ბოლო დროს საფონდო ბირჟა დაღმავალი მიმართულებით მოძრაობს, S&P 500 წლის დასაწყისიდან 12%-ზე მეტით დაეცა. ტექნოლოგიური აქციებით დატვირთულმა Nasdaq-მა ამავე პერიოდში კიდევ უფრო მკვეთრი 20%-იანი ვარდნა განიცადა.
მიუხედავად იმისა, დამწყები ინვესტორი ხართ თუ გამოცდილი, არასტაბილურობის გაძლება შეიძლება რთული იყოს.
ბაზრის ვარდნა იმდენად რთული პროცესია, რომ ცოტა რამის გაკონტროლება შეგვიძლია. არავინ იცის, თუ რამდენად დაეცემა აქციების ფასები ან რამდენი დრო დასჭირდება მათ აღდგენას და ეს გაურკვევლობა, შეიძლება, რთული იყოს.
თუმცა, არის ერთი ნაბიჯი, რომლის ახლავე გადადგმა არამარტო დაეხმარება თქვენს ინვესტიციებს, არამედ ცვალებადობას ნაკლებად დამაშინებელს გახდის: გრძელვადიანი პერსპექტივის შენარჩუნება.
ინვესტიცია გრძელვადიანი თამაშია
სულაც არ აქვს მნიშვნელობა რას აკეთებს ბაზარი დღეების, კვირების ან თუნდაც თვეების განმავლობაში. მთავარი გრძელვადიანი წარმადობაა.
საფონდო ბირჟა მოკლევადიან რყევებს მუდამ განიცდის. თუმცა, დროთა განმავლობაში, ბაზარი, მიუხედავად მოკლევადიანი არასტაბილურობისა, მუდმივად აფიქსირებდა პოზიტიურ საშუალო შემოსავალს. ამ გრძელვადიან ანაზღაურებაზე ფოკუსირებით, დროდადრო ქარიშხლების გადალახვა შეიძლება უფრო ადვილი გახდეს.
რას ნიშნავს ეს თქვენთვის?
როდესაც ბაზარი მერყევია, ძნელია თქვენი ინვესტიციების დასაცავად რაიმეს გაკეთების სურვილს წინააღმდეგობა გაუწიოთ. თუმცა, უმეტეს შემთხვევაში, საუკეთესო რამ, რისი გაკეთებაც შეიძლება – უბრალოდ დალოდებაა.
თქვენი ფულის ბაზრიდან გატანა, შეიძლება, სარისკო იყოს, რადგან არავინ იცის, თუ როგორი იქნება ბაზარი უახლოეს პერიოდში. თუ თქვენს პოზიციებს გაყიდით და ბაზარი ზრდას განიცდის, ხელიდან მნიშვნელოვან მოგებას გაუშვებთ, მაგრამ თუ ძალიან დიდხანს აყოვნებთ გაყიდვას და ბაზარი უკვე დაეცა, შესაძლოა თქვენი აქციები ზარალით გაყიდოთ.
უმეტეს შემთხვევაში, საუკეთესო არჩევანი ინვესტიციების შენარჩუნებაა, მიუხედავად იმისა, თუ რა ხდება ბაზარზე. გახსოვდეთ, რომ პოზიციების გაყიდვამდე ტექნიკურად ფულს არ კარგავთ.
გაუძლებს თქვენი აქციები ბაზრის ვარდნას?
ინვესტირების დროს გრძელვადიანი პერსპექტივის შენარჩუნების გასაღები არის იმის უზრუნველყოფა, რომ თქვენი საინვესტიციო პორტფელი მყარი აქციებით შეავსოთ.
ყველა კომპანია ვერ გაუძლებს ცვალებადობის პერიოდებს, მაგრამ ჯანსაღი საფუძვლების მქონე ძლიერი კომპანიები ამ დროს ყველაზე საიმედო არჩევანია. რაც უფრო მეტი ასეთი კომპანიის აქციას ფლობთ მით უფრო მეტია შანსი, რომ ბაზრის კრახი უმტკივნეულოდ გადაიტანოთ.
დაიმახსოვრეთ, რომ ყველაზე ძლიერმა კომპანიების აქციებმაც კი შეიძლება ბაზრის კრახის დროს დიდი დარტყმა განიცადოს, მაგრამ როდესაც მდგომარეობა აღდგება, ეს აქციები პირვანდელ კურსს აუცილებლად დაუბრუნდება.
ყველაზე გამოცდილი ინვესტორისთვისაც კი შეიძლება არასტაბილურობა ფსიქოლოგიურად რთული იყოს, მაგრამ საკუთარი თავის დაცვის გზები არსებობს. სწორი ინვესტიციების არჩევით და გრძელვადიან პერსპექტივაზე ფოკუსირების შენარჩუნებით, შეგიძლიათ უფრო მშვიდად დაიძინოთ, რადგან გეცოდინებათ, რომ თქვენი ფულის უსაფრთხოებისთვის ყველაფერს აკეთებთ.
