წარმატებულ ინვესტორებად ერთ დღეში არ ყალიბდებიან. ფინანსური სამყაროს და საკუთარი პიროვნების, როგორც ინვესტორის შესწავლას დრო და მოთმინება სჭირდება, რომ აღარაფერი ვთქვათ გამოცდილების დაგროვებასა და შეცდომებზე სწავლაზე. დღევანდელ სტატიაში გაგაცნობთ საინვესტიციო ექსპედიციის პირველ შვიდ საფეხურს და გაჩვენებთ, თუ რას უნდა მიაქციოთ ყურადღება ამ მოგზაურობის დროს.
- ინვესტირების დაწყება
წარმატებული ინვესტირება არის მოგზაურობა და არა ერთჯერადი მოვლენა, ამიტომ უნდა მოემზადოთ ისე, თითქოს ხანგრძლივ ექსპედიციაში მიდიხართ. დაიწყეთ დანიშნულების ადგილის განსაზღვრით და საინვესტიციო მოგზაურობა ამის შესაბამისად დაგეგმეთ. მაგალითად, პენსიაზე გასვლას 20 წლის შემდეგ, 55 წლის ასაკში აპირებთ? რამდენი ფული დაგჭირდებათ ამის გასაკეთებლად? ჯერ ეს კითხვები უნდა დასვათ. გეგმა, რომელსაც შექმნით, თქვენს საინვესტიციო მიზნებზე იქნება დამოკიდებული.
- გაიაზრეთ, როგორ მუშაობს ბაზარი
იკითხეთ წიგნები ან გაიარეთ საინვესტიციო კურსი, რომელიც თანამედროვე ფინანსურ იდეებს ეხება. ინვესტირება მეცნიერებისა (ფინანსური საფუძვლები) და ხელოვნების (ხარისხობრივი ფაქტორების) ერთობლიობაა. ფინანსების სამეცნიერო ასპექტი დასაწყებად კარგი ადგილია და ის იგნორირებული არ უნდა იყოს. თუ მეცნიერება თქვენი ძლიერი მხარე არ არის, ნუ იდარდებთ, არსებობს მრავალი ნაშრომი, მაგალითად, ჯერემი სიგელის Stocks For The Long Run, რომელიც რთულ ფინანსურ იდეებს მარტივად და გასაგებად ხსნის.
მას შემდეგ რაც გაიგებთ, თუ რა მუშაობს ბაზარზე, შეძლებთ თქვენთვის შესაფერისი მარტივი წესები ჩამოაყალიბოთ. მაგალითად, ლეგენდარული ინვესტორის — უორენ ბაფეტის საინვესტიციო სტილი შეიძლება ამ ერთი ციტატით შევაჯამოთ: „არასოდეს ჩადოთ ინვესტიცია იმ ბიზნესში, რომელიც არ გესმით“.
- გაიაზრეთ თქვენი საინვესტიციო სტრატეგია
თქვენზე უკეთ არავინ იცნობს თქვენს პიროვნებას. აქედან გამომდინარე, შეიძლება იყოთ ყველაზე კვალიფიციური ადამიანი, საკუთარი ინვესტიციების წარსამართად — მხოლოდ ცოტა დახმარება გჭირდებათ. დაადგინეთ პიროვნული თვისებები, რომლებიც დაგეხმარებათ ან ხელს შეგიშლით წარმატებულად ინვესტირებაში და ისინი შესაბამისად მართეთ.
ძალიან სასარგებლო ქცევითი მოდელი, რომელიც ეხმარება ინვესტორებს საკუთარი თავის გაგებაში, შეიმუშავეს ფონდის მენეჯერებმა — ტომ ბეილარდმა, ლარი ბიჰლმა და რონ კაიზერმა.
მოდელი ინვესტორებს ორი პიროვნული მახასიათებლის მიხედვით ახარისხებს: მოქმედების მეთოდი (ფრთხილი ან იმპულსური) და თავდაჯერებულობის დონე (თავდაჯერებული ან მშფოთვარე). ამ პიროვნული თვისებების საფუძველზე, BB&K მოდელი ინვესტორებს ხუთ ჯგუფად ყოფს:
- ინდივიდუალისტი — ყურადღებიანი და თავდაჯერებული, ხშირად იღებს ინიციატივას საკუთარ თავზე
- ავანტიურისტი — არასტაბილური, ანტერპრენერი და გაბედული
- სახელგანთქმული — უახლესი საინვესტიციო ტენდენციების მიმდევარი
- მცველი — რისკისადმი ნეგატიურად განწყობილი, სიმდიდრის შემნახველი
- კეთილსინდისიერი ადამიანი — თანაბრად იზიარებს ყველა ზემოთ ჩამოთვლილ მახასიათებლებს
გასაკვირი არ არის, რომ საუკეთესო საინვესტიციო შედეგებს, როგორც წესი, აღწევს ინდივიდუალისტი, ან ის, ვინც ამჟღავნებს ანალიტიკურ ქცევას, თავდაჯერებულობას და კარგად აფასებს ღირებულებას. თუმცა, თუ დაადგენთ, რომ თქვენი პიროვნული თვისებები წააგავს ავანტიურისტს, მაინც შეგიძლიათ ინვესტირებაში წარმატებას მიაღწიოთ, თუ სტრატეგიას შესაბამისად შეცვლით. სხვა სიტყვებით რომ ვთქვათ, მიუხედავად იმისა, თუ რომელ ჯგუფში მიეკუთვნებით, ძირითადი აქტივები სისტემატური და დისციპლინირებული გზით უნდა მართოთ.
