თანაფარდობას, როგორც ინსტრუმენტს მცირე კაპიტალიზაციის პორტფელების მართვისთვის. 2012 წლისთვის Fisher Investments ევროპაში გაფართოვდა. დღეს ფირმა და მისი შვილობილი კომპანიები ფუნქციონირებენ 13 ოფისით რვა ქვეყანაში და გლობალურად 100 000-ზე მეტ კლიენტს ემსახურებიან.
