ერთხელ ბიზნესის ადმინისტრირების მაგისტრატურის სტუდენტმა მილიარდერ ინვესტორს — უორენ ბაფეტს ასეთი შეკითხვა დაუსვა: „რას გააკეთებდით ყველაფრის თავიდან დაწყება რომ შეგეძლოთ“. ბაფეტმა კი აღნიშნა: „ბიზნესის სამყაროში ყველაზე წარმატებული არის ის, ვინც საყვარელი საქმითაა დაკავებული“.
აკეთეთ ის, რაც გიყვართ
ეს არის ის ოთხი სიტყვა, რომელზეც, უორენ ბაფეტის აზრით, წარმატება გადის. ამაში ინვესტორს, ალბათ, ბევრი წარმატებული ადამიანი დაეთანხმება. ახლა კი საკუთარ თავს დაუსვით კითხვა — აკეთებთ იმას, რაც გიყვართ?
მილიარდერებისთვის საყვარელი საქმისკენ სწრაფვა შეიძლება მარტივი იყოს. მათ საკმარისი რესურსები გააჩნიათ იმისთვის, რომ დრო საკუთარი სურვილისამებრ გაატარონ. თუმცა ბაფეტი, პლანეტის ერთ-ერთი უმდიდრესი ადამიანის ტიტულის მოპოვებამდეც, საკუთარ სურვილებს მისდევდა.
თუ ბაფეტის სიბრძნე საკმარისი არ არის თქვენი ყურადღების მოსაზიდად, გაითვალისწინეთ, რომ სტივ ჯობსიც იმავე ფილოსოფიით ცხოვრობდა.
იპოვე ის, რაც გიყვარს
როგორც სტივმა 2005 წელს სტენფორდის უნივერსიტეტში გამოსვლის დროს აღნიშნა, საყვარელი საქმისკენ სწრაფვა ყოველთვის პარკში გასეირნებას არ ჰგავს. ადრეულ პერიოდში სტივ ჯობსისთვის მოვლენები მშვიდად არ ვითარდებოდა და იგი საკუთარი კომპანიიდან (Apple) გააძევეს კიდეც. რომ არა საქმის სიყვარული, შესაძლოა, სტივი უკან აღარც დაბრუნებულიყო. იგი ამბობდა: „დარწმუნებული ვარ, რომ ერთადერთი რამ, რაც წინსვლაში დამეხმარა ჩემი საქმის სიყვარული იყო. თქვენ უნდა იპოვოთ ის, რაც გიყვართ… სამუშაო თქვენი ცხოვრების დიდ ნაწილს შეავსებს და ერთადერთი გზა ჭეშმარიტი კმაყოფილების შესაგრძნობად არის იმის კეთება, რაც თქვენი რწმენით, დიადი საქმეა“.
თუ იმის პოვნა, რაც გიყვართ, მოსალოდნელზე რთულია, ჯობსი მოგვიწოდებს დავიჯეროთ, რომ ეს ყველაფერი ლოდინად ღირს: „თუ ის ჯერ კიდევ ვერ იპოვეთ, ძებნა განაგრძეთ. ნუ დანებდებით. როდესაც მას იპოვით, ამას გულით იგრძნობთ. და როგორც ნებისმიერი შესანიშნავი ურთიერთობის შემთხვევაში, წლების გასხვლასთან ერთად ის სულ უფრო უკეთესი გახდება. ასე რომ, განაგრძეთ ძებნა მანამ, სანამ მას იპოვით“.
