ყველა საინვესტიციო ექსპერტი ვერ იქნება, თუმცა არსებობს რამდენიმე ძირითადი რჩევა, რომელთა გათვალისწინებითაც დამწყებ ინვესტორსაც კი შეუძლია, თავისი ინვესტიციები მაქსიმალურად გამოიყენოს. სწორი საინვესტიციო დაგეგმვა დიდი შემოსავლის მისაღებად ერთ-ერთ უმნიშვნელოვანეს ფაქტორს წარმოადგენს.
დამწყები ინვესტორი, რომელსაც სხვადასხვა საინვესტიციო გზების შესახებ ნაკლები ცოდნა გააჩნია, შეიძლება ადვილად მოიხიბლოს პროდუქტით, რომელიც ბაზარზე დაწინაურებულია. თუმცა, ასეთი პროდუქტი შესაძლოა მის საინვესტიციო მიზნებს არ აკმაყოფილებდეს ან შემდგომ ეტაპზე უვარგისი აღმოჩნდეს. ასეთი შეცდომების თავიდან ასარიდებლად შემოგთავაზებთ რჩევებს, რომლებიც თქვენი შედეგების გაუმჯობესებაში დაგეხმარებათ.
ჩაატარეთ კვლევა
ფულის ინვესტირებამდე კვლევა უპირველეს ამოცანას წარმოადგენს. შეისწავლეთ კომპანიის წარსული საქმიანობა, ფინანსური კოეფიციენტები, ზრდის პერსპექტივები და ა.შ. კვლევა დაგეხმარებათ გაიგოთ, თუ რომელი საინვესტიციო პროდუქტია შედარებით უსაფრთხო და რომელი ექვემდებარება უკიდურეს ცვალებადობას. სასიცოცხლოდ მნიშვნელოვანია, რომ ინვესტორებმა დრო დაუთმონ კომპანიების კვლევას, რათა სწორი საინვესტიციო გადაწყვეტილებები მიიღონ. აქციების მხოლოდ სხვის რჩევებზე ან კომპანიის შესახებ არსებულ ზედაპირულ წარმოდგენებზე დაყრდნობით შეძენა კარგ შედეგს ნამდვილად არ მოგიტანთ.
განსაზღვრეთ რისკისადმი თქვენი ტოლერანტობის დონე
გაიაზრეთ რისკისადმი თქვენი ტოლერანტობის დონე და დაფიქრდით, როგორ იგრძნობდით თავს მთელი ინვესტირებული თანხა ან მისი ნაწილი რომ დაგეკარგათ. ახალბედა ინვესტორებს შორის გავრცელებული შეცდომა სწორედ ამ ფაქტორის არასწორად შეფასებაა. რეალურად, როდესაც მათი შედარებით სარისკო ინვესტიციების ღირებულება ეცემა, ისინი პანიკის საფუძველზე გაყიდვას იწყებენ. რისკისა და ანაზღაურებისადმი გააზრებული მიდგომა საშუალებას მოგცემთ, რომ ინვესტიციები რისკისადმი თქვენი ტოლერანტობის დონის შესაბამისად შეარჩიოთ. გახსოვდეთ, რომ ყველაფერი, რასაც აკეთებთ რისკს შეიცავს — ეს ნაღდი ფულის შენახვასაც ეხება, რადგან, შესაძლოა, მისი მსყიდველობითი უნარი ინფლაციის გამო შემცირდეს.
განსაზღვრეთ ინვესტიციის მიზანი
ინვესტირების მიზანი შეიძლება იყოს პენსიაზე მშვიდად გასვლა, სახლის შეძენა, თქვენი შვილის განათლებისთვის საჭირო თანხის მოგროვება და ა. შ. მიზნის სწორად დადგენა დაგეხმარებათ, საინვესტიციო დროის ჰორიზონტიც განსაზღვროთ, ანუ გაიგოთ, მოკლევადიანია თქვენი ინვესტიცია, საშუალოვადიანი, თუ გრძელვადიანი. შემდეგ კი სწორედ ამ ფაქტორებს გაითვალისწინებთ თქვენთვის შესაფერისი ინვესტიციების შერჩევისას.
აკონტროლეთ ემოციები
ემოციების კონტროლი ადვილი ნამდვილად არ არის და როცა ფულს კარგავთ, შეიძლება იფიქროთ, რომ ეს მუდმივად გაგრძელდება. თუმცა საფონდო ბირჟის ვარდნა სამუდამოდ არასოდეს გაგრძელებულა. როდესაც გრძნობთ, თითქოს თქვენი გეგმები ინგრევა და საინვესტიციო პორტფელი ნადგურდება, შესაძლოა, პანიკისგან გათავისუფლებაში ბირჟის ისტორიული მონაცემების გადახედვა დაგეხმაროთ.
მაგალითად, 2000 წლიდან 2002 წლამდე, თუ ინვესტიციას მხოლოდ დიდი კაპიტალიზაციის აქციებში ჩადებდით, მთლიანობაში დაახლოებით 38%-ს დაკარგავდით. $100,000 დოლარი რომ დაგებანდებინათ, თქვენი ინვესტიციის ღირებულება დაახლოებით $62,000-მდე შემცირდებოდა. თუმცა 2006 წლისთვის თქვენი საინვესტიციო პორტფელის ღირებულება საწყის მდგომარეობას ოდნავ გადააჭარბებდა კიდეც.
თავი აარიდეთ სპეკულაციას
დამწყებმა ინვესტორმა არასოდეს უნდა განიხილოს საინვესტიციო გზა ან პროდუქტი, რომელიც სპეკულაციაზეა დაფუძნებული. გაუაზრებელი გადაწყვეტილებების შედეგად შეძენილი ნებისმიერი აქცია არის სპეკულაცია და არა ინვესტიცია. ეს უკანასკნელი არის ის, რაც თავს კომფორტულად გაგრძნობინებთ და მისი დიდხანს შენარჩუნების სურვილი გაგაჩნიათ.
