რეცესიის შიში ახლა ბევრ ინვესტორს აწუხებს და ზოგიერთი მათგანი საინვესტიციო პორტფელის ღირებულება საგრძნობლად შემცირდა. ეს შეიძლება მართლაც საშინელი იყოს, მით უმეტეს, რომ თქვენ ეკონომიკის მოქმედების კონტროლის უნარი არ შეგწევთ. თუმცა შეგიძლიათ, რომ თქვენი საინვესტიციო პროცესი აკონტროლოთ. ამ სტატიაში მოცემული ოთხი დამანგრეველი შეცდომის თავიდან აცილება, შესაძლოა, თქვენი დანაკარგების შემცირებაში დაგეხმაროთ.
- დივერსიფიკაციაზე უარის თქმა
საინვესტიციო პორტფელის დივერსიფიკაციის საშუალებით თქვენი რისკები გადაანაწილეთ. შეეცადეთ თქვენი ფული რამდენიმე სექტორის მინიმუმ 25 განსხვავებულ აქციაზე გაანაწილოთ იმისთვის, რომ ერთი კომპანიის ან სექტორის დაზარალებამ თქვენზე დიდად არ იმოქმედოს.
საინდექსო ფონდში ინვესტირება არის ერთ-ერთი საუკეთესო გზა, რომელიც ერთი შესყიდვით პორტფელის დივერსიფიკაციის საშუალებას გაძლევთ. S&P 500-ის ზოგიერთი საუკეთესო საინდექსო ფონდის საკომისიო გადასახადი ყოველ $10,000-ზე ყოველწლიურად მხოლოდ $3 იქნება.
რა თქმა უნდა, საინდექსო ფონდში ინვესტირება ვერ იქნება იმის გარანტი, რომ ფულს არ დაკარგავთ, მაგრამ გრძელვადიან პერსპექტივაში, ისინი, როგორც წესი, ინვესტორებს ძლიერი შემოსავლით უზრუნველყოფს.
- ზედმეტად კონსერვატიულად ინვესტირება
შესაძლოა, კონსერვატიულად ინვესტირება დაგეხმაროთ, რომ თავი უფრო დაცულად იგრძნოთ, განსაკუთრებით მაშინ, როდესაც თვალს შესაძლო რეცესიას ადევნებთ. თუმცა, ზედმეტად კონსერვატიულად ინვესტირებამ, შეიძლება, დანაკარგებთან ერთად, თავიდან დიდი მოგებაც აგარიდოთ. შედეგად, მოგიწევთ, რომ კიდევ უფრო მეტი ფული დაზოგოთ იმისთვის, რომ თქვენს ფინანსურ მიზნებს მიაღწიოთ.
ახლა შესანიშნავი დროა იმისთვის, რომ საინვესტიციო პორტფელს გადახედოთ და დარწმუნდეთ, რომ თქვენი ინვესტიციები თქვენს რისკისადმი ტოლერანტობას ემთხვევა. თუ ზარალით ხართ შეშფოთებული, შესაძლოა, შედარებით კონსერვატიული ინვესტიციების ჩადება დაგჭირდეთ, მაგრამ დროთა განმავლობაში ბაზრის პირობების ცვლილებასთან ადაპტირების უნარი უნდა გაგაჩნდეთ.
თუ ფიქრობთ, რომ თქვენი საინვესტიციო პორტფელი ადეკვატურად დივერსიფიცირებულია და დანაზოგების უახლოეს მომავალში გამოყენებას არ აპირებთ, მაშინ, შეიძლება, თქვენი ინვესტიციები ხელუხლებელი დატოვოთ.
- ბაზართან სინქრონიზების მცდელობა
ბაზართან სინქრონიზების მცდელობა არასდროს არის კარგი იდეა, რადგან ეს, სავარაუდოდ, ცუდად დასრულდება. ყიდვის მცდელობა მაშინ, როდესაც ფასები ყველაზე დაბალია და გაყიდვა მაშინ, როდესაც ფასები მაქსიმალურ დონეზეა, არის ის, რასაც გამოცდილი ინვესტორებიც კი არ ცდილობენ, რადგან ბაზრის ყოველდღიურ რყევებს ვერავინ იწინასწარმეტყველებს.
დარჩით გრძელვადიან პერსპექტივაზე ორიენტირებული. მოძებნეთ ისეთ წარმატებული კომპანიები, რომლებსაც რთულ პერიოდებში გადარჩენის უნარი შესწევს. თუ თქვენი საინვესტიციო პორტფელის ღირებულების ცვლილების ყურება სტრესის დონის ზრდას იწვევს, ის ნაკლებად ხშირად შეამოწმეთ.
- საგანგებო ფონდის ან მოკლევადიანი დანაზოგების ინვესტირება
ინვესტიციებში მხოლოდ ის ფული უნდა ჩადოთ, რომლის გამოყენებასაც მინიმუმ მომდევნო ხუთი წლის განმავლობაში არ აპირებთ. საგანგებო ფონდი და მოკლევადიანი მიზნებისთვის საჭირო ფულადი სახსრები შეინახეთ შემნახველ ანგარიშზე, რომელზე წვდომაც მარტივად გექნებათ.
თქვენი მოკლევადიანი დანაზოგების ინვესტირება სახიფათოა, განსაკუთრებით რეცესიის პერიოდში, რადგან არსებობს შანსი, რომ იმ შემთხვევაში, თუ ფული დაგჭირდებათ, იძულებული გახდებით თქვენი პოზიციები ზარალით გაყიდოთ. კარგ ეკონომიკურ პირობებშიც კი, ამ რისკზე წასვლა არ ღირს.
ზემოთ ჩამოთვლილი შეცდომების თავიდან აცილებით, შეძლებთ, რომ ზარალის განცდის რისკი შეამციროთ. ამას გარდა, აუცილებელია გახსოვდეთ, რომ მოკლევადიანი რყევების ნაცვლად, გრძელვადიან პერსპექტივაზე უნდა ორიენტირდეთ.
