საფონდო ბირჟის კორექციები, რომლებიც ძირითადი ინდექსების 10%-დან 20%-მდე შემცირებით განისაზღვრება, გარდაუვალი მოვლენაა. სინამდვილეში, კორექცია საშუალოდ ორ წელიწადში ერთხელ ხდება. თუ ინვესტორი ხართ, ამ ფაქტთან შეგუებით თავიდან აირიდებთ უსარგებლო სტრესს. ერთი რამ, რისი გაკეთებაც ნამდვილად არ არის კარგი, ეს პანიკური გაყიდვებია.
![](https://investhub.ge/wp-content/uploads/2022/05/Investor-7.png)
ნება მიეცით დროს, თავისი სამუშაო შეასრულოს
ინვესტირების ერთ-ერთი უდიდესი კონცეფცია არის რთული პროცენტი. ალბერტ აინშტაინმა მას „მსოფლიოს მერვე საოცრებაც“ კი უწოდა. რთული პროცენტი არის ფენომენი, როდესაც თქვენი ინვესტიციებიდან მიღებული ფული თავად იწყებს კიდევ უფრო მეტი ფულის გამომუშავებას. მაგრამ იმისთვის, რომ რთულმა პროცენტმა თავისი ჯადოქრული სამუშაო შეასრულოს, საჭიროა დრო. თუ $10,000-ის ოდენობით ერთჯერად ინვესტიციას განახორციელებთ აქტივში, რომელიც ყოველწლიურად 10%-ს აბრუნებს, 25 წელიწადში $108,000-ს დააგროვებთ.
როდესაც საფონდო ბირჟაზე საქმეები რთულდება და ფასები ეცემა, ზოგიერთი ადამიანი პანიკაშია და, მეტი ფულის დაკარგვის თავიდან აცილების მიზნით, თავისი პოზიციების გაყიდვას იწყებს. თუმცა, გრძელვადიან პერსპექტივაზე ორიენტირებული ინვესტორისთვის პანიკური გაყიდვების განხორციელება ერთ-ერთი უდიდესი შეცდომაა, რადგან ეს რთულ პროცენტს ეფექტს აკარგვინებს.
წარმოიდგინეთ, რომ ბოლო 10 წლის განმავლობაში ყოველწლიურად $6,000 შეგაქვთ აქტივში, რომელსაც 10%-ის ტოლი ყოველწლიური სარგებელი აქვს. ამ 10 წლის განმავლობაში დააგროვებდით $105,000-ზე მეტს, მიუხედავად იმისა, რომ თქვენი პირადი შენატანები $60,000-ს შეადგენს. თუ კიდევ 10 წლის განმავლობაში განაგრძობთ იმავეს გაკეთებას და დამატებით $60,000-ის ოდენობით შენატანს განახორციელებთ, თქვენი ანგარიშის მთლიანი ღირებულება მეორე ათწლეულის ბოლოს $378,000-ს გადააჭარბებს (იმავე 10%-იანი ანაზღაურების გათვალისწინებით).
მაშინაც კი, თუ დავუშვათ თქვენი ინვესტიცია მხოლოდ 1 წლით გაყიდეთ, ვთქვათ მეთექვსმეტე წელს, საბოლოოდ თქვენი ქონება $346,000 იქნება. სხვა სიტყვებით რომ ვთქვათ, ეს ერთწლიანი „ჩავარდნა“ თქვენს სარგებელს $30,000-ზე მეტით შეამცირებს.
კონცენტრირდით გრძელვადიან მიზანზე
გრძელვადიანი ინვესტორები მხოლოდ გრძელვადიან პერსპექტივაზე უნდა იყვნენ ორიენტირებულნი. თუ თქვენი საინვესტიციო პორტფელი საფონდო ბირჟის კორექციის გამო ზარალდება, ხედვა შეცვალეთ და ეს შესაძლებლობად ჩათვალეთ. უორენ ბაფეტმა ეს ყველაფერი პერსპექტივაში აჩვენა, როდესაც თქვა: „იყავი ფრთხილად, როდესაც სხვები ხარბები არიან და გამოიჩინე სიხარბე, როდესაც სხვებს ეშინიათ“. თქვენი გრძელვადიანი მიზნები ბაზრის მოკლევადიანი ტენდენციების გამო არ უნდა შეიცვალოს. დარჩით კურსზე და თქვენს გრძელვადიან მიზანზე კონცენტრირდით.