უკვე დიდი ხანია, რაც კაპიტალის ბაზრები დაღმავალი მიმართულებით მოძრაობს და გასულ თვეში S&P 500 ოფიციალურად bear market-ის ტერიტორიაზე აღმოჩნდა. ყველაზე გამოცდილი ინვესტორებიც კი, შეიძლება, მსგავს სიტუაციებში პანიკამ მოიცვას.
ზოგიერთი ანალიტიკოსი წინასწარმეტყველებს, რომ, შესაძლოა, აშშ-ის ეკონომიკა რეცესიის წინაშე აღმოჩნდეს და ინფლაციის 40-წლიანმა მაქსიმალურმა მაჩვენებელმა, შეიძლება საფონდო ბირჟისთვის მდგომარეობა კიდევ უფრო გააუარესოს. არსებობს მნიშვნელოვანი შეცდომები, რომლებიც ინვესტორებმა ასეთ პერიოდში თავიდან უნდა აიცილონ და დღეს ორ მათგანს შემოგთავაზებთ.
- საინვესტიციო პორტფელის გამუდმებით შემოწმება
აქციებისთვის რთულ პერიოდებში ინვესტორებისთვის, შესაძლოა, მაცდური იყოს პორტფელის მუდმივად შემოწმება. ცდუნება გასაგებია, მაგრამ ცოტა არაგონივრული. Bear market-ის დროს ინვესტორების უმეტესობის საინვესტიციო პორტფელის ღირებულება შემცირდება, მაგრამ ზარალი არარეალიზებული იქნება მანამ, სანამ ხელს გაყიდვის ღილაკს დააჭერთ.
თუ ისტორიას გადავხედავთ, ვნახავთ, რომ ფართო ბაზარმა თითოეული კორექციისა თუ კრახის გადალახვა შეძლო და იმ პირობით, თუ თქვენ ხარისხიანი კომპანიების აქციებს ფლობთ, სავარაუდოა, რომ მდგომარეობის გამოსწორების შემდეგ მათი ფასები აღდგება.
- აქციების ყიდვისგან თავის შეკავება
ოპორტუნისტი ინვესტორებისთვის საფონდო ბირჟის ვარდნა შესანიშნავი შესაძლებლობაა. Bear market-ის დროს ძალიან ძლიერი კომპანიების აქციების ფასებიც მცირდება, ეს კი ახალ საინვესტიციო შესაძლებლობებს ქმნის.
აუცილებელია ინვესტიციაში მხოლოდ ის ფული ჩადოთ, რომლის დაკარგვაც შეგიძლიათ, განსაკუთრებით იმ შემთხვევაში, თუ ამ ვარდნას თან ეკონომიკური პრობლემები ახლავს.
გარდა ამისა, მხოლოდ ის ფაქტი, რომ კონკრეტული კომპანიის აქციების ფასი შემცირდა, ამჟამინდელ დონეზე მათი შესყიდვას კარგი გადაწყვეტილებად არ აქცევს. აქციებში ინვესტირებამდე კვლევის ჩატარება ყოველთვის მნიშვნელოვანია. თუ გააზრებულ საინვესტიციო გადაწყვეტილებებს მიიღებთ, bear market სიმდიდრის დაგროვებაში დაგეხმარებათ.
ითამაშეთ გრძელი თამაში
Bear ბაზრები სახალისო არ არის, მაგრამ საზრიან ინვესტორებს შეუძლიათ, რომ ეს არასახარბიელო მოვლენა დიდი სიმდიდრის დასაგროვებლად გამოიყენონ. ასეთ სიტუაციაში ძალიან მნიშვნელოვანია ემოციების გაკონტროლება, ცივი გონებით მსჯელობა და გრძელვადიან პერსპექტივაზე ორიენტირება, რათა უფრო დიდი სურათის დანახვა შევძლოთ და ბაზრის მოკლევადიან რყევებზე არ ჩავიციკლოთ. სწორედ ამ ერთი შეხედვით შემზარავი მოვლენის უკან იმალება ძლიერი კომპანიების აქციების შემცირებულ ფასად შეძენის შესანიშნავი შესაძლებლობები. მთავარია, რომ ჩვენი გადაწყვეტილება საფუძვლიანად ჩატარებულ კვლევასა და გრძელვადიან პერსპექტივაზე ორიენტირებულ ხედვაზე იყოს დაფუძნებული.