- იცნობდეთ საკუთარ მეგობრებსა და მტრებს
უფრთხილდით ცრუ მეგობრებს, რომლებიც თავს გაჩვენებენ, რომ თქვენს მხარეს არიან. მათ მიეკუთვნება, მაგალითად, არაკეთილსინდისიერი საინვესტიციო პროფესიონალები, რომელთა ინტერესები შეიძლება თქვენსას ეწინააღმდეგებოდეს. ასევე უნდა გახსოვდეთ, რომ, როგორც ინვესტორი, კონკურენციას უწევთ მსხვილ ფინანსურ ინსტიტუტებს, რომლებსაც მეტი რესურსი გააჩნიათ, მათ შორის უფრო მეტი და სწრაფი წვდომა ინფორმაციაზე.
დაიმახსოვრეთ, რომ საკუთარი თავის ყველაზე დიდი მტერი თავად ხართ. თქვენი პიროვნებიდან, სტრატეგიიდან და კონკრეტული გარემოებებიდან გამომდინარე, შესაძლოა საკუთარ წარმატებას ხელს უშლიდეთ. მაგალითად, „მცველი“ ეწინააღმდეგება საკუთარი პიროვნების ტიპს, თუ ის ბაზრის უახლეს ტენდენციების მიჰყვება და მოკლევადიან მოგებაზეა ორიენტირებული.
- იპოვეთ სწორი საინვესტიციო გზა
თქვენ მიერ არჩეულ საინვესტიციო გზას თქვენი ცოდნის დონე, პიროვნება და რესურსები უნდა განსაზღვრავდეს. ზოგადად, ინვესტორები შემდეგ სტრატეგიათაგან ერთ-ერთს ირჩევენ:
- არ ჩადოთ ყველა კვერცხი ერთ კალათაში. სხვა სიტყვებით რომ ვთქვათ, დივერსიფიკაციას მიმართეთ.
- ყველა თქვენი კვერცხი ერთ კალათაში ჩადეთ, მაგრამ ყურადღებით აკონტროლეთ ინვესტიციები.
- გამოიყენეთ ამ ორი სტრატეგიის ნაზავი.
ყველაზე წარმატებული ინვესტორები დაბალრისკიანი, დივერსიფიცირებული საინვესტიციო პორტფელით იწყებენ და თანდათან გამოცდილებას აგროვებენ. დროთა განმავლობაში სათანადო ცოდნის მიღების შემდეგ, ისინი უფრო აქტიურ პოზიციებზეც ორიენტირდებიან.
- შეინარჩუნეთ გრძელვადიანი პერსპექტივა
როგორც უკვე აღვნიშნეთ, ინვესტირება გრძელვადიანი მოგზაურობაა, რომელიც დისციპლინას და მოთმინებას მოითხოვს. იყავით კონცენტრირებული თქვენს საინვესტიციო მიზნებზე, ნუ მიიღებთ გადაწყვეტილებებს ბაზრის მოკლევადიანი რყევებიდან გამომდინარე და მუდამ შეინარჩუნეთ გრძელვადიანი მიდგომა. გახსოვდეთ, სიმდიდრის დაგროვებას დრო და თანმიმდევრულობა სჭირდება.
- კონცენტრირდით განათლებაზე
ბაზრის პროგნოზირება რთულია, მაგრამ ერთი რამ ცხადია — ის არასტაბილური იქნება. დროდადრო, ბაზარი დაგიმტკიცებთ, რომ ცდებით. აღიარეთ ეს და თქვენს შეცდომებზე ისწავლეთ. დაუთმეთ დრო ფინანსურ განათლებას. იკითხეთ წიგნები პერსონალური ფინანსებზე, ინვესტირებაზე; თვალი ადევნეთ რეპუტაციულ ფინანსურ ვებგვერდებს და ბლოგებს; დაესწარით სემინარებს და ა. შ. რაც უფრო მეტი ცოდნა გექნებათ, მით უფრო მომგებიანი საინვესტიციო გადაწყვეტილებების მიღებას და მუდმივად ცვალებად ფინანსურ ლანდშაფტთან ადაპტირებას შეძლებთ.
