ბევრი ინვესტორისთვის სავალალო წელი იყო. მაღალმა ინფლაციამ და მზარდმა საპროცენტო განაკვეთებმა დიდი ეკონომიკური გაურკვევლობა შექმნა, რამაც საფონდო ბირჟის მკვეთრი ვარდნა გამოიწვია. S&P 500-ს ხუთ ათწლეულზე მეტი ხნის განმავლობაში ყველაზე ცუდი პირველი ნახევარი ჰქონდა, იანვრიდან ივნისამდე ინდექსი 21%-ით დაეცა. 1970 წლის შემდეგ S&P 500 bear market-ის ტერიტორიაზე მეშვიდედ აღმოჩნდა.
მას შემდეგ ინდექსმა ზარალის ნაწილი გააბათილა, თუმცა bear market ოფიციალურად არ დასრულდება მანამ, სანამ ინდექსი ახალ მაქსიმუმს არ მიაღწევს. შესაძლოა ამას გარკვეული დრო დასჭირდეს. S&P 500-მა პიკს დაახლოებით 210 დღის წინ მიაღწია, მაგრამ ისტორიული მონაცემები აჩვენებს, რომ წარსული bear ბაზრები საშუალოდ 391 დღის განმავლობაში გაგრძელდა.
ვარდნის ხანგრძლივობისა და სიმძიმის შესახებ სპეკულირება გარკვეულწილად უაზროა. ასე რომ, ამ სტატიაში მოცემულია სამი რამ, რასაც საზრიანი ინვესტორები bear market-ის პერიოდში აკეთებენ.
პიტერ ლინჩი: შეინარჩუნეთ ინვესტიციები Bear Market-ის პერიოდში
ლეგენდარული ინვესტორი – პიტერ ლინჩი 13 წლის განმავლობაში Fidelity-ში Magellan Fund-ს მართავდა. ამ დროის განმავლობაში, მიუხედავად ორი bear market-ისა, ლინჩმა წლიური 29.2%-იანი შემოსავალი გამოიმუშავა და S&P 500-ის ანაზღაურებას ორჯერ აჯობა. ლინჩის თქმით, აქციებით ფულის გამომუშავების გასაღები არის ის, რომ ისინი პანიკის საფუძველზე არ გაყიდოთ.
Bear ბაზრები საშინელია. დაღმასვლის დროს თქვენი საინვესტიციო პორტფელის ღირებულის შემცირების ყურება რთულია და ამ ტიპის სტრესი ხშირად ირაციონალურ გადაწყვეტილებებს იწვევს. მაგალითად, ასეთ დროს შეიძლება საკუთარ თავს უთხრათ, რომ დროებით გაყიდით აქციებს და შემდეგ ისევ იყიდით მათ, როდესაც მდგომარეობა გამოსწორდება. პირველ რიგში, ბაზართან სინქრონიზება შეუძლებელია და, გარდა ამისა, ეს საბოლოოდ იქამდე მიგიყვანთ, რომ გაყიდით იაფად და იყიდით ძვირად, რაც მოგებას ნამდვილად არ მოგიტანთ.
თუ ინვესტირებამდე სათანადო კვლევა ჩაატარეთ და bear market-ის დროს კომპანიის ბიზნესის საფუძვლებში არაფერი შეცვლილა, მაშინ პოზიციები უნდა შეინარჩუნოთ და ბაზრის აღდგენას დაელოდოთ.
შელბი დევისი: Bear ბაზრები ყიდვის შესაძლებლობებს წარმოქმნის
შელბი დევისი არ არის ისეთი ცნობილი, როგორც უორენ ბაფეტი ან პიტერ ლინჩი, მაგრამ მისი ისტორია არანაკლებ შთამაგონებელია. 1947 წელს, როდესაც ის 38 წლის იყო, დევისმა საფონდო ბირჟაზე $50,000 დააბანდა. 1994 წლისთვის, როდესაც უკვე 8 bear market-ჩაიარა, შელბი Forbes 400 სიაში მოხვდა და მისი პორტფელის ღირებულება $900 მილიონს შეადგენდა. შესაძლოა, ეს წარმატება მიეკუთვნებოდეს მის უნარს, კარგად შეაფასოს შესყიდვის შესაძლებლობები. ერთხელ დევისმა თქვა: „თქვენი ფულის უმეტეს ნაწილს bear market-ზე გამოიმუშავებთ, უბრალოდ ამას გვიან აცნობიერებთ.“
ადამიანის ბუნებაა წარმატებულ პერიოდებში ზედმეტი ოპტიმიზმის, ხოლო ცუდ სიტუაციებში ზედმეტი პესიმიზმის გამოჩენა. შედეგად, bull market-ის დროს აქციების ფასები ზედმეტად იზრდება, ხოლო bear market-ის დროს – გადამეტებულად მცირდება. ეს ნიშნავს, რომ აქციების შესაძენად ვარდნა განსაკუთრებით კარგი დროა.
უორენ ბაფეტი: ყველა გაიაფებული აქცია კარგი საინვესტიციო შესაძლებლობა არ არის
უორენ ბაფეტი ფართოდ არის აღიარებული, როგორც ჩვენი დროის ერთ-ერთი უდიდესი ინვესტორი და ეს რეპუტაცია დამსახურებულია. მისი ხელმძღვანელობით, Berkshire Hathaway-ის აქციონერებმა 1965 წლიდან 2021 წლამდე პერიოდში 20.1%-ის ტოლი წლიური ანაზღაურება მიიღეს. ამ წარმატების დიდი ნაწილია ბაფეტის მიერ მომგებიანი ინვესტიციების შერჩევის განსაკუთრებული უნარებით არის განპირობებული.
ბაფეტი ორიენტირებულია ისეთ ბიზნესებზე, რომლებსაც მდგრადი კონკურენტული უპირატესობა გააჩნია. Apple-ის ბრენდის ავტორიტეტი სამომხმარებლო ელექტრონიკაში, Amazon-ის ინტელექტუალური საკუთრება ქლაუდ გამოთვლებში და Bank of America-ს ფინანსური სერვისების მიწოდების მასშტაბი, ამის კარგი მაგალითებია და უორენ ბაფეტი Berkshire Hathaway-ის მეშვეობით სამივეს ფლობს.
შეჯამების სახით შეიძლება ითქვას, რომ bear ბაზრები აქციების შესაძენად შესანიშნავი დროა, მაგრამ ამ შემთხვევაშიც აუცილებელია, რომ ინვესტიციები სწორად შეარჩიოთ. ინვესტორებმა უნდა მოძებნონ ბიზნესი ზრდის ძლიერი პერსპექტივით და კონკურენტული უპირატესობებით.
