უორენ ბაფეტს, საფონდო ბირჟის ვარდნასთან დაკავშირებით, უმრავლესობისგან განსხვავებული პერსპექტივა აქვს. ბაფეტი მსოფლიოს უმდიდრეს ადამიანებსა და ყველაზე წარმატებულ ინვესტორებს შორის ერთ-ერთია, ამიტომ მისი ხედვების გათვალისწინება ყოველთვის ღირს.
მოდით ვნახოთ, თუ რას ამბობს ბაფეტი აქციების ფასების დაცემასთან დაკავშირებით და როგორ შეგვიძლია მისი ტაქტიკის უსაფრთხოდ გამოყენება.
აქციების „წმინდა მყიდველები“
2020 წელს CNBC-სთან ინტერვიუში ბაფეტმა განაცხადა, რომ აქციების „წმინდა მყიდველები“ სარგებლობენ, როდესაც საფონდო ბირჟა ეცემა. „წმინდა მყიდველებში“ ის გულისხმობს ინვესტორებს, რომლებიც უფრო მეტ აქციებს ყიდულობენ, ვიდრე ყიდიან.
ყველა, ვინც აქციებს ყოველთვიურად ყიდულობს, შეიძლება „წმინდა მყიდველი“ იყოს. გარდა ამისა, ინვესტორები რომლებიც „იყიდე და შეინარჩუნე“ სტრატეგიას მიჰყვებიან, როგორც წესი, „წმინდა მყიდველები“ არიან.
წმინდა მყიდველებისთვის აქციების დაბალმა ფასებმა, შეიძლება, უფრო დიდი მოგების მიღების პოტენციალი გამოიწვიოს, თუ ვივარაუდებთ, რომ ინვესტირებას განაგრძობთ მაშინაც, როდესაც ბაზარი ეცემა. ბაფეტის აზრით, წმინდა მყიდველებისთვის ბაზრების დაცემა სასიხარულო ამბავია.
თუ ინვესტიციებს რეგულარულად დებთ და აქციებს იშვიათად ყიდით, ლოგიკურია აქციების ფასებზე ფოკუსირება, რადგან ისინი დაკავშირებულია ყიდვასთან და არა გაყიდვასთან. მყიდველებისთვის კი აქციების დაბალი ფასები კარგია.
როგორ ზეიმობს ბაფეტი აქციების დაბალ ფასებს?
ბაფეტი ამ პერსპექტივებს პრაქტიკაშიც იყენებს. როდესაც საფონდო ბირჟა ეცემა, ის ხშირად აძლიერებს ყიდვის აქტივობას – სარგებლობს აქციების დაბალი ფასებით მანამ, სანამ ეს შესაძლებლობა გაქრება.
ეს არის ზუსტად ის, რაც 2022 წლის პირველ ნახევარში მოხდა, როდესაც S&P 500 დაახლოებით 20%-ით დაეცა. Berkshire Hathaway-მა, კონგლომერატმა, რომელსაც ბაფეტი მართავს, ბაზრის დაღმასვლისას $44 მილიარდის მოცულობის ინვესტიციები ჩადო. ბაზრის აღდგენის შემდეგ კომპანიამ ამ შესყიდვებიდან დიდი სარგებელი მიიღო.
როგორ უნდა ჩადოთ ბაზრის ვარდნისას ინვესტიცია უსაფრთხოდ?
ბაზრის ვარდნის პერიოდებში ინვესტირებამ შესაძლოა თქვენი საინვესტიციო პორტფელის გრძელვადიანი შემოსავლის პოტენციალი გაზარდოს, მაგრამ ეს ყველასთვის მართალი არ არის. ბაფეტს აშკარად შეუდარებელი რესურსები და ათწლეულების გამოცდილება აქვს, რაც დიდი უპირატესობაა. სხვა ბევრი ინვესტორისთვის, ვარდნის პირობებში ინვესტირება, შეიძლება, ძალიან სტრესული იყოს.
აქედან გამომდინარე, ჭკვიანურია შემდეგი მითითებების გათვალისწინება:
- ინვესტიციებში ნუ ჩადებთ იმ ფულს, რომელიც მომდევნო 5 წლის განმავლობაში დაგჭირდებათ. უკეთესი იქნება, თუ თქვენს ინვესტიციებს, მოგების მოსატანად, 10 ან 20 წლიან ვადას მისცემთ.
- შეიძინეთ მხოლოდ იმ კომპანიების აქციები, რომლებშიც ერკვევით.
- ჩადეთ მცირე ინვესტიცია ყოველკვირეულად ან ყოველთვიურად.
შეცვალეთ პერსპექტივა
მაშინაც კი, თუ ბაზრის ვარდნის დროს ინვესტიციებს არ ჩადებთ, შეგიძლიათ სცადოთ ექსპერიმენტები წმინდა მყიდველის პერსპექტივასთან დაკავშირებით.
იმის ნაცვლად, რომ ყურადღება გაამახვილოთ იმაზე, თუ რამდენად შემცირდა თქვენი პორტფელის ღირებულება, მოძებნეთ შესაძლებლობა. დააკვირდით, როგორ რეაგირებენ თქვენი საყვარელი აქციები და წარმოიდგინეთ, როგორ შეიძლება აღდგეს ისინი. შეგიძლიათ იმიტირებული საინვესტიციო პორტფელიც კი შექმნათ.
ასეთი სავარჯიშოს შესრულებამ ბაზრის რთული მდგომარეობა ფსიქოლოგიურად უნდა შეამსუბუქოს. იმ დროისთვის კი, როდესაც შემდეგი bear market გამოჩნდება, თქვენ მის გადასალახად სტრატეგია გექნებათ.
ეს არ არის ფინანსური რჩევა. ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა, გამოიწვიოს არსებითი დანაკარგები, ისევე როგორც – მოგება. ამიტომ, დეტალურად უნდა გააანალიზოთ, რამდენად მისაღებია ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა, აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
