ყველა დროის ერთ-ერთი ყველაზე წარმატებული მილიარდერი ინვესტორის — უორენ ბაფეტის მიმდევრებმა კარგად იციან, რომ წარმატება გონივრული საინვესტიციო გადაწყვეტილებების მიღებით მიიღწევა. თუმცა, შესაძლოა, ამ გადაწყვეტილებებს აქციებთან და ობლიგაციებთან საერთო არაფერი ჰქონდეს.
ერთ-ერთ ინტერვიუში ბაფეტმა განაცხადა: „საუკეთესო ინვესტიცია საკუთარ თავში ჩადებული ინვესტიციაა“.
ეს შეიძლება ომაჰას ორაკულისგან (ბაფეტის მეტსახელი) ერთ-ერთი ყველაზე ღირებული გაკვეთილი იყოს. საკუთარ თავში ინვესტირება ნიშნავს, რომ არასოდეს შეწყვიტოთ ცოდნის შეძენა — ისეთი ცოდნის, რომელიც გაუმჯობესებთ მთლიანობაში როგორც ადამიანს და არა მხოლოდ — ინვესტორს.
დღეს სწორედ ამ საკითხის შესახებ ვისაუბრებთ და შემოგთავაზებთ სამ გზას საკუთარ თავში ინვესტირებისთვის.
გააუმჯობესეთ თქვენი კომუნიკაციური უნარები
„შესაძლოა მსოფლიოში არსებულ მთელ გონებრივ ძალას ფლობდეთ, მაგრამ მისი სხვისთვის გადაცემა უნდა შეგეძლოთ და ეს სწორედ კომუნიკაციის საშუალებით მიიღწევა“ — ამბობს უორენ ბაფეტი.
იგი ასევე მიიჩნევს, რომ ინვესტირებას კომუნიკაციურ უნარებში — როგორც წერილობითში, ასევე ვერბალურში — შეუძლია თქვენი ფასეულობა მინიმუმ 50%-ით გაზარდოს.
ჩადეთ ინვესტიცია ლიდერული უნარების განვითარებაში
ბაფეტი საკმაოდ ხშირად გასცემს რჩევებს ლიდერობის შესახებ. იგი ხაზს უსვამს ერთი აუცილებელი მახასიათებლის მნიშვნელობას, რომელიც ყველა ლიდერში უნდა იყოს: კეთილსინდისიერება.
ერთხელ ლეგენდარულმა ინვესტორმა თქვა: „კადრების ძებნისას ჩვენ ყურადღებას ვამახვილებთ სამ თვისებაზე: კეთილსინდისიერება, ენერგია ან ინიციატივა და ინტელექტი. თუ მათ არ ექნებათ პირველი, დანარჩენი ორი გაგანადგურებთ, რადგან თუ სამსახურში არაკეთილსინდისიერ ადამიანს აიყვანთ, სჯობს, იგი ზარმაცი და სულელი იყოს“.
ჩადეთ ინვესტიცია საქმიანი ურთიერთობების გაუმჯობესებაში
წარმატების მისაღწევად ერთ-ერთ საუკეთესო სტრატეგიას წარმოადგენს ის, რომ გარშემორტყმული იყოთ სწორი ადამიანებით. რამდენიმე წლის წლის უორენ ბაფეტმა კოლეჯის სტუდენტებთან საუბრისას თქვა: „თქვენ იმ ადამიანების კვალს დაადგებით, რომლებთანაც მეგობრობთ. ასე რომ, ძალიან მნიშვნელოვანია ისეთ ადამიანებთან ურთიერთობა, რომლებიც თქვენზე უკეთესები არიან“.
როგორც ცნობილი გამონათქვამი გვეუბნება: „ჩვენ ვართ იმ ხუთი ადამიანის საშუალო არითმეტიკული, ვისთანაც ყველაზე მეტ დროს ვატარებთ“. ამიტომ, დარწმუნდით, რომ საკუთარ ცხოვრებას სწორ ადამიანებს დაუკავშირებთ.
