ცნობილი ინვესტორი – უორენ ბაფეტი ან „ომაჰას ორაკული“, როგორც მას ხშირად უწოდებენ, საფონდო ბირჟის ლეგენდაა და დღესაც აქტუალურია. მისი ჰოლდინგი – Berkshire Hathaway მსოფლიოში ერთ-ერთი უდიდესი კომპანიაა.
თუ Berkshire-ს ყურადღებით დააკვირდებით, შეამჩნევთ უამრავ კომპანიას, რომელთაგან ზოგიერთს, ლეგენდარული ინვესტორი ათწლეულების განმავლობაში პოზიციების გაყიდვის გარეშე მართავს. ეს მკვეთრი განსხვავებაა იმისგან, რასაც მოისმენთ ტელევიზორში მოსაუბრე პირებისგან, რომლებიც მუდამ კვირის „ცხელ ვაჭრობაზე“ საუბრობენ.
ამ სტატიაში მოცემულია უორენ ბაფეტის გრძელვადიანი მიდგომის გამოყენების 2 სარგებელი.
კომპანიის საფუძვლებზე ფოკუსირება და მოთმინება ნაკლებ სტრესს იწვევს
საფონდო ბირჟას ზოგიერთი ადამიანი „კაზინოს“ უწოდებს, ალბათ, იმ ირაციონალური არასტაბილურობის გამო, რომელიც მას ყოველდღიურად ახასიათებს. მოკლევადიან პერიოდში ბევრ რამეს შეუძლია აქციების ფასების გადაადგილება. ყოველთვის არსებობს ახალი ამბები, სამთავრობო სტატისტიკა ან გეოპოლიტიკური მოვლენა, რომელიც ბაზარზე ძლიერად ზემოქმედებს. საინტერესოა, რატომ ცდილობს ამდენი ადამიანი ამ ყველაფერთან შეჭიდებას, როდესაც ბაზარი ასეთი ქაოტურია.
იმავდროულად, კომპანიის საფუძვლები, ჩვეულებრივ, ზრდის აქციების ფასს მრავალწლიანი პერიოდის განმავლობაში. თუ თქვენ კონკურენტული უპირატესობების მქონე მზარდ და მომგებიან ბიზნესს ფლობთ, ბაზარი, როგორც წესი, რაღაც მომენტში მას ამოიცნობს და უფრო მაღალი ფასით დააჯილდოებს.
შეიძლება ფლობდეთ მომავალი Amazon-ის მსგავსი კომპანიის აქციებს, მაგრამ ამ გიგანტის აქციების ფასიც კი 2000-იანი წლების დასაწყისში $100-დან $10-მდე ჩამოვიდა. Amazon ერთი წლით ადრე ჯანსაღი ბიზნესი იყო და შემდეგ უეცრად გაკოტრებამდე მივიდა? არა, უბრალოდ, ბაზარი ირაციონალურია და ასეთი რამ მუდამ ხდება. გაკვეთილი? ფოკუსირდით ბიზნესის საფუძვლებზე და მის პოტენციალის გამოვლენისთვის დრო მიეცით. უახლოეს პერსპექტივაში ყველაფერი უბრალოდ ვარაუდია.
ნუ ეცდებით ზედმეტის გაკეთებას
და ბოლოს, უორენ ბაფეტი არ ცდილობს იყოს იმაზე ჭკვიანი, ვიდრე საჭიროა. დიდებული აქციების პოვნა ძნელია და ბაფეტი, მათი პოვნისას საქმეს არ ართულებს, ის ასეთ აქციებს ინარჩუნებს მანამ, სანამ ისინი დიდებულებას დაკარგავს. სწორედ ამიტომ, ზოგიერთი აქცია Berkshire Hathaway-ის ნაწილი ათწლეულების განმავლობაში იყო.
მან, შეიძლება, თავად გითხრათ, რომ მისი ყველაზე დიდი შეცდომა ზედმეტის გაკეთების მცდელობა იყო. ბაფეტმა ორჯერ გაყიდა Walt Disney-ის აქციები, რაც მისთვის $31 მილიარდის ოდენობით პოტენციური მოგების ხელიდან გაშვებული შესაძლებლობად იქცა.
უფრო ფართო მონაცემები ადასტურებს იმას, რაც უორენ ბაფეტმა თავად აღმოაჩინა: რაც უფრო მეტს ვაჭრობთ, მით უარესი იქნება თქვენი ინვესტიციებიდან მიღებული ანაზღაურება. ზოგჯერ გასაყიდად კარგი მიზეზი არსებობს, მაგალითად, წარუმატებელი საინვესტიციო თეზისი ან არაეთიკური მენეჯმენტი. თუმცა, ინვესტორების მცდელობა, რომ ოთახში ყველაზე ინტელექტუალური ადამიანები იყვნენ, ხშირად საპირისპიროდ მოქმედებს.
დასკვნა
უორენ ბაფეტისგან და მისი ხანგრძლივი კარიერის მაგალითზე ბევრი რამის სწავლა შეიძლება. მისი გრძელვადიანი საინვესტიციო სტრატეგია არის მარტივი კომპასი, რომლით სარგებლობაც საცალო ინვესტორებს შეუძლიათ.
აქციების ცვალებადობასთან გამკლავება ადვილი არ არის და შესანიშნავი საინვესტიციო შესაძლებლობების პოვნა თივის ზვინში ნემსის პოვნას ჰგავს, მაგრამ შეგიძლიათ ამოცანა ბაფეტის საინვესტიციო მოღვაწეობიდან სიბრძნის სესხებით გაიმარტივოთ. იპოვეთ გამარჯვებულები, შეინარჩუნეთ ისინი და მიეცით საშუალება თქვენთვის სიმდიდრის დაგროვებაში მნიშვნელოვანი როლი ითამაშონ.
