ბაზარზე არსებულმა მღელვარებამ შეიძლება გვაცდუნოს, დაგვავიწყოს გრძელვადიანი მიზნები და ჩვენი საინვესტიციო სტრატეგია სრულიად მოშალოს. არავინ იცის, როგორ განვითარდება მომავალში მოვლენები, თუმცა არსებობს დროში გამოცდილი სტრატეგიები, რომლებიც დაგეხმარებათ, თქვენს მომავალზე უფრო კონცენტრირებული იყოთ.
- პროცესი ავტომატური გახადეთ
როდესაც ვრცელდება ინფორმაციები ბაზრის მერყეობის, პოლიტიკური თუ ფინანსური მოვლენების შესახებ, ინვესტორებმა, შესაძლოა, გადაწყვეტილებები ემოციებზე დაყრდნობით მიიღონ. შედეგად, მაღალი შემოსავლის მიღების სურვილი მათ ხშირად პიკში ყიდვისკენ უბიძგებს, მეორეს მხრივ, ბაზრის ვარდნის დროს, პანიკის გამო ისინი ინვესტიციების დაბალ ფასად ყიდიან. ორივე ქმედება ეწინააღმდეგება ინვესტირების მთავარ კანონს — იყიდე იაფად, გაყიდე ძვირად.
ამის ნაცვლად, უმჯობესია რეგულარულად ინვესტირებაზე ორიენტირდეთ. მარტივი გზაა ავტომატური საინვესტიციო გეგმის შექმნა. ეს ნიშნავს, რომ ყოველთვიურად წინასწარ განსაზღვრულ თანხას ინვესტიციებში დააბანდებთ. ასეთი სტრატეგია საშუალებას მოგცემთ იყიდოთ მეტი აქცია, როდესაც ფასები დაბალია და — ნაკლები, როდესაც ფასები მაღალია.
- ნუ დაიწყებთ მომავლის გამოცნობას — შეინარჩუნეთ ინვესტიციები
კვლევები ადასტურებს, რომ საუკეთესო სტრატეგია არა ბაზრის მოძრაობებთან სინქრონიზება, არამედ წინასწარ კარგად შემუშავებული საინვესტიციო სტრატეგიის მიხედვით მოქმედებაა.
დაიმახსოვრეთ, რომ ინვესტირებისას გრძელვადიანი მიდგომის შენარჩუნების შემთხვევაში, დრო თქვენს მხარესაა. ქვემოთ მოცემულ ფოტოზე ნათლად არის ასახული, თუ რამდენად მნიშვნელოვანია ინვესტიციების გრძელვადიან პერსპექტივაში ფლობა.
- ბაზრის ვარდნას განსხვავებულად შეხედეთ — დაინახეთ შესაძლებლობები
მრავალი გამოცდილი ინვესტორი ბაზრის ვარდნას „ფასდაკლებად“ აღიქვამს. თუ ამ მოვლენას განსხვავებული კუთხით შეხედავთ, მართლად დაინახავთ, რომ bear market-ის დროს გეძლევათ შესანიშნავი შანსი, ძლიერი კომპანიების აქციები დაბალ ფასად შეიძინოთ.
ლეგენდარული ინვესტორი — უორენ ბაფეტი ამბობს: „შესაძლებლობა იშვიათად მოდის. როცა ოქრო წვიმს, გამოიყენე სათლი და არა სათითე.” სხვა სიტყვებით რომ ვთქვათ, bear market-ის დროს თქვენი საყვარელი აქციები მკვეთრად გაიაფდება და ეს სიტუაცია თქვენს სასარგებლოდ უნდა გამოიყენოთ.
- მიმართეთ საინვესტიციო პორტფელის დივერსიფიკაციას
ინვესტირების კიდევ ერთი ძირითადი პრინციპი დივერსიფიკაციაა, რაც თქვენი ფულის მრავალი სახის ინვესტიციაზე განაწილებას გულისხმობს. სხვადასხვა ტიპის საინვესტიციო საშუალებები ცვლილებებზე განსხვავებულად რეაგირებს და ეს არასტაბილურობის მართვაში დაგეხმარებათ. როდესაც ერთი აქტივი არც თუ ისე კარგი წარმადობით ხასიათდება, შესაძლოა, საინვესტიციო პორტფელის დაბალანსებაში სხვა ტიპის აქტივი დაგეხმაროთ.
გარდა ამისა, დივერსიფიკაცია უნდა გასცდეს აქციების, ობლიგაციებისა და ნაღდი ფულის ზოგად კატეგორიებს. თითოეული მათგანი შეიძლება დაიყოს უფრო სპეციალიზებულ კატეგორიებად, რათა ბაზრების სხვადასხვა სექტორებით სარგებლობა შეძლოთ.
