მომგებიანი ინვესტირება და ცხოვრებაში წარმატების მიღწევა ერთმანეთს ჰგავს. ორივე მათგანი სტრატეგიული გადაწყვეტილებების მიღებას და გრძელვადიანი წარმატების მისაღწევად ცდუნებების გადალახვას გულისხმობს. ისევე, როგორც კაპიტალის ჩადებამდე ინვესტორები ყურადღებით აანალიზებენ რისკებსა და სარგებელს, ინდივიდებმა სწორად უნდა შეაფასონ შესაძლებლობები, გააკეთონ გააზრებული არჩევანი პირადი და პროფესიული მიზნების მისაღწევად. ორივე მცდელობა მოითხოვს მოთმინებას, გამძლეობას და უპირველეს ყოვლისა, სწავლის სურვილს.
ლეგენდარულმა ინვესტორმა — უორენ ბაფეტმა ეს ძალიან კარგად იცის. წარმატების მისაღწევად იგი იყენებს მარტივ მენტალურ მოდელს, რომელსაც კომპეტენციის წრეს უწოდებს.
კომპეტენციის წრე
ინვესტიციებში კომპეტენციის წრე გულისხმობს იმ ინდუსტრიებსა და ბაზრებზე ორიენტირება, რომლებსაც კარგად იცნობთ. ლეგენდარული ინვესტორისთვის ასეთია სამომხმარებლო საქონლის მწარმოებელი კომპანიები, სადაზღვევო და საბანკო სექტორები. ცხოვრებაშიც ყველას გვაქვს ჩვენი ძლიერი და სუსტი მხარეები.
მეორე ეტაპი თქვენს წრეში დარჩენაა. ინვესტიციებში ბაფეტი ცნობილია გარკვეული ფსონებისგან თავის არიდებით, მიუხედავად იმისა, თუ რამდენად მომგებიანია ისინი — იგი ყოველთვის ყოყმანობდა ტექნოლოგიურ სექტორთან დაკავშირებით.
ეს არ ნიშნავს, რომ ზრდაზე უარი უნდა თქვათ. ამას კი მესამე საფეხურამდე მივყავართ.
გააფართოვეთ თქვენი კომპეტენციის წრე. ზრდა და განვითარება წარმატებისთვის გადამწყვეტია. ამისთვის უნდა განსაზღვროთ, რაში ხართ გამოცდილი და რა სფეროს ათვისება გჭირდებათ უფრო სიღრმისეულად. ბაფეტი ამბობს, რომ სწავლის პროცესი მიზანმიმართული და თანმიმდევრული უნდა იყოს.
დაბოლოს, აღიარეთ საზღვრები. ეს არის ჯანსაღი თვითშემეცნება და ინტელექტუალური თავმდაბლობა — იმაში გამოტყდომა, რომ რაღაც არ იცით. ამ მიდგომის გარეშე, ადამიანები (ინვესტიციებში და ზოგადად ცხოვრებაში) მიდრეკილნი არიან გადაჭარბებული თავდაჯერებულობისკენ, რამაც შეიძლება სავალალო შედეგებამდე მიგვიყვანოს.
