უილიამ ალბერტ აკმანი, იგივე ბილ აკმანი, 1966 წლის 11 მაისს დაიბადა. მდიდარი და გაურთულებელი ბავშვობის შემდეგ მან 1988 წელს დაამთავრა ჰარვარდის უნივერსიტეტი ბაკალავრის ხარისხით ისტორიაში, შემდეგ კი — ბიზნესის ადმინისტრირების სკოლა Harvard Business School-ში.
გარკვეული პერიოდის განმავლობაში უძრავი ქონების სფეროში მამასთან მუშაობის შემდეგ მან გადაწყვიტა თავისი პირველი ჰეჯ-ფონდი 1992 წელს ჯოელ გრინბლატთან ერთად შეექმნა. მიუხედავად იმისა, რომ ამ ფონდის მოღვაწეობა წარუმატებელი არ ყოფილა, 2002 წელს ბილმა მისი დახურვა გადაწყვიტა. ორი წლის შემდეგ მან გახსნა Pershing Square Capital Management L.P. $54 მილიონის ოდენობით საწყისი კაპიტალით.
Pershing Square Capital Management
ბილის ახალმა ფონდმა პრაქტიკულად მყისიერ წარმატებას მიაღწია; მან კაპიტალის საგრძნობლად გაზრდა მოახერხა, მაგალითად, 2014 წელს წლიურმა ზრდამ 40% შეადგინა. პარალელურად, Pershing Square-ის საშუალებით, მან მნიშვნელოვანი საქველმოქმედო საქმიანობა დაიწყო, ძირითადად ბავშვებისა და განათლების მხარდაჭერის კუთხით.
განსხვავებული სტილი
ბილის საინვესტიციო სტილი ყოველთვის კამათის საგანი ხდებოდა. როგორც მისი ნაბიჯები, ასევე შედეგებიც არაერთგვაროვანი იყო — ზოგჯერ ბილის გადაწყვეტილებებს მისთვის მილიარდი დოლარი მოჰქონდა, ხანდახან კი ინვესტორი ისეთ ფსონებს აკეთებდა, რომ მილიარდობით დოლარს კარგავდა.
ბილი საკუთარ თავს მიიჩნევს „აქტივისტ ინვესტორად“, რომელიც ეძებს მსხვილ კომპანიებს დიდი პოტენციალით, მაგრამ ფინანსური პრობლემებით. იგი ამ პრობლემებს წყვეტს ისე, რომ აქციების ფასი იზრდება და, შესაბამისად, ინვესტორი სარგებელს იღებს.
ბილ აკმანი vs Herbalife
მიუხედავად იმისა, რომ ბილს დიდი პოტენციალის მქონე კარგი კომპანიების გადარჩენა უყვარს, იგი სარგებლის მიღებას ცდილობს მოკლე პოზიციების დაჭერითაც (საინვესტიციო აქტივობა, რომლის დროსაც ინვესტორი სესხულობს და ყიდის ფასიან ქაღალდებს იმ იმედით, რომ შემდგომში მათ უფრო იაფად შეიძენს) იმ კომპანიების წინააღმდეგ, რომლებსაც ის გარკვეულწილად თაღლითებად მიიჩნევს.
2012 წლის დეკემბერში მან გამოაქვეყნა ანგარიში, რომელშიც Herbalife-ს პირამიდული სქემით მოქმედებაში ადანაშაულებდა. ბილმა ასევე განაცხადა, რომ კომპანიის პროდუქტები თავიანთ დანიშნულებას არ ასრულებდა და Herbalife ატყუებდა როგორც მომხმარებლებს, ასევე პარტნიორებს.
მოხსენებამ აქციების ფასის დაცემა გამოიწვია, თუმცა, აკმანის ძველი ნაცნობისა და კონკურენტის, კარლ აიკანის ჩარევამ, რომელმაც ფსონი დიეტური დანამატების კომპანიის სასარგებლოდ გააკეთა, Herbalife-ის აქციების გადაფასება გამოიწვია.
მას შემდეგ, რაც ბილმა კომპანიის წინააღმდეგ დაახლოებით $50 მილიონი დახარჯა, მან ზარალი განიცადა, თუმდა Herbalife-ში პოზიციები მაინც შეინარჩუნა.
2014 წელს, Herbalife-ის წინააღმდეგ დაწყებული კამპანიის შედეგად, მასაჩუსეტსის სენატორმა — ედ მარკიმ SEC-ს (ფასიანი ქაღალდებისა და ბირჟის კომისია) მიმართა და კომპანიის პირამიდული სქემის შესახებ გამოძიების ჩატარება მოითხოვა. ამან გამოიწვია აქციების ფასის დაცემა, ნელ-ნელა, 50%-მდე. ამ ფაქტმა კი ბილ აკმანს საშუალება მისცა, დაეფარა თავისი მოკლე პოზიცია, თუმცა ზარალის სრულად აღდგენის გარეშე.
როგორია ბილის საინვესტიციო სტილი?
ბილს კარიერაში არაერთგვაროვანი შედეგები ჰქონდა, 2019 წელს მან თავისი ჰეჯ-ფონდისთვის 58%-იანი ანაზღაურების გამომუშავება შეძლო, განსხვავებით იმ ზარალისა, რომელიც Herbalife-ის წინააღმდეგ მოკლე პოზიციის დაკავებით განიცადა.
2020 წელს მან მოახერხა $27 მილიონის $2.6 მილიარდად გარდაქმნა მხოლოდ ერთი ნაბიჯით, როდესაც ფსონი გააკეთა ბაზრის ფართო ვარდნაზე იმ პანდემიის შედეგების ფონზე, რომელიც მაშინ მსოფლიოში იწყებოდა.
ბილ აკმანი დღეს
ბილ აკმანი დღეს ერთ-ერთი ყველაზე ცნობილი ინვესტორია, რომელიც კვლავ ინარჩუნებს ორ განსხვავებულ მიდგომას — აკეთებს ფსონებს იმ კომპანიების წინააღმდეგ, რომლებიც მას არ მოსწონს და ყველაფერს აკეთებს მათ დასახმარებლად, რომელთა საქმიანობითაც მოხიბლულია.
