როდესაც საქმე ინვესტირებას ეხება გარანტიები არ არსებობს. მიუხედავად იმისა, ინვესტიციას დროში, ფულში თუ ენერგიაში ახორციელებთ, ყოველთვის არსებობს რისკი, რომ ვითარება თქვენთვის არასასურველად წარიმართება.
ამ სტატიაში მოცემულია 5 ინვესტიცია, რომლის პოზიტიური შედეგი თითქმის გარანტირებულია.
- S&P 500
მდგომარეობის გამოსწორებას ბაზარმა, შესაძლოა, ხვალ, მომავალ კვირას ან თუნდაც მომავალ წელს ვერ მიაღწიოს, მაგრამ ისტორია გვიჩვენებს, რომ გრძელვადიან პერსპექტივაში S&P 500 აღმავალი მიმართულებით მოძრაობს.
როდესაც ბაზარზე რთული სიტუაცია იქმნება, როგორც ეს ახლა ხდება, სასარგებლოა, საჭირო პერსპექტივისთვის, S&P 500-ის ისტორიულ სქემას გადახედოთ.
გამოსავალი საკმაოდ მარტივია: ძალიან დიდი ალბათობით, აშშ-ის 500 უმსხვილეს კომპანიაში ინვესტირება დადებით შედეგს მოგიტანთ, თუ ამ ინვესტიციას საკმარის დროს დაუთმობთ.
- დამატებითი შემოსავალი
შემოსავლის გაზრდის ერთ-ერთი ყველაზე მარტივი გზა არის დამატებითი საქმიანობით დაკავება. ამ გზით გამომუშავებული ფული, შეიძლება, ნიშნავდეს ძალიან საჭირო შვებულებას, თქვენი საგანგებო ფონდის გაძლიერებას ან დამატებით დანაზოგს თქვენი მომავლისთვის. დამატებით სხვაგან მუშაობის ნაცვლად, ასევე, შეგიძლიათ საკუთარი ბიზნესი წამოიწყოთ, თუ ამისთვის მზად ხართ.
- უფრო მაღალი ხელფასი
თქვენი სიმდიდრის გაზრდის ერთ-ერთი ყველაზე სწრაფი გზა ხელფასის გაზრდაა. პრობლემა ის არის, რომ ადამიანების უმეტესობა ამ საკითხს არასწორად აღიქვამს.
იმის ნაცვლად, რომ უბრალოდ უფრო მაღალი ანაზღაურება მოითხოვოთ, საკითხს უფრო სტრატეგიული გზით უნდა მიუდგეთ. მაშინაც კი, თუ თქვენი უფროსი თანაუგრძნობს ისეთ რთულ სიტუაციებს, როგორიც არის ცხოვრების მაღალი ხარჯები, კომპანიები ფულის გამომუშავებაზე არიან ორიენტირებულნი, ამიტომ, უფროსი თქვენი ხელფასის გაზრდას არ მოისურვებს. ამ მიმართულებით უფრო წარმატებული იქნებით, თუ უფროსს მიაწვდით იდეას, რომელიც ბიზნესს ღირებულებას შემატებს და ცხოვრებას ყველას გაუადვილებს. ამის გაკეთების ორი ყველაზე აშკარა გზა ხარჯების შემცირება და გაყიდვების გაზრდაა.
თუ ამის განხორციელებას შეძლებთ, კომპანიას მეტი ფულადი რესურსი გამოუთავისუფლდება და, შესაბამისად, თქვენთვის ხელფასის მომატების პერსპექტივაც უფრო ლოგიკური გახდება.
- ცოდნაში ინვესტირება
საფონდო ბირჟის კრახის გადატანა ბევრი ინვესტორისთვის, შეიძლება, რთული იყოს. ასეთ დროს ბევრი ბაზრების სამუდამოდ დატოვების გადაწყვეტილებას მიიღებს, მაგრამ საზრიანი ინვესტორები bear ბაზრებს ჭკვიანურად იყენებენ.
თქვენი ცოდნის გაზრდა ისეთ თემებზე, როგორიც არის საინვესტიციო თეზისის აღწერა, ფინანსური სიახლეების ანალიზი და აქციების კვლევა, თქვენი საინვესტიციო პორტფელის გრძელვადიან წარმადობაზე დიდ გავლენას იქონიებს.
- ის, რასაც თქვენთვის ბედნიერება მოაქვს
მიუხედავად იმისა, რომ ეს, შესაძლოა, მოგებისა და ზარალის გრაფიკზე ნაჩვენები არ იყოს, ინვესტიციის ჩადება ისეთ რამეში, რაც სიამოვნებას განიჭებთ, რა თქმა უნდა, ძალიან მნიშვნელოვანია თქვენი ჯანმრთელობისა და ბედნიერებისთვის.
ახალი ჰობით დაკავება, ოჯახთან და მეგობრებთან ერთად დროის გატარება ან ახალი არასამუშაო პროექტების წამოწყება თქვენს ცხოვრებას არა მხოლოდ მრავალფეროვნებასა და ბალანსს მატებს, არამედ გონებას გარკვეული დროით გადართვის და დასვენების საშუალებას აძლევს. გრძელვადიან პერსპექტივაზე ორიენტირებული ინვესტორებისთვის კი ბაზარზე, მოკლევადიან პერიოდში განვითარებულ განვითარებული მოვლენებისგან თავის დაღწევა, შესაძლოა, დიდი უპირატესობა იყოს.
რესურსების განაწილება
აქციების ან სხვა აქტივების შეძენა ინვესტირების ერთადერთი განმარტება არ არის. როდესაც თქვენ რესურსებს ანაწილებთ, ესეც ინვესტირებაა. ფულთან ერთად, ჩვენი ყველაზე ძვირფასი რესურსები დრო და ენერგიაა. მათი დახარჯვის გზები ჩვენს ჯანმრთელობასა და ბედნიერებაზე დიდ გავლენას ახდენს.
ომაჰას ორაკულმა – უორენ ბაფეტმა ეს აზრი მშვენივრად გამოთქვა: „ყველაზე მნიშვნელოვანი ინვესტიცია ის არის, რომელსაც საკუთარ თავში დებთ.“
საკუთარ თავში ინვესტირება არის გზა, რომ უფრო ჭკვიანი, ბედნიერი და მდიდარი გახდეთ.
