საფონდო ბირჟა ხშირად არაპროგნოზირებადია, რაც, შეიძლება, შემაშფოთებელი იყოს – განსაკუთრებით მაშინ, თუ თქვენი სასიცოცხლოდ მნიშვნელოვანი დანაზოგი ინვესტიციებში გაქვთ ჩადებული. აქციების ფასები, განსაკუთრებით ბოლო ორი თვის განმავლობაში, ცვალებადი იყო. წლის დასაწყისში ბაზარმა ვარდნა განიცადა, შემდეგ სწრაფად აღდგა, მაგრამ ბოლო კვირებში კიდევ ერთხელ დაეცა.
მართალია არავინ იცის რა იქნება შემდეგი ეტაპი ან მიემართება თუ არა ბაზარი კრახისკენ, მაგრამ ეს არ ნიშნავს, რომ მომზადება არ შეგიძლიათ. ამ სტატიაში მოცემული სამი ნაბიჯის ახლავე გადადგმით, ნებისმიერი სცენარისთვის იქნებით მზად.
- კიდევ ერთხელ დარწმუნდით, რომ თქვენი საინვესტიციო პორტფელი დივერსიფიცირებულია
კარგად დივერსიფიცირებული პორტფელი საფონდო ბირჟის არასტაბილურობისგან გადარჩენის გასაღებია. თუ ყველა კვერცხს ერთ კალათში ჩადებთ, ბაზრის კრახისას დიდი თანხის დაკარგვის რისკის წინაშე აღმოჩნდებით. მაგრამ თუ თქვენი ფული სხვადასხვა ინდუსტრიის მრავალფეროვან აქციებზეა გადანაწილებული, გაცილებით მეტი შანსია, რომ თქვენი პორტფელი ამ წინაღობას გადალახავს.
არ არსებობს მკაცრი წესი იმის შესახებ, თუ რამდენი განსხვავებული ინვესტიცია უნდა გქონდეთ, მაგრამ გონივრული იქნება სხვადასხვა სექტორის მინიმუმ 25-30 განსხვავებულ აქციას ფლობდეთ. თუ თქვენ ინვესტიციას დებთ ურთიერთდახმარების ფონდში ან ETF-ში, შესაძლოა, უკვე დაცული ხართ, რადგან თითოეული ფონდი, შეიძლება, ასობით აქციას შეიცავდეს.
თუ რისკისადმი მიდრეკილი ინვესტორი ხართ, ამ რისკის შეზღუდვაში მეტი დივერსიფიკაცია დაგეხმარებათ. მიუხედავად იმისა, რომ ზედმეტად დივერსიფიცირებაც შესაძლებელია, რაც უფრო მრავალფეროვანია თქვენი პორტფელი, მით უფრო უსაფრთხოდ იქნებით.
- გაამყარეთ თქვენი საგანგებო ფონდი
თუ საგანგებო ფონდში უკვე არ გაქვთ ექვსი თვისთვის სამყოფი დანაზოგი, ახლა დროა ჯანსაღი უსაფრთხოების ბადის შექმნაზე ფოკუსირდეთ. თუ ამას არ გააკეთებთ, ბაზრის ვარდნა საშინელი დრო იქნება თქვენი ინვესტიციების გასანაღდებლად. ასეთ დროს, აქციების ფასები, რა თქმა უნდა, დაბალია, ამიტომ თქვენ იმაზე ნაკლებ ფასად მოგიწევთ გაყიდვა, ვიდრე შეიძინეთ, შესაბამისად, ზარალი გარდაუვალია.
თუ ბაზრის ვარდნის პერიოდში მოულოდნელ ხარჯებს წააწყდებით, საგანგებო ფონდმა, შეიძლება, თავიდან აგარიდოთ თქვენი ინვესტიციების გამოყენება.
- პანიკას ნუ აჰყვებით
ბაზრის ვარდნა შემაძრწუნებელია, თუნდაც გამოცდილი ინვესტორებისთვის, მაგრამ ეს ნორმალური და დროებითი მოვლენაა. წლების განმავლობაში ბაზარმა ათობით კორექცია და კრახი განიცადა, მაგრამ თითოეული მათგანისგან აღდგენა შეძლო. შესაბამისად, ბაზრის ვარდნის შემთხვევაში, მისი გამოსწორების შანსი ძალიან დიდია. მაგალითისთვის, ქვემოთ მოცემულ გრაფიკზე ასახულია S&P 500-ის წარმადობა 2000 წლიდან.
საუკეთესო რამ, რისი გაკეთებაც შეგიძლიათ, არის მშვიდად ყოფნა. თქვენი ინვესტიციების შენარჩუნებით, აქციების ფასების აღდგენის შემდეგ, ჯილდოს მიიღებთ. როდესაც გრძელვადიან პერსპექტივაზე ორიენტირდებით, ბაზრის ყოველდღიურ მოძრაობებში ჩარების თავიდან აცილება უფრო მარტივი იქნება.
არავინ იცის, გავხდებით თუ არა ბაზრის მორიგი კრახის მოწმენი, მაგრამ, ყოველი შემთხვევისთვის, მომზადება, გონივრული იქნება. როდესაც შემუშავებული გაქვთ სტრატეგია, შეგიძლიათ მას უფრო აუღელვებლად მიჰყვეთ, რადგან გეცოდინებათ, რომ თქვენი ინვესტიციები მაქსიმალურად დაცულია.
